Assitterika Maxaafa 2
2
Asteeri Mootitte Kadde
1Ookkoneechchi uduma moyanji Arixxekisiissixxi aare qiiddeechchi uduma mootitte Asixxini isoo assiteexxa yaanenna isi ise'n mureemmaxxa yaane hede. 2Tennexxee moyanjiink shiqik erganjuwwi iso'o, «Danchalli dubarruwwi ati'a hasemowwaal. 3Ookkone danchallamma dubarruwwa duuchcha Suusake qachchi giddo hedheeke gargar hedheeke filendeexxi melaalle hexxaake mi'ne'n iyyedangaashsha ati moyanji atixxe galcha giddo hedheeke awuraajjuwwa duuchcha'n baalloomiinka manna baalloonse; kunni dubarruwwinna melaalle uuddaaxxe yaaneeke umo kadeemmake Hegaayike baalloomixxe galcha hunda kandowwaal. 4Ookkoneechchi uduma atee moyanjo gammachchiissaaxxi dubarrichcho mootitte Asixxinixxe bakka'n mootitte kaddaashsha assi.»
Moyanjikinna kunni yaadi eloke kadeexxa afeexxi hiyyendemmashshanni asse.
5Ookko Suusake qachcha'ni hedhaamak Merdokiyoosi hinaak mitti manjichchi hedheman; isinna Iyya'eerike belto kadaa wodda Biiniyaamixxe gosanaa'ni Qiisikenna Shimee'ixxe hortenaa'nitemman. Anni isik Iyya'eerinna Qiisike beltomman. 6Isinna Baabiloonik moyanji Naabukedenetsoori booji'eemmake Yihudiinke moyanjo Ikkooniyaani welt booji'emeemmake manninni welt Iyyerusaaleminaa'n booji'emeekemman.#2 Moy. 24:10-16; 2 Odo. 36:10. 7Merdokiyoosinna mitte Hadaasa hiyyendaaxxa isenna annakanna ama affeemaxxxee'e isee nossedheek isondemman. Asiterr hiyyende ye'enda'neexxi tinni dubarichcho dhaggati gelteexxe dancha dubarrichchomaan; anikinna ama isexxi renneemmaxxee Merdokiyoosi isee ifixxe beltoshsha kookise nossa'emman. 8Moyanjiink ajajinna lallabi fuleemma wodda heddi dubarri Suusake qachchibaa adhdhemeexxi Hegayixxe galcha hunda uggemme; Asiteerinna mootummatike miniba'a adhdhendeexxi mellaalletike heqqanjo Hegayixxe anga'n maganneti uwwende. 9Tinni dubarichchonna Heegee gammachchiisseexxi isi eddo elle alfite; isinna ifi danchoossinamaalchuuwa gargar hexxeexxa ita iikki woddi ise'a uwwe. Mootummatike minenaa'n filendeexxa torbaane meyyaxxa erganjuwwa ise'a ergatendaashsha murreexxi iseenna tenne isexxe meyyaxxe erganjuwwanni welti filemeeke mootummatike minike melaalletike minibaa me'ise. 10Merdokiyoosi haasottabaashsha Asiteeri'i hoyyeemmaxxe ise heene bogixxenna heene gosaxxe manjo kaddeexxa haasotteemmabaa. 11Merdokiyoosinna Asteeri maa kaddeexxanna edi'anna ise'n mayi kadaaxxa ege'natee barra barra'n melaalletike minike ba'linnike kallachcha'n mammarema'emman. 12Mitte dubarrichcho moyanjo Arixxekisiissibaa e'yatee isexxi bado geltebaa edidarre jaane agenjo karbetixxe zayitenni, higgeenna jaane agenjo gargar hexeexxa shittoora issata'ninna gargar gargar hexxeexxe albiinxe hexxeexxe ca'a assaachchuwwinni danchoondaani; tennee yaanuwwa tommenna lame agenji'a assiyyo ise'a hasissaan. 13Tenne aada assiteexxi moyanjiinbaa e'yitaxxe kadda wodda, isenna dubarte hexxammake minenaa'n moyanjiinke mowetike miniba'a me'ita wodda adhdhito'a hassaaxxa heene yaanuwwa duuchchi ise'a uwwenda'emman. 14Bogi hashsha wodda ookko me'itaan; bogikinna soodaa wodda higgeexxi dubarte uuddaaxxe yaane'n umo kadeemmake moyanjik middisa Sha'ashigaazixxe heqqa hunda hedheeke wele dubartetike heeqematike minibaa illeema higga'emman; moyanji ise'n gammadeexxe ise summik ya'aaxxe kadda gophphoole langaxxa moyanjiinbaa illeema higge dagaba'a. 15Merdokiyoosi ifixxe beltoshsha nossedheemmaxxe isike annika dayyo Abihayi'eelixxi belto Asteeri moyanjiinbaa martaaxxi yanna geltaa wodda dubartetik heqqatike minik umo kadeemmak Hegayi ise'n kuleemmaxxa malee ise wele mittelchonna laqexxeba'a; Asteeri isee uudaak duuchchi edo elle alfite. 16Arixxekisiissi moyeexxe torbeessoxxe woggake Teebeeti hiyyemeeke tommeessoke agenjo'n Asteeri moyetike minibaa adhdhende. 17Ookkone wodda moyanji wele dubarte caala Asteerii eeyye; wele dubarri caalanna isi edo gaachannakanna elle alfite. Tennexxee mootittummatikaa kallachcha umo isike'n ugge; isenna Asixxinixxe bakka'n mootitte asse. 18Ookkonechchi uduma moyanji Asteerike ulfinnixxee ifike ja'laabuwwi'anna ifike erganjuwwi duuchchi'a jabaxxa ita ha'wa qixxeesse; moyanjumma ifixxixxe qixxe'n uwwatanna qoode.
Merdokiyosi Moyanjo Anjireexxa
19Iikki dubarri langaxxa yanna bukki hiyeexxi hedhe'na'a Merdokiyoosi moyanjiinxe hula edo offo'leemman. 20Asteeri kinni Merdokiyoosi ise'n kuleemma qicishsha ise heene gosaxxenna hoone bogixxe manjo kaddeexxa sho'exxeemman; tinninna kaddeechchi Merdokiyoosi isee nosa'emma wodda assita'emmashshanna ta'anna isika gorsa adhdhite assita'emaxxeeten. 21Merdokiyoosi moyanjiinxe hula edo ofo'leexxi hedhee'na'a eettene hula heqa'emake loliinke mannike akeekisanjuwwanaa'n Gebetaanna Taara mufanteexxi moyanjo Arixxekisiissi'i shiayate mudhdhine. 22Merdokiyoosinna teenne shiyatixxa mari'e afeexxi mootitte Asteeri'n kule; isenna tennee yaane Merdokiyoosinaa'n laqqeexxa moyanjoke'n ifisse kulde. 23Tinni yaanenna qorqorende qulleessendee wodda dhugootte afende; kunni lamiing ja'laabuwwi fannisemme; tinni duuchchi moyanji edo jirtetike maxaafa'n borreesende.
Currently Selected:
Assitterika Maxaafa 2: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia