Ergameeyyetixxa Huje 1
1
1Ulfeessende'eteke Tewofiloosi!#Luq. 1:1-4.
Yessuusi hujeteenna barrachchiisatee safeexxa yaane duuchcha ediseeke anke maxaafa'n borreesseennen. 2Borreessennekinna Yessuusi iimi'a adhdhemmaqico'n fi'leemmaxxe ergameeyye'a Woyyichchi Hafuuri darree'n insa'ne'a uwwemmake ajajan. 3Isi heddo rakko adhdhe reye ke'eechchi uduma hedhotike kadeexxa heddo orinni insa'ne'n kokeesse; shoole tomme barra duuchcha insa'ne'n leella'n Mageniixxa mootummaxxee insa'nee barachchiise. 4Insa'nenni welti hedhemma wodda hiyyeexxi insa'nee ajajee qici, «Ani kule'naa laqinemmaxxa Annakenaa'ni uwwendeexxa addachchiisa adhdhitinaa qico heqqedhdhe malee Iyyerusaaleminaa'n fuldinoqqe'e.#Luq. 24:29. 5Yohaannisi wode'eke'n ha'noo xammaqeen; yaane kinni shiixoxxe barra uduma Woyyichchi Hafuurinni xammaqendinaan» hiyye.#Mat. 3:11; Mar. 1:8; Luq. 3:16; Yoh. 1:3.
Yessuusi Iimi'a Me'e
(Mar. 16:19-20; Luq. 24:50-53)
6Hordofeeyye Yessuusinni welti bukki hitee wodda, «Goottaa mootumma Isira'eeli'a illee iima hiissitattoxxi yanna ta'atee?» hite isoo qorte. 7Yessuusinna insa'ne'ni hiyyeexxi hiissee qici, «Anni baallooma ifikenni mureexxa yannanna baro egendino'a ha'no'a uwwendeba'an. 8Yaane kinni Woyyichchi Hafuuri ha'no'n dirraa wodda hunna adhdhitinaan; eettne yanna Iyyerusaalemi'n Yihudake boga duuchcha'n Semaariya'ninna buttatixxe gabala duuchcha'n dhugaa kula anxe kaddinaan»#Mat. 28:19; Mar. 16:15; Luq. 24:47-48. hiyye.
9Tenne hiyyeechchi uduma insa'ne uunda'naanni iimi'a adhdheme; duumanchikinna ille insa'nexxenaa'ni isoo sho'e.#Mar. 16:19; Luq. 24:50-51.
10Isi iimi'a adhdhemee wodda insa'nee iimi'a dhaphphi hine unda'neegge'ni golalamma seemma oddo'weeke lami manni insa'ne bira uurreexxi, 11Insa'nee, «Ha'no Geliilake mannaa iimi'a uudina'n mayeete uurritine'neek? Kunni uudina'naa iimi'a adhdheemeek Yessuusi iimi'a adhdhemena'a uudinemma qicinninni iittan illee iima higee dagaan.»
Yihudaxxe Bakka'n Maatiyaasi Filemeexxa
(Far. 109:8)
12Ookkoneechchi uduma ergameeyye Debire zeyitixxe koobanaa'n Iyyerusaalemi'a illee iima higge. Tinni koobanna Iyyerusaaleminaa'n edike sanbatike#1:12 Edike sanbatik or mitte kiilo meetire calla bayyataan ori qico bayyataaxxemman. 13Iyyerusaaleminna dangeexxi he'naammaxxe fooqe iimi'a da'mine. Insa'nenna Pheexiroosi, Yohaannisi, Ya'iqoobi, Indiryaasi, Filiphphoosi, Toomaasi, Bertelomewoosi, Maatoosi, Ilfiyoosik belt Ya'iqoobi hinaafalli Simi'ooninna Ya'iqoobike belto Yihudatemman.#Mat. 10:2-4; Mar. 3:16-19; Luq. 6:14-16. 14Kunni duuchchingi duuchchi wodda soodachchotee'e bukki hiyyaamman; insa'nenni welt mitte mitte melaalle, Yessuusixxi ama Maaraminna Yessuusik dayyuwwi hedhemman. 15Eettene yanna Pheexiroosi dhibbanna lamme tomme qicixxe ammanexxe oddo'ni uurrexxi hiyyee qici: 16«Anke dayyuwwa Yessuusi'i abideemmake mannik akeekallo kadeemmake Yihudaxxee Woyyichchi Hafuuri Daawwitike afo'o'n haaso'eemmak woyyichchi maxaafik hiyyichchi muuxema hasissamman, 17Yihuda no'onaa'n mittinsha lakko'emeexxi tenne ergatensha no'onni ergatema'neemman.» 18Yaane kinni kunni manjichchi ifixxe fuggoxxe hujenni alfeeke maalaqinni boga hidhdhe: albikinna gonbiseemeexxi godoba dareme; qochchummi isikinna lo'o hiyye.#Mat. 27:3-8. 19Tinni yaanenna Iyyerusaalemi giddo hedhemmake manna duuchcha'ni ege'nende. Tennexxee iikki bogi insa'neke laagadinni Akeldaama hiyyeme; tika isexxinna Mundeti bogan hiyyaten.
20Pheexxiroosinna lebeexxi hiyyee qici, «Tinninna kaddeechchi faarotike maxaafa'n,
« ‹Isixxi bakka onake kaddowwaali;
ayyinna ookko hedhoqqe'e,› higgenni,
‹Ittanni baallooma isika weli manji adhdhowwaal!›
hiyyendexxi borreessendemmaxxeten.#Far. 69:25; 109:8.
21Tennexxee Gootti Yessuusi no'oxxe oddo'ni mammaremmammaxxa yanna duuchcha no'onni welti hedhemmake manninaa'ni, 22iitanni Yohaannisike ximmaqattixxe yannanaa'ni safee Gootti Yessuusi iimi'a adhdhemeexxe barra qico'n no'onni welti hedhemmake konne manni giddii'ni mitti no'onni welti isixxe ke'axxe dhugaa kula kada hasissaan.»#Mat. 3; 16; Mar. 1:9; 16:19; Luq. 3:21; 24:51.
23Tennexxee insa'ne lame manna shiqinshe; kunniirinna Bersiyaan, yookaan Iyyosixoosi hiyyemmaaka Yooseefinna Maatiyaasitemman. 24Ookkonneechchinni uduma insa'ne hina'n soodantee qici, «Manji duuchchixxa qalbe egendetteke Goottaa! Konne lame manninaa'ni ati ayyee fildettexxa no'o'ni egee'nish! 25Yihuda ifike boonchiba'a me'atee waaleexxe ergatensha'ninna ergameeyyumma'n isoo baaloons.» 26Ookkonneechchi uduma hixa ibinsee wodda hixi Maatiyaasi'n ibe; tennexxe isi eettene tommenna mitte ergameeyyenni welti laakko'eme.
Currently Selected:
Ergameeyyetixxa Huje 1: gdo
Highlight
Copy
Compare
Share
Want to have your highlights saved across all your devices? Sign up or sign in
The Word for the World International, The Word for the World Ethiopia
