John 13
13
11 ပသခါပွဲတော်မတိုင်ခင် တစ်ရက်အလိုမှာ၊ ခုကမ္ဘာလောကဟနေ ထွက်ခွာမောက် ဖခမည်းတော်နားကော် ပ္လန်ဆွားရမဲ့ အချိန်ရောက်ပြီဆိုဟာကော် ကိုယ်တော်ယေရှုဆိတော်မူဟယ်။ ဆူဟ ကမ္ဘာပေါ်ရှိလူဆားတေကော် အမြဲဂရုဏာထားတော်မူမောက် အဆုံးတိုင်အောင် ဂရုဏာထားတော်မူဟယ်။ 2ကိုယ်တော်ယေရှုန ဆူ့ရဲ့တပဲ့တော်တေဟ ညစာစားနေချိန်မှာ မာရ်နတ်ဟ ရှိမုန်ရှကာရုတ်ရဲ့ဆား ဖြစ်သူ ယုဒရှကာရုတ်ရဲ့ စိတ်ထဲကော် ကိုယ်တော်ကော် သစ္စာဖောက်ဖော့အတွက် အကြံအစည်ပေးထားခဲ့ပြီး ဖြစ်လေဟယ်။ 3ကိုယ်တော်ယေရှုဟ အရာအကုန်ဟုန်းတော့ရဲ့ အခွင့်အာဏာကော် ဖခမည်းတော်ဟ ဆူ့ကော် ပေးထားဟာကော်ရော၊ ဆူဟ ဘုရားရှင်နားဟနေ လာခဲ့မောက် ဘုရားရှင်နား ပ္လန်ဆွားရမဲင်ဟာကော်ရော ဆိတော်မူညောင်း 4ကိုယ်တော်ဟ ညစာစားပွဲမှ ထလိုက်မောက် ဆူ့ရဲ့ ဝတ်ရုံတော်ကော် ခွတ်ပြီးခါ ဖဝါန ဆူ့ရဲ့ခါးကော် စည်းတော်မူဟယ်။ 5ပြီးခါ ဇလုံတစ်ခုထဲကော် ရေလောင်းထေ့မောက် တပဲ့တော်တေရဲ့ခေကော် ဆေးကြောကာ ခါးမှာ ချည်ဟားတဲ့ဖဝါန ဆုပ်မောက် ခြောက်သွေ့စေခဲ့လေဟယ်။ 6ကိုယ်တော်ယေရှုဟ ရှိမုန်ပေတရုနား ရောက်တော်မူတဲ့အခါ ပေတရုဟ "ကိုယ်တော်၊ ကိုယ်တော်ဟ ကျွန်ုပ်ရဲ့ခေထောက်ကော် ဆေးတော်မူမလား" လောက် မေးလျှောက်လေဟယ်။ 7ကိုယ်တော်ယေရှုဟ ဆူ့ကော် "သင်ဟ ငါပြုလုပ်နေတဲ့ အရာကော် ခုနားမလေလယ်ဝ နောက်အခါမှာ သင်နားလေလာပါလိမ့်မဲင်" လောက် မိန့်တော်မူလေဟယ်။ 8ပေတရုဟ ကိုယ်တော်ယေရှုကော် "ကျွန်ုပ်ရဲ့ ခေထောက်ကော် လုံးဝမဆေးပေးပါနဲ့" လောက် လျှောက်ခါ ကိုယ်တော်ဟလဲ "သင်ရဲ့ခေထောက်ကော် ငါမဆေးရပဲခါ သင်ဟ ငါနမသက်ဆိုင်ဘူး" လောက် ပ္လန်မောက်မိန့်တော်မူဟယ်။ 9ဟဲင်းခါ ရှိမုန်ပေတရုဟ "ကိုယ်တော်၊ ဟဲင်းလဲဆိုခါ ကျွန်ုပ်ရဲ့ခေထောက်ကော်ပဲ မဆေးပါနဲ့။ ကျွန်ုပ်ရဲ့လက်န ခေါင်းကော်လဲ ဆေးပေးတော်မူပါ" လောက် လျှောက်တင်လေဟယ်။ 10ကိုယ်တော်ဟလဲ ဆူ့ကော် "ရေချိုးပြီးတဲ့လူဟ တစ်ကိုယ်လုံး စင်ကြယ်ဟာဖြစ်မောက် ခေထောက်ဟလွဲမောက် ဆေးဖော့မလိုတော့ဘူး။ သင်တော့ဟလဲ စင်ကြယ်ကြဟယ်။ ဟဲင်းပေမဲ့လဲ အကုန်ဟုန်းတော့မဟုတ်ဘူး" လောက် မိန့်တော်မူဟယ်။ 11ကိုယ်တော်ဟ 'သင်တော့အကုန်ဟုန်းဟတော့ စင်ကြယ်ဟာမဟုတ်ဘူး' လောက် ဆိုရခြင်းမှာ ဆူ့ကော် သစ္စာဖောက်မဲ့လူကော် ဆိနှင့်တော်မူညောင်းဖြစ်ဟယ်။ 12ဟဲင်းကြောင့် ကိုယ်တော်ဟ ဆူ့တော့ရဲ့ခေကော် ဆေးတော်မူပြီးခါ ဆူ့ရဲ့ဝတ်ရုံကော် ခြုံမောက် ပ္လန်ထိုင်တော်မူမောက် "သင်တော့အတွက် ငါပြုလုပ်တဲ့အရာကော် သင်တော့ဆိကြလား။ 13သင်တော့ဟ ငါ့ကော် 'ဆရာ'၊ 'အရှင်' ဆိုမောက် ခေါ်ကြဟယ်။ အဲဟာဟ အမှန်ဖြစ်ညောင်း သင်တော့ ငါ့ကော် ဟဲင်းလဲခေါ်ဆိုဟာဟ မှန်ကန်ပါဟယ်။ 14ဟဲင်းကြောင့် အရှင်လဲဖြစ်မောက် ဆရာလဲဖြစ်တဲ့ငါဟ သင်တော့ခေကော် ဆေးပေးခါ သင်တော့ဟလဲ အချင်းချင်း တစ်ယောက်ကော်တစ်ယောက် ခေထောက်ကော် ဆေးပေးကြရမဲင်။ 15သင်တော့ဟလဲ ငါလုပ်သလဲ လုပ်ကြဖော့ ငါဟ စံနမူနာပြခဲ့ဟာဖြစ်ဟယ်။ 16သင်တော့ကော် ငါအမှန်တိုင်းပြောရခါ အစေခံဟ ဆူ့ရဲ့သခင်ထက် ကြီးမြတ်ဟာမဟုတ်ဘူး။ စေလွှတ်ခြင်းခံရဆမားဟလဲ ဆူ့ကော် စေလွှတ်တဲ့လူထက် ကြီးမြတ်မှာမဟုတ်ဘူး။ 17ဟဲင်းအရာတေကော် သင်တော့နားလေဆဖောပေါက်မောက် ဟဲင်းအတိုင်းလိုက်နာကျင့်ဆုံးကြခါ သင်တော့ဟ မင်္ဂလာရှိကြဟယ်။ 18သင်တော့အကုန်ဟုန်းကော် ရည်ညွှန်းမောက် ငါပြောနေဟာမဟုတ်ဘူး။ ငါရွေးချယ်ဟားတဲ့လူတေကော် ငါဆိဟယ်။ ဟဲင်းပေမဲ့ 'ငါရဲ့ပေါင်မုန့်ကော် စားဆမားတစ်ယောက်ဟ ငါ့ကော် ဆန့်ကျင်မောက် ဆူ့ရဲ့ခေဖနှောင့်န ပေါက်လိမ့်မဲင်' ဆိုတဲ့ကျမ်းချက်ဟ ပ္လေ့စုံရမဲင်ဖြစ်ဟယ်။ 19ဟဲင်းအရာတေမဖြစ်ပျက်ခင်ခါစ သင်တော့ကော် ငါပြောပြပြီးဟာဖြစ်မောက် ဟဲင်းအရာတေဖြစ်ပျက်လာတဲ့အခါမှာ ငါဟ ဟဲင်းအရှင်ဖြစ်ကြောင်းကော် သင်တော့ယုံကြည်လာကြမဲင်ဖြစ်ဟယ်။ 20သင်တော့ကော် ငါအမှန်တိုင်းပြောရခါ၊ ငါ့ကော်စေလွှတ်တော်မူတဲ့အရှင်ကော် လက်ခံဆမားဟ ငါ့ကော် လက်ခံဟာပဲဖြစ်ဟယ်။ ငါ့ကော်လက်ခံဆမားဟလဲ ငါ့ကော် စေလွှတ်တော်မူတဲ့ အရှင်ကော် လက်ခံဟာပဲဖြစ်ဟယ်" လောက် မိန့်တော်မူလေဟယ်။ 21ကိုယ်တော်ဟ ဟဲင်းသလဲ မိန့်တော်မူပြီးတဲ့အခါမှာ အကြီးကျယ်စိတ်နှလုံးပူပန်မောက် "သင်တော့ကော် ငါအမှန်တိုင်းပြောရခါ သင်တော့ထဲဟ တစ်ယောက်ဟ ငါ့ကော် သစ္စာဖောက်လိမ့်မဲင်" လောက် ပွင့်ပွင့်လင်းလင်းန မိန့်ဆိုတော်မူဟယ်။ 22တပဲ့တော်တော့ဟလဲ တစ်ယောက်ကော် တစ်ယောက် ကြည့်မောက် ကိုယ်တော်မဆူ့ကော် ရည်ညွှန်းပြောဆိုနေဟားဆိုဟာကော် တွေးတောနေကြဟယ်။ 23တပဲ့တော်တော့ထဲမှ တစ်ယောက်ဖြစ်မောက် ကိုယ်တော်ယေရှု ချစ်ခင်တော်မူတဲ့လူဟ ကိုယ်တော်ရဲ့အနီးမှာ ထိုင်နေညောင်း 24ရှိမုန်ပေတရုဟ ဆူ့ကော် "ကိုယ်တော်ဟ မဆူ့ကော် ရည်ညွှန်းပြောဆိုနေဟားဆိုဟာကော် မေးကြည့်အုံး" လောက် အချက်ပြမောက် မေးစေလေဟယ်။ 25ဟဲင်းကြောင့်လောက် ဟဲင်းတပဲ့တော်ဟ ကိုယ်တော်နားကော် ချည်းကပ်မောက် "အရှင်၊ ဟဲင်းလူဟ မဆူ့ဟား" လောက် မေးလျှောက်လေဟယ်။ 26ကိုယ်တော်ယေရှုဟ "အဲမုန့်ကော် နှစ်မောက် ငါပေးမဲ့လူပဲဖြစ်ဟယ်" လောက် မိန့်တော်မူမောက် ကိုယ်တော်ဟ မုန့်ကော် ဟဲင်းအနှစ်ထဲကော် နှစ်မောက် ရှိမုန်ရှကာရုတ်ရဲ့ဆားဖြစ်သူ ယုဒရှကာရုတ်ကော် ပေးခဲ့လေဟယ်။ 27ယုဒဟ ပေါင်မုန့်တစ်ဖဲ့ကော် ယူပြီးခါ မာရ်နတ်ဟ ဆူ့ကိုယ်ထဲကော် ဝင်ရောက်လေဟယ်။ ဟဲင်းကြောင့် ကိုယ်တော်ဟ ယုဒကော် "သင်ပြုလုပ်ရမဲ့ အလုပ်ကော် အမ္လန်လုပ်ပါ" လောက် မိန့်တော်မူလေဟယ်။ 28ကိုယ်တော်ယေရှုဟ ယုဒရှကာရုတ်ကော် စာလောက် ဟဲင်းသလဲမိန့်တော်မူဟာကော် စားပွဲမှာရှိတဲ့ တခြားမဆူ့မှ နားမလေကြဘူး။ 29တပဲ့တော်တချို့တော့ဟ ယုဒရှကာရုတ်ဟ ငွေအိတ်ကော် ကိုင်ရဟာဖြစ်မောက် ပွဲတော်အတွက် လိုအပ်တဲ့ အရာတေကော် ဝယ်ယူဖော့ မဟုတ်ပဲလောက် ဆင်းရဲဆားတေကော် တစ်ခုခုပေးလှူဖော့အတွက် ကိုယ်တော်ယေရှုဟ မိန့်တော်မူနေဟာဖြစ်ဟယ်လောက် ထင်နေခဲ့ကြလေဟယ်။ 30ယုဒရှကာရုတ်ဟ မုန့်ကော်ယူပြီးခါ တခါတည်း ထွက်ဟားလေဟယ်။ ဟဲင်းအချိန်ဟ ညအချိန်ဖြစ်ဟယ်။ 31ယုဒထွက်ဟားပြီးခါ ကိုယ်တော်ဟ "အခု ဘုရားရှင်ဟ လူ့ဆားတော်ရဲ့ ဘုန်းကျက်သရေတော်ကော် ထင်ရှားစေမဲင်ဖြစ်ညောင်း လူ့ဆားတော်ရဲ့ဘုန်းကျက်သရေတော် ထင်ရှားမဲ့အချိန်ပဲ ဖြစ်ဟယ်။ 32လူ့ဆားတော်ကြောင့် ဘုရားရှင်ရဲ့ဘုန်းကျက်သရေတော်ဟ ထင်ရှားစေပြီးတဲ့အခါ ဘုရားရှင်ဟ လူ့ဆားတော်နားကော် ဘုန်းကျက်သရေတော်ကော် ဆောင်ယူလာမဲင်ဖြစ်မောက် ဘုရားရှင်ဟ ဟဲင်းဘုန်းကျက်သရေတော်ကော် တခါတည်း ထင်ရှားတော်မူစေမှာဖြစ်ဟယ်။ 33ကိုယ်တော်ယေရှုဟ "ချစ်ဆားတော့၊ ငါဟ သင်တော့နအတူ အချိန်တနားလေးပဲ နေရတော့မဲင်ဖြစ်ဟယ်။ သင်တော့ဟ ငါ့ကော် ရှာကြလိမ့်မဲင်။ ဟဲင်းပေမဲ့ 'ငါဆွားတဲ့အရပ်ကော် သင်တော့မလာနိုင်ကြဘူး' လောက် ဂျူးလူမျိုးတော့ကော် ငါပြောခဲ့သလဲ ခုသင်တော့ကော်လဲ ငါပြောဟယ်။ 34သင်တော့အချင်းချင်း ချစ်ခြင်းမေတ္တာထားကြပါ။ သင်တော့ကော် ငါချစ်ခြင်းမေတ္တာထားသလဲ သင်တော့ဟလဲ အချင်းချင်း ချစ်ခြင်းမေတ္တာထားကြပါဆိုတဲ့ ပညတ်ချက်အဆစ်တခုကော် သင်တော့ကော် ငါပေးမဲင်။ 35သင်တော့အချင်းချင်းကြားမှာ ချစ်ခြင်းမေတ္တာရှိကြခါ ဟဲင်းချစ်ခြင်းမေတ္တာကော် ထောက်မောက် သင်တော့ဟ ငါ့ရဲ့တပဲ့တော်တေဖြစ်ကြောင်းကော် လူအပေါင်းတော့ဆိကြလိမ့်မဲင်" လောက် မိန့်တော်မူဟယ်။ 36ရှိမုန်ပေတရုဟ ကိုယ်တော်ကော် "ကိုယ်တော်ဟ ဖယ်အရပ်ကော် ဆွားတော်မူမဟား" လောက် မေးလျှောက်ခါ ကိုယ်တော်ဟ "ငါဆွားမဲ့ နေရာကော် သင်ခုမလိုက်လာနိုင်ဘူး။ ဟဲင်းပေမဲ့ နောင်အခါမှာ လိုက်လာနိုင်လိမ့်မဲင်" လောက် ပ္လန်လည်မိန့်တော်မူဟယ်။ 37ဟဲင်းခါ ပေတရုဟ "ကိုယ်တော်၊ စာလောက် ကျွန်ုပ်ဟ ကိုယ်တော့်နောက်ကော် ခုမလိုက်နိုင်ရဟား။ ကျွန်ုပ်ဟ ကိုယ့်အဆက်ကော်တောင် ကိုယ်တော့်အတွက် စွန့်နိုင်ပါဟယ်" လောက်လျှောက်တင်လေဟယ်။ 38ကိုယ်တော်ဟ "သင်ဟ သင့်ရဲ့အဆက်ကော်တောင် ငါ့အတွက် စွန့်နိုင်လား။ သင့်ကော် ငါအမှန်တိုင်းပြောရခါ၊ သင်ဟ ကြက်မတွန်ခင်မှာ ငါ့ကော် ဆုံးကြိမ်တိုင်တိုင် ငြင်းပယ်လိမ့်မဲင်" လောက် ပ္လန်လည်ဖ္လေကြားတော်မူဟယ်။
Currently Selected:
John 13: INT
Highlight
Share
Compare
Copy
Want to have your highlights saved across all your devices? Sign up or sign in
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
