Assitterika Maxaafa 4
4
Merdokiyoos Asteerika Gargaarsa Laqedheexxa
1Merdokiyoosi assendeexxa duuchcha ege'ne wodda, seemma ifixxa dare; ookkoneechchi uduma jooniyya oddo'weexxi ifike umi hana bululo fiffilxeexxi hafuura gikki asseexxi hiiqise oodha'n ookkone qachchi giddi'a me'e. 2Yaaddotixxa seemma oddo'weeki e'yaashsha isi'a eeti uwwema gophenda'emmaxxee isi me'eek moyanjiinxe hula qico callamman. 3Moyanjiink lallabinna ajaji geyeeke qachcha duucha'n Ayihudooti giddo jabaxxe yaaddo kadde; insa'ne agabo goddo honse; oo'ne, hunbaashshine; insa'neek heddi manninna bululoke'n diinphe.
4Asteeri'a ergatendaammaxxi dubartenna isek middisuwwi dageexxi Merdokiyoosixxa ise'n kulle wodda ise lumoo qica yaadde; isenna isi'a yaaddotixxe seemmaxxa bakka oddowendaaxxa seemma isi'a ergite; isi kinni tenne seemma adhdheba'a. 5Ookkonechchi uduma Aseteri moyanjiinke middisuwwi giddiii'n ise'a ergatemo'a uwwemeemmaka Hataaki yexxeexxi Merdokiyoosi'n gelteexxi rakko maachcho kaddeexxanna mayiinxe yaane'a iitta kaddeexxa wo'maashsha isoo ergite. 6Tennexxee Hataak moyanjiinxe hula edidarre hedheeke ookkone qachchike ballinnibaa Merdokiyoosibaa alalle mare. 7Merdokiyoosi'n kaddeexxa yaane duuchcha iittanni Hamaane Yihudika arda duuchcha biratee moyanjiinke maallaqiinke mine'n aasso'a haaso'emmak mallaqi hitteeke kadeexxa duuchcha iso'n kule. 8Ayihudoota biratee Suusa qachchi giddo fuldeemmaxxe umo borreessaxxa koppenna Asteeri'ni leellishenna tenne ifiseexxi ise'n kulaashsha iso'n uwwe; isenna moyanjiinbaa e'yiteexxi ifike ardixee isoo kadhataashsha jabeesseexxi ise'n kulaashsha xexxe'achchiise. 9Hataakinna illee iima higeexxi Merdokiyoosi iso'n kuleexxa duuchcha Asteeri'ni ege'nishe. 10Asiterinna Merdokiyoosi'n ku'lta'n kuldee qici, 11«Moyanjiinke garbuwwinna moyanjiinke awuraajjuwwa'n hedheek ardi duuchchi labbakenna kadi dubarte, ayyinna ye'emebaak moyanji hedheeke giddike ba'linnibaa e'yaak moyanji mitte seera calla afe'exxa ege'neennen; kunninna iitta asseek manji shiyemaan; mitti manji iitta hexxeexxe reyonaa'n gataak moyanji ifixxa worqetixxa zange isiba'a diriirsoole callanni; ani kinni moyanjiinbaa e'yonnaa ye'emeennexxenni sase tomme barra iimi darre kaddeen.» 12Asteeriki hiyyichchi merdokiyoosi'n kulemeexxa yanna, 13Konnechchi butti'a hedheeka hissichcho ise'n hiyye ergee qici, «Ati moyanjiinke mine'n hexxeetexxe calla weli Yihudink ardi mudaa wodda ati gattaattolchcho ate'ni labboqqe'e. 14Eettenee yanna ati sammitottole Yihudootakee gargaarsikinna anjirensha welbaa'n daggabaan; atinna atike annike mini hadi kinni baxxinaan; yaane kinni ati mootitte kaddeetelchchi iitta hexxeexxe yana'a kadduu aate ege'ne.» 15Ookkoneechchi uduma Asteeri Merdokiyoosi'n konnechchi butti'a hedheeka hiissichcho hita'n ergitee qici: 16«Martettexxi Suusake qachcha'n hedheeka Ayihudoota duuchcha mitteba bukki assi, anxeenna agabo goddo hosse; hashshanna barra sase barraa itinoqqe'e ha'witinoqqe'e; aninna ani'a ergatendammaxxi dubarte ha'no assitinemmashshanni no'onna agabo goddo he'nannon; tinni kaddeechchi uduma kinni yaane fedhee qiconna seeri gadho kaddeexxe kaddooole moyanjiinbaa marannon; ba'onnolenna ba'unnuni.» 17Tennexxee Merdokiyoosinna mareexxi Asteerika ajaja duuchchanna muuxe.
The Word for the World International, The Word for the World Ethiopia