Dadatika Maxaafa 21
21
Yisaaqixxa Ilensha
1Duuchchi Woddik Gootti hiyyemmashshanni Saara uude; uwwemmaxxa addachchiisanna ise'a muuxxe. 2Saaranna si'lawiteexxi eettene Mageni hiyyemmanxe yanna'n Abirihaami'a cimo isexxe'n labbaka belto ilde.#Ibr. 11:11. 3Abirihaaminna Saara isi'a ildemmaka belto Yisaaqi hiyye summa fulche. 4Abirihaami Mageni isoo ajajemaashshan, belto ifika Yisaaqii ilemeexxe saddeettixxe barra'n jila ofo'lishe.#Dada. 17:12; Erga. Huj. 7:8. 5Yisaaqi Abirihaami'a ilemaa wodda Abirihaamixxi wogga dhibbatemman. 6Saaranna, «Mageni ane oso'lannoxxe asseen; tennexxee tennee laqaak duuchchi aninni oso'laan» hite. 7Isenna lebbeexxi, «Saara oose ildee unuusitaan hiyyeexxi Abirihaami'n ayyete haaso'e ege'ne? Kunse cimo giddo labba belto isi'a ile'enneni» hite.
8Beltikinna nophphe unu'na waale; Abirihaaminna Yisaaqi nu'na waalexxa barra jabaxxa jila jile.
Aggaarixxannaa Isima'eelixxa Shorrensha
9Yaane kinni Saara Aggaar Gibtsichcho Abirihaami'a ildemmak belti oso'laa'naa affe. 10Ookkoo'n Saara Abirihaamii, «Tenne garbitte isenge beltinninni welt fugussi; tenne garbittek belti Yisaaqii anke beltinni welt karra dhaalabaan» hite.#Gel. 4:29-30.
11Belto ifike Isima'eelixxi tinni yaane Abirihaamii lumoshsha wixxirri assite. 12Mageninna Abirihaamii hiyyee qici, «Beltichchinxeenna atixxe erganjoxxee mee yaadi. Horte atixxi ye'endaak Yisaaqi darrenaa'nite kaddeemmaxxe'e Saara atee hitaaxxa duuchcha laqi.#Rom. 9:7; Ibr. 11:18. 13Atixxe erganjok beltinna atinge kaddeemmaxxe'e isoonna ardake assannon» hiyye.
14Abirihaami langa baro bariisa ke'e, shiixxoxxa itanna aadheexxi kollonjotike wodi'inni welti Aggaari'n dugummote'n dukiseexxi beltik welt me'itaashsha asse; isenna me'iteexxi Bersaabehixxe qiilla gammoojje'n jeekki hite. 15Kollonjote'n hedhemak wodi'inna mudee wodda belto ifika harumaake haqichchi mitti hunda uggite. 16Isenna «Belti anki ani uudaa'naa reyoqqe» hita'ni mogidi darbemeexxi mare geyamma qico bayyatte isike kallachcha'n ofolde; ookkonna hexxeexxi hiiqisse ooxxe.
17Mageninna beltiinxa oodhishsha laqe. Mageniink iimik Erganjinna#21:17 Mageniik Iimik ErganjiTenne bakka'n Mageniik Iimik Erganji hitaaxxi hiyya Mageni manji isoo'o hubataashsha leelle'e haaso'eemaxxee'e Mgeniinke erganjo hiyyende'een iimii'ni Aggaarii eyeexxi hiyyee qici, «Tee Aggaari maa kaddeete? Belti atiki irkatebaa hedhe oodhaa wodda Mageni laqedheen; tennexxe sodaattoxxe'e. 18Ani iso lumoke arda assaannaxxe'e kexxe marte belto atika buttii'n aaxxe luu'medhi» hiyye. 19Mageninna ille isexxa banee'naa wodi'iinxa bale affe; tennexxe marteexxi kollonjoke'ni wode'e wonshite belto ifike'n ha'wisse. 20Mageni kinna beltik welti hedhemman beltikinna nophpha'in dage. Isinna qiilla boga'ni ofo'le; adamatinna ege'nemeeke kade. 21Isinna Faaranixxe Qiilla gammoojje'n hedha'naa ama isixxi Gibtseke boginaa'n manjichcho mitte aadhisse.
Bersabehi Giddo Assendeexxa Weli'aaggo
22Ookkone sane Abemeleki ifike loliinke mannike ajajallo Fikoolinni welti Abirihaamibaa mareexxi, «Assitattoxxe yaane duuchchinni Mageni atinni hedheen.#Dada. 26:26. 23Yoona Aneenna anxa oose yookaani horte anxe duuchcha fuggoxxa assitabboxxoshsha amo Mageni edo ani'a kakati; ani addatensha anxa ati'a leellishenneshsha atinna tenne kaba keessummummati ofoldeettexxe yanna'ni ani'aanna anke bogike manni'a addatensha atixxa leellishshotta'a kakati» hiyye. 24Abirihaaminna isoo «Eloxxen Kakatunnun» hiyye 25Ookkoo'n Abirihaami Abemelekik erganjuwwi hunnat adhdhemmaxxe wodi'iinxe balexxe Abimelekii aallate. 26Abemelekinna «Tenne yaane ayyi iitta asseexxa ege'nebo'no; ani'a telchond laqa; atinna ane'n kuldeettabaan» hiyye. 27Ookkoneechchi uduma Abirihaami gedhebokanna lalo iyyedage Abemeleki'a uwwe; lamiingi weli aange kakante. 28Abirihaaminna gedhebi giddii'n torbaane goromme foye. 29Abemelekinna Abirihaamii'i, «Tennee torbaane gedhebiinxa goromme mayee footette?» Hiyye qore.
30Abrihaaminna, «Tenne torbaane wodi'iinxa bale qolta anxee dhugaa kaddo'a tenne torbaane gedhebiinxa goromme hii'i, anenaa'ni adhdhi» hiyye. 31Tennexxee iikki boonchi insa'ne lamiingi weli mitte afo'o kande kakanteemmaxxe bakka kaddeemmaxxe'e eettene bakkaka summi «Bersaabehi»#21:31 Bersaabehi: Ibritotike laagadinni Bersaabehi hiyya Bersheba'i hiyyate kaddaa wodda Torbaane wodi'iinxe bale yookaani kakotike wodi'ixxe bale hiyyaten. hiyyeme.
32Insa'ne weli aangeexxi Bersaabehi'n kakanteechchi uduma Abemelek ifike looliinke mannike ajajallo Fikoolinn welti Filisixeemike bogiba'a illee iima hinge me'ine. 33Abirihaaminna Bersaabehi'n «Temiir»#21:33 Temir: Hiyya hojja harumaake Temir hiyyemaake haqichchinaa'ni gargar hedhe haqichchon hiyyemaaka haqichcho kaasechchi uduma ookko bari barika Duuchchi Woddike Gootti summa ye'edhe. 34Abirihaaminna Filisixeemike bogi giddo keessummummati qeerraaxxa wogga ofo'le.
Currently Selected:
Dadatika Maxaafa 21: gdo
Highlight
Share
Compare
Copy
Want to have your highlights saved across all your devices? Sign up or sign in
The Word for the World International, The Word for the World Ethiopia
