Dadatika Maxaafa 22
22
Abirihaami Hega Uudeme
1Tenne yaanuwwa uduma Mageni Abirihaamii hega uude; isoonna hiyyee qici, «Koo Abirihaam» hiyye ye'e; isinna «Hee kunnina kabanni hedhennen» hiyye.#Ibr. 11:17-19.
2Mageninna, «Eettaatteka atika mittelcho belto Yisaaqii aaxxe Mooriya bogiba'a me'i; ookko'o ani ate'n kulannoxxe kooba'n ani'a ciinceessite tolchi» hiyye.#2 Odo. 3:1.
3Langa baro Abirihaami bariisanni ke'e harichcho koodhdheexxi ifika lame erganjuwwanna ifika belto Yisaaqinna welti adhdhe; ciinceessatike tolchi'aanna geltaaxxa haqqe aadheexxi Mageni iso'n kulmake boonchiba'a ke'e me'e. 4Sakka baro Abirihaami tami asseexxi eettene bakka bayyii'n afe. 5Ookkoneechchi uduma Abirihaam ifika erganjuwwa, «Ani anke beltinni ookko marre'e Mageno magenooffate ha'noobaa illee iima hinge danganno qico'ni harichcho abiddine kabanni hedhdhe» hiyye.
6Abirihaaminna ciinceesatike tolchixxa haqqe aadheexxi Yisaaqi ifike belto'n dukise; giiratanna shiifa kinni isi ifi'aanni iyyee'naa lamiingi welti me'ine. 7Yisaaqinna anna ifika Abirihaamii, «Annayyoo» hiyye ye'e; Abirihaaminna, «Hee anke belto» hiyye. Yisaaqinna, «Egedhdhi! Giiratinna haqqe kunniseten; yaane kinni ciinceesatik tolchik beltanji habata hedhe?» Hiyyee isoo qore.
8Abirihaaminna «Anke belto ciinceesatike tolchika beltanjo Mageningi umo ifingenninni qixxeessan» hiyye hiisse. Ookkoneechchi uduma lamiingi welti me'ine.
9Mageni kulemmaxxe bakkaba gennee wodda Abirihaami tolchimalcho ijaareexxi haqqetanna isi hana tuule giisse; belto ifika Yisaaqii usureexxi tolchi hana irkise.#Ya'i. 2:21. 10Abirihaaminnna belto ifika gorra'o'a anga qeerrise shiifa aadhe. 11Mageniink iimik erganji kinni iimatenaa'n, «Abirihaam! Koo Abirihaam» hiyye isoo ye'e.
Abirihaaminna, «Hee kabanni hedhennen» hiyye.
12Iimik Erganjinna Abirihaamii, «Beltoke'n fuggoxxenni atixxa anga wirri assitoxxe; atika mitte belto anee hoyyedha gophpheettaxxee Magenoke sodaattattexxa ta'a ege'neennen» hiyye.
13Abirihaaminna toggi hiyye uudaa wodda raaqi giddo gaafi badda'at sagaremeeka mitte gedhebi beltanjo afe. Marenna okkone beltanjo aadheexxi belto ifikixxa bakka ciinceesse tolche. 14Tennenaa'ni kexxeexxa Abirihaami eettene bakkaka summa, «Duuchchi Woddik Gootti qixxeessan Yaahiwwe Yiri'e» hiyye summa fulche. Telchi qico'n «Mageni ifixxe kooba iima qixxeesaan» hiyyendaani.
15Langaxxanna Mageniink iimik erganjinna Abirihaamii iimii'n ye'eexxi, 16hiyyee qici, «Duuchchi Woddik Goottinna mitte atika belto anee hoyyedha gophpheettaxxennaa tenne assitettexxe ifi'n hiyye kakattanno qici, 17Dhugaaten atee eebbisanno; horte atixxanna iimixxe urjeshshannaa wodi'i qarqarike maanchishsha bira sa'issa'issannon. Horte atixxi naaphuwwa insa'neekika qachchuwwanna dhaaldaan. 18Hiyyichcho anka laqqettaxxee buttatik gosa gosak ardi duuchchi atixxe horte darre'n eebbisemaan.»
19Ookkoneechchi uduma Abirihaami ifike erganjuwwiba illee iima hige'na mitteba Bersaabehi'a me'ine. Abirihaaminna Bersaabehi ofo'le.
Nakoorixxa Labbaxxa Oose
20Tenne yaanuwwa uduma Abirihaami'n hiyyendee kulndee qic; «Kunnise Milkanna dayyo atikee Naakoori'a oose ildeen» hiyyende kulende. 21Milka ildeexxe labbaxxi oose: angafi Uutsii hiyyemeeke, dayyi isik Buuzi, Aaraamik anni Qemu'eeli, 22Kezaat, Hazo, Fiildaas, Yedilaafinna Betu'eeliten. 23Betu'eelinna Ribiqa hiyyendaaxxa belto i'le. Milka tenne saddeeta labbaxxa oose Abirihaamike dayyi'a Naakoori'a ilde. 24Re'umate hiyyendaaxxi Nakoorixxi shiixxooxxi are isi'a Xebahini, Gehamini, Tehashiininna Ma'ikaani hiyyendaaxxa labbaxxa oose isi'a ilde.
Currently Selected:
Dadatika Maxaafa 22: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
