Mat 22
22
Terrta dø ngart mad'n ða mburr taana lo ngonïn
(Oo Luk 14:16 teen 24)
1Jeju tel ða eld ta kï terrtag gog tø. 2Kõþe kï dørãgt tit kï ngar mad'n ða mburr taana lo ngonïn. 3La þerg lon kad kunïn deg'n ndeend kï lo mburr taanat. Na geen ðe al. 4La þer madg kïðang tø, kad kunïnd anan: Oon be. M'ða go mburr taana woi; m'ja kø bøw mangg lom kï dãg lom kï ndambool, nyag i kï ðago woi, i ðen lo mburr taanat. 5Na oon kï tidt al, unïn ðøb lod awïn, kïkïða aw kam ndøøt lon, kïmad aw lo ða gat't lon. 6Kïmadg høn þerg ðan sed nyag kï to to, na tølïnd. 7Ngar þawong, la þut ngéðøøg lon, kad nujïn ngétøldeg nõ, na ndan horr þebot lod. 8Kamla el þerg lon an: Mburr taana i kï ðago woi, na îgïn kunïnd ye asïn taa al. 9Awïn kï dø tøðobg, na deg tube'n i ngahnd i kunïnd kï lo mburr taanat. 10Þerg'n non awïn kï dø ðøbg, na kawïn deg kïmaj, kï kïmajal tube'n ngahnd. Kamkuj þakot kï ngéðe lo mburr taanat. 11Ngar ud kuju kad n'oo ngéðe lo mburr taanat, na oo de mad ndï nõ, kï la kub mburr taana al. 12Ela an: Madïm titbãi þai hã and nëbe kïkanj la kub mburr taana a? De'n non ndï gon mbo. 13Kamla ngar el ngan ngékïlag lon an: I døøn nja kï jia i lana ne kïtïga kam tilt, nu la a nõt ho, a dõ ngangïnt ho ye. 14Kïtø kï kun'g în ngãibe, na kï mbedg în tëbe.
Parisïg kï deg lo Herod ndïjen ta Jeju dø ba lambot
15Kamla Parisïg aw øjïn na ta kad kï'n høna kï gum ta kï taat. 16Lan ngéndoog lod kï deg lo Herod ro Jejut kad elïna anan: Ngendoo deg, kï ger kad î de kï rota, na i ndï i ndoo deg ðob lo Luwah kï rotagt, kïkanj þool kum de mad, kïta i ndï ørr de dene al. 17Kïtø 'nten elj ta gaai: I goðobat a ke i goðobat al kad gan lambo Sejar?
18Na Jeju ger ndando lod, ad el an: Ngéndokum deg. Kïtøði i ndï i namïn ne a? 19I damïn nar'n a i gan ne lambo.
Ðen kï sile adïna. 20Eld an: Ndil dø de, kï takïndang dø silet 'nten ye, i lo nõ a?
21Turïna anan: I lo Sejar.
Kamla Jeju eld an: Nya'n i lo Sejar a ne, sumba kad adïn Sejar, na nya'n i lo Luwah a ne, adïn Luwah ho.
22Lon oon dø tag 'nten ye, ta yad biw, ad nyana, na awïn.
Sadukig ndïjen Jeju ta dø þai ngékoit
(Oo Mrk 12:1 teen 7; Luk 20:27 teen 40)
23Ndøt'n non Saduki madg ðen ro Jejut. Sadukig ndï anan þai ngékoig goto. Ndïjena ta anan: 24Ngendoo deg, Moij el an: Îla de mad oi kanj ngah ngan'g a ne, ngonkõa a taa nëa kad ndan koh ngonkõ. 25Na tag maði kam þet loj ngankõnag în tanãimïta; kïdasa taa dekïdë na oi, na tit ka'n hã ngona goto ye, nya nën ad ngonkõ; 26na titbe kï ngekõjoo, kï ngekõmïta, mbã kï ngekõ tanãimïta ðe oi tø. 27Gog godt tube dekïdë oi ho. 28Ye, ndø þai ngékoigt, dekïdë'n non a i në nõ, ku degt kïtanãimïta kïta tube taana nëdt.
29Jeju turd an: I ndõmïn, kïta i gerïn tag kïndang lo Luwah al, ke tøg Luwah al tø. 30Ndø þai ngékoigt ye, dekïdïngãg a taan dekïdëg al, dekïdëg a taan ngawg al ho, na a în tit malaikag kam dørãt. 31Na ta þai ngékøig ye, i dan ta'n Luwah elsï kam maktubt ye ale? An: 32Mî Luwah lo Abraham, Luwah lo Isaak kï Luwah lo Jakob. Luwah i Luwah lo ngékoig al, na i Luwah lo ngékumkajirg.
33Bakad koosïg'n oon dø nyandoo lo Jeju ye, ta yad.
Mberkïnda kïbo tøi kïmadg
(Oo Mrk 12:28 teen 34; Luk 10:25 teen 37)
34Lon Parisïg oon kad Jeju nda ta Sadukig nat ye, kawïn na kïnat. 35Na kïkïða kudt, i ngeger mberkïndag, ndïjea ta kï'n nán an: 36Ngendoodeg, mberkïnda kï ða hã i kïbo tøi kam mberkïndat lo Moij a?
37Jeju tura an: A i tar Bïraþe Luwah loi kï ngarkami tube, kï roi tube, kï tagahi tube. 38Îla i mberkïnda kïdasa ho, i kïbo tøi ho ye. 39Kï kõjoo kï tit sia la ten: A i tar madþei tit roi be. 40Mberkïnda kïjoo 'nten la girr mberkïnda lo Moij kï takel ngékelta kï ta Luwaht tube ndï teen tit ye.
Ta lo Krist kï Ngon Dabid
(Oo Mrk 12:35 teen 37; Luk 20:41 teen 44)
41Lon Parisïg kawïn na kï nat ye, Jeju ndïjed ta an: 42Tagahsï i ði dø Krist't a? I Ngon nõ a?
Turïna anan: I Ngon Dabid.
43Jeju eld an: Titbãi hã Ndil øsï Dabid ad kuna Bïraþe? Lon elïn an:
44Bïraþe el Bïraþe lom an:
I ndï kojikomt,
mbã kad m'la madngétaig girr njait a?
45Îla Dabid kuna Bïraþe a ne, titbãi i ngona a?
46De mad kï asï tura ta mad goto. Ndøat nu nõ de mad kï ire kamïn na ndïjea ta gog goto.
BIBLE MBAÏ © 1980 Alliance Biblique du Tchad.