Matayo 4

Setani mbù Yesu ónga

(Mak 1:12-13; Lwk 4:1-13)

1Fú ddiy-dzzdjú, Bblǒ Thíy ddà Yesu djùkpa ɦiy nì nga ò, ndaní Setani mbǔ à ónga. 2Yesu dêy nzá ndèy nyù nga ní ddu drì-drínga tho nì dhò. Fú ddiy-dzzdjú, ɦùw lòw déy à njèy.

3Li-ónga mbùdha-dja shì ndèymí à tdrà à dhò, “Ya nyi nì Ddrà mí Ddùwnì, tdra í djuw dhò à lí ndèy nyû ní.”

4Yesu kâ lò ngù, “À ndîy ndèy Ddrǎ-ngá ndíydha-ní-lò ó, ‘Bbalè rà dey ngǎ nyû nà chúddì, chú lò wá cha ndèy shì Ddrà tsò-róddù nì nà.’#4:4 Yǎdha 8:3.”

5Fú ddiy-dzzdjú, Setani ddà à djùkpa Yerusalemu mí thí ní ddrǒngó ní bba ò, ndèymí à lêy à dèy ru ka ss̀ nì Yahuddi-ddúw dhí Ddrà nzz̀dha mí thí ní dza djú nga ó. 6À tdrà à dho, “Ya nyi nì Ddrà mí Ddùwnì, ngbo nyi bbi nyiníddò, ddiydhò à ndîy ndèy Ddrǎ-ngá ndíydha-ní-lò ó,

“ ‘Ddrà rà jà nděyngá malayika-kpà dhò ndrǔ pbǒ nyi rónga,

ndèymí ndrǔ rà nyi tdúw ì-dhokpa ó,

ndaní nzǐ nyi pběy nyi-koko djuw ró.’#4:6 Ngwo-kpà 91:11-12.”

7Chú Yesu ngù lò à dhò, “À ndîy ndèy ddí Ddrǎ-ngá ndíydha-ní-lò ó, ‘Nzǐ mbu Ddrǒngóli nyìmí Ddrà ónga.’#4:7 Yǎdha 6:16.”

8Setani mbà à ru pléy nì ngòw djò ddíyàchú ndèymí à dhò tdè à dhò wánì dziylíy djú pey-mí-nga ndèymí ndrǔdhí ddrǒngó-ní-nga nà ddí. 9Setani tdrà à dhò, “Ma rà í ddiy wánì bbù nyi dhò, ya nyi rà nyi tdyòw-tey kwò bbi ma dhò ro.”

10Yesu kâ tdrà à dhò, “Setani, ra gu ma róddù. À ndîy ndèy Ddrǎ-ngá ndíydha-ní-lò ó, ‘Bbú ddrǒngó-ní-nga nyìmí Ddrǒngóli Ddrà dho ndèymí njey à dhò chúddì!’#4:10 Yǎdha 6:13.”

11Fú ddiy-dzzdjú, Setani kâ à bbà ndèymí malayika-kpà kâ shì à tsotso-kwódha dhò.

Yesu ngà tdè ndèymí njí tsò Galilaya mí ngòw óddù

(Mak 1:14-15; Lwk 4:14-15)

12Yesu rr̀ tdè Yohana Bàtízò bbúdha-dja ka lêy ngiy-dzà ò ro, à kâ rà Galilaya mí ngòw ò. 13Fúlè Galilaya ò, à dêy nzá Nazareti mí ddrǒngó ní bba ó, chú à rà dey Kapernawumu mí ddrǒngó ní bba ò, Galilaya mí ju-ddà tsò-ró ddrǒngó ní bba, cha ndèy tdè Zebulun ndèymí Naftali mí ngòw ó nì. 14Í ddiy njèy ndèy, ndaní ndruní nabi Isaya tdrà nì lò shǐ dìchú,

15“Nyì rr, Zebulun mí ngòw ó bbalè ndèymí Naftali mí nà,

ddrǒngó ní ju-ddà mí tuw, Yorddani mí pbèydha ní ju-ddà mí dzi nì,

Galilaya, ngǎ ì nì Yahuddi-ddúw ní nì ndrǔ dhí bba!

16Nyì cha nyì nì dey kúw ní nga ó nì bbalè,

nyì rà ddrǒngó ní kàdha njà.

Nyì nì dey ndèy tèy nì dhi mí dziylíy ó nì ndrǔ,

kadha rà ka nyì djú.”#4:16 Isaya 9:1,2.

17Fú ddu óddù Yesu lòw dey Ddrà mí lò-ɦéy tdrà, “Nyì lí nyì dha rónga nyìdhí cherr óddù, ddiydhò rakpa mí pey-mí-nga nì chow!”

Yesu îy tdè tho nì bbì lówdha-djá dyǒw ndèy

(Mak 1:16-20; Lwk 5:1-11)

18Yesu tdè bbiy Galilaya mí ju-ddà tsò-rò luw ro, à njà rwo nì kpa, Simoni cha ka îy tdè Petro ní nì, ndèymí djûnì Anderiya nà. Ndrǔ tdè njǒw ngbǒ ju-ddà ò, ddiydhò ndrǔ tdè bbì lówdha-djá. 19Yesu tdrà ndrǔ dhò, “Nyì ra ma nà, ma rà nyì gwiy bbalè mèydha nà, gbè nyì tdè bbì lówdha-djá níchú.” 20Ndùwndùw ndrǔ bbà ìdhí njǒw ndèymí ndrǔ rà à nà.

21Yesu rà tdè drá njitsò djò ro, à njà njaddí rwo nì kpa, Yakobbo màgò djûnì Yohana nà, Zibiddayo mí ddúwní. Ndrǔ tdè ngǒ ó ì dhí djǎnì mà nà cha ì nì ídhí njǒw thǐ ddiy nà. Yesu îy ndrǔ ndèy dè. 22Ndùwndùw ndrǔ bbà ngǒ ndèymí ìdhí djǎnì nà, ndrǔ kâ à dyòw.

Yesu djì tdè dhi nà nì bbalè rónga

(Lwk 6:17-19)

23Yesu tdè bbiy Galilaya mí ngòw òluw wá, li-gwíydha nà Yahuddi-ddúw dhí njuwdha-dzà òluw ndèymí Hwî mí Lò-ɦéy tdràdha nà rakpa mí pey-mí-nga mí lò ró, ndèymí à djì ndèy tsûw bbalè ró nì dhi jì-kpà ndèymí li-rónga ndéydha nà. 24À ɦuwdjò ddrr̀ Shami mí ngòw òluw wá ndèymí ngéy-ngéy ní dhi jì nà nì bbalè ka mbà tdè à dè. Ndrǔ kàó njàddí bbalè tdè che thíy nà, lílí, ndèymí nzǐ ì nì bbiy nì bbalè. Yesu lêy ndrǔ rónga djì wá. 25Bíy ní bbalè dyòw à, ndrǔ shì tdè Galilaya mí ngòw óddù, Dekapoli, Yerusalemu, Yuddeya ndèymí Yorddani mí pbèydha ní ju-ddà mí dzi nì nga óddù ddí.

Currently Selected:

Matayo 4: NDRULO

Highlight

Copy