Assitterika Maxaafa 3
3
Haamaa Yihudiinka Manna Shilchiisatee Diineeka Diina
1Tennee yaane uduma moyanji Arixxekisiissi Agaagichcho Hamaanene wele ja'laabuwwa duuchhanaa'n jabaka baallooma isi'a uwwa iso'o ulfeese. 2Moyanji isi'a tinni assendo'a ajajeemmaxxee moyanjiinxe hula'n hedheemmak mootummatik ja'laabuwwi duuchchi Hamaane guluffate anga iimi'a ke'isseexxi isoo ulfeessina'emman; Merdokiyoosi kinni isi'a wabbiyyeexxi ulfeessebaa.
3Moyanjiinxe hula'n hedhemmak moyanjiink erganjuwwi Merdokiyoosii, «Moyanjiinka ajaja mayee saxxatto?» hine isoo qorre. 4Tenneenna barra barra'ninni iso'n kula'emman; isi kinni insa'nee hineexxa adhdheba'a; isi Yihudichchoke kadeexxa insa'ne'n kul'eemmaxxe Merdokiyoosik adabi haaniqico'n iitta kada'n hedhaaxxa uundo'a hineexxi tennee Hamaane'ni kulle.
5Hamaaninna Merdokiyoosi wabbiyeexxi isoo ulfeessebaaxxa afee wodda lumoqica aare. 6Giddii'ninni Merdokiyoosi heene gosake manjo kadeexxa ege'nee wodda Merdokiyoosi callla shiya heenoxxe yaanesha uude; tennexxee Hamaane Arixxekisiissixxe moottumma duuchchi giddo afemaakanna Merdokiyoosixxe gosa kadeeka Ayihudoota duuchcha biro'a mala hase.
7Moyanji Arixxekisiissi moyaeexxe tommenna langeessoxxe wogga'n Nisaan hiyyemeeke takake agenjo'n barratanna agenjo gargar hiissatee fuur hiyyemeeka hixa Hamaane hedheeba ibinse; hixikinna Adaar hiyyemaake tommenna langeesso agenjo'n ibe. 8Ookkonnechii uduma Hamaane moyanjo Arixxekisiissi hiyyee qici: «Gosa gosake ardi giddo atixxe mootummake awuraaja duuchcha'n xeereme hedheek mitte gosake arda hedheen; kunni ardinna wele gosake arda duuchchanaa'n gargar hedheeka galduma afeekenna moyanjiinke seeri'anna ajajemakebaan; ati moyanji konne arda'n sammi hyya eldaba'a. 9Tinni yaane atee moyanjo gamachisa'neexxe kaddoole konnee arda biratee lallabi fulowaal; aninna tennee yaane muuxaake manni'a kadaaka tomme kuma mekiliite birret sibljo mootummatike maallaqiinke mine'n aassannon.»
10Tennexxe moyanji ifixxe qubeka maxxansa qubbatenaa'n fulcheexxi Yihudootiinke naapha kadeeke agaagichcho Hamadaatike belto Hamaane'a uwwe. 11Moyanjikinna, «Maallaqa ookkonni abiddettexxi ardake'n eetettexa assi» hiyye. 12Ookkoneechchi uduma siretike agenjixxe tommenna sakkeessoxxe barra'n moyanjiink borreessati manni ye'eme; insa'nenna Hamaaneka ajaja duuchcha awuraajji awuraajjixxe borreessanninna ardi ardike laagadinni moyanjiinke ja'laabuwwi'a, gargar gargar hedheeke awuraajjiinke gallachalluwwi'anna gargar hedheeke ardiike hayyichchuwwi'a borreessine; tiinni borreessanna borreesendeek umo isike moyanjo Arixxekisiissike summinnite kaddaa wodda, maxxansendeekinna umo isike maxxansinidemman. 13Adaar hiyyemeeke tommenna langeessoke agenjixxe tommenna ondeessoxxe barra'n oose geerchi, meyya labbake hiyyendebaang Ayihudooti duuchchi eettene barra'ninni mundaashsha, shiyemmaashshanna kuttinaashsha, karra insa'neexxinna mulqendaashsha borro moyanjiinke awuraajuwwa duuchcha'ni erganjuwwake'n ergende. 14Mitte mittenge awuraajjiinke arda'n ege'nendo'a insa'nenna eettene barraa qixxeefantaashsha umo lallabixxi kopee fuldeexxi mitti mittenge awuraajjibaa ergendaashsha assende. 15Erganjuwwikinna moyanjiinke ajajinni wiinamik fulle; lallabikinna Suusake qachcha'n lallabeme; moyanjikinna Hamaane ha'watee offolle. Suusaik qachchi kinni weekemeemman.
Currently Selected:
Assitterika Maxaafa 3: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia