Matayo 3

Yohana Bàtízò bbúdha-dja ngá lò-gwíydha

(Mak 1:1-8; Lwk 3:1-18; Yoh 1:19-28)

1Bíy ní cho dzzdjú, Yohana Bàtízò bbúdha-dja shì Yuddeya mí ɦiy ní nga ò ndèymí à lòw dey Ddrà mí lò-ɦéy tdrà. 2À tdrà, “Nyì lí nyì-dhà rónga nyìdhí cherr óddù, ddiydhò rakpa mí pey-mí-nga nì chow.”#3:2 Rakpa mí pey-mí-nga nì chow à nì ddìkàddì í ddiy nà Ddrà mí pey mí nga nà. Ngèy ní lò dhò nja, klǒw ní lò ndèy tey nà. 3Yohana tdè cha nabi Isaya tdrà tdè ndèy ró lò nì li. À tdrà,

“Li rò nì nga jǒw ɦiy ní nga ó,

‘Nyì thi tuw Ddrǒngóli dhò,

nyì thi à ko ró tuw chěy.’”#3:3 Isaya 40:3.

4Yohana ró rù ka thì tdè ngàmíyà ró ɦěy nà, ndèymí à chey tdè ndèy vèytey shí ngìy nà. Àmí nyû tdè njuw ndèymí tsó téy tey-ddà nà. 5Yerusalemu mí ddrǒngó ní bba ó bbalè, Yuddeya mí ngòw dzò ó ndrǔ ndèymí Yorddani mí pbèydha ní ju-ddà gitéy bbalè wá rà à dè. 6Ndrǔ kwô ìdhí cherr, à bbû ndrǔ dhò bàtízò Yorddani mí pbèydha ní ju-ddà ó.

7Yohana njà tdè bíy nì Farisayo ní kpa ndèymí Saddukayo ní kpa#3:7 Farisayo ní kpa ndèymí Saddukayo ní kpa nà tdè ngúw rwo ddǐnì djùkpa ddàdha-djá mî Yahuddi-ddúw kàó. Njàddí lò dhò nja, Klǒw ní lò ndèy tey nà. nà nì rǎ ndèy dè bàtízò lòw ro, à kâ tdrà ndrǔ dhò, “Nyì ngìydhá ó ddèy. Áyì tdrǎ ndey nyì dhò nyì kǒw ndèy rà shi nì Ddrà mí vey róddù? 8Nyì njey cha ndèy rà dhò nyì lî nyì-dhà rónga nyìdhí cherr óddù nì ddiy. 9Ndèymí nzǐ nyì ddéy nyì dho tdrà nyì dhò nyìníddò, ‘Abrahamu nì mà bbúw, ddiy rò nì ngǎ cha ndèy dho ndèy njèy mà ró nì.’ Manì tdrǎ nyì dhò í djuw róddù Ddrà dho nzòw bbu Abrahamu dhò. 10Njanja ka lêy lǒ nì ney tsúw téy ka tděy à ndanà gu. Tsúw wá cha nzǐ ì nì ì tsi ꞌwǒ lǎní ní nì, ka rà tdèy gudjò ndèymí ka rà ngbò kàss ò.

11“Manì bàtízò bbu nyì dhò dda nà, ndaní à dhǒ nyì lî nyì-dhà rónga nyìdhí cherr óddù. Chú ma dzzdjú ndèy shì nì li mí klôw dà màtsá djòluw. Ma kâ ddí nzá ma déy ǎngá piy ní ndèymí ma tdúw à ko ró shí. À rà bàtízò bbu nyì dhò Bblǒ Thíy nà ndèymí kàss nà. 12Ǎngá nyû-tsi rónga lídha mí dzèrŕ nì à-dhokpa ó, ndèymí à rà ndanà nyû-tsi rónga thì, à rà njuw nděyngá ddèrr̀ ò ndèymí nyû-tsi katéy à rà bey nzǐ ndèy dhí nì kàss nà.”

Yesu lòw tdè bàtízò

(Mak 1:9-11; Lwk 3:21-22)

13Yesu kâ rà Galilaya óddù Yohana dè Yorddani mí pbèydha ní ju-ddà tsò-rò, ndaní ndèy lǒw bàtízò. 14Chú Yohana jì tdè nzá ndèy bbú bàtízò Yesu dhò, à dhîy à, “Nyi chú kà nyi bbú bàtízò ma dhò, nyi ná ngu rǎ ma dè ŋǎchú?”

15Yesu kâ lò ngù à dhò, “Njanja bba à njěy ndèy fǔchú. Fú ddì nì tùw jì nà mà rà cha Ddrà nì jǐ nì chǒw ní ddiy njèy wá.” Yohana kâ àmí lò ùw.

16Yesu lòw tdè bàtízò ddiy-dzzdjú, à shì ndùw dda óddù. Fú nganà rakpa kâ ndèy pù ndèymí à njà Ddrà mí Bblǒ Thíy nì thu bbi ndèy djò bbǎlá níchú. 17Li chùw rò kâ tdrà rakpa óddù, “Í nì màtsá Ddùwnì, drǒ ma jì nì, cha hwî nì ma njěy ndèy ró nì.”

Currently Selected:

Matayo 3: NDRULO

Highlight

Copy