John 10
10
1ကိုယ်တော်ယေရှုဟ "သင်တော့ကော် ငါအမှန်အတိုင်းပြောရခါ သိုးခြံထဲကော် တံခါးပေါက်ဟနေ မဝင်ပဲ တခြားနည်းန ကျော်ဝင်ဆမားဟ သူခိုးဓားမြပဲဖြစ်ဟယ်။ 2ဟဲင်းပေမဲ့ တံခါးပေါက်ဟနေ ဝင်တဲ့လူခါ သိုးတေရဲ့ သိုးထိန်းဖြစ်ဟယ်။ 3တံခါးစောင့်ဟ ဆူ့ကော် တံခါးဖွင့်ပေးတတ်ဟယ်။ သိုးတေဟ ဆူ့ရဲ့အဆံကော် နားထောင်တတ်ကြဟယ်။ ဆူဟလဲ ဆူ့သိုးတေရဲ့ နံမေကော် ခေါ်မောက် သိုးခြံရဲ့အပြင်ဖက်ကော် ခေါ်ဆွားတတ်လေဟယ်။ 4သိုးထိန်းဟ ရှိဆမျှသိုးတေကော် ခေါ်ဆောင်ပြီးတဲ့အခါမှာ ဆူဟ သိုးတေရဲ့ အရှေ့ဟနေ ဆွားမောက် ဆူ့ရဲ့သိုးတေဟလဲ ဆူ့အဆံကော် ဆိညောင်း ဆူ့နောက်ဟနေ လိုက်လာကြလေဟယ်။ 5သိုးတေဟ သူစိမ်းတေရဲ့အဆံကော်ခါ မဆိကြပဲညောင်း သူစိမ်းတေနောက်ကော် ဖယ်အခါမှ မလိုက်တဲ့အပြင် သူစိမ်းတေနားဟနေလဲ ထွက်ပ္လေးတတ်ကြဟယ်" လောက် မိန့်တော်မူဟယ်။ 6ကိုယ်တော်ယေရှုဟ ဟဲင်းလူတေကော် အဲပုံဥပမာကော် ပြောပြလယ်ဝ ကိုယ်တော်ရဲ့ ဆိုလိုရင်းကော် နားမလေကြဘူး။ 7နောက်တခါ ကိုယ်တော်ယေရှုဟ "ငါအမှန်တိုင်းပြောရခါ ငါဟ သိုးတေအတွက် တံခါးဖြစ်ဟယ်။ 8ါ့ရှေ့ဟနေ အရင်ရောက်လာဆမားဟ သူခိုးတေ၊ ဓားမြတေပဲဖြစ်ကြဟယ်။ သိုးတေဟလဲ ဆူ့တော့ရဲ့စကားဆံကော် နားမထောင်ခဲ့ကြဘူး။ 9ငါဟ တံခါးပေါက်ဖြစ်ဟယ်။ မဆူ့မဆို ငါ့နားမှတဆင့်ဝင်ခါ ကယ်တင်ခြင်းခံရမဲင်။ ဟဲင်းလူဟ တံခါးဟနေဝင်ထွက်မောက် ကျက်စားရာနေရာကော် တွေ့ရလိမ့်မဲင်။ 10သူခိုးတေဟ ခိုးယူ၊ ဆတ်ဖ္လတ်၊ ဖျက်ဆီးဖော့အတွက်ပဲ လာတတ်ကြဟယ်။ ငါဟတော့ ငါ့ရဲ့သိုးတေ အဆက်ကော် ရရှိစေမောက် ပြီးပ္လေ့စုံတဲ့ဖဝကော် ရရှိစေဖော့ လာဟာဖြစ်ဟယ်။ 11ငါဟ သိုးထိန်းကောင်းဖြစ်ဟယ်။ သိုးထိန်းကောင်းဆိုဟာဟ ကိုယ့်ရဲ့သိုးတေကော် ကယ်တင်စေနိုင်ဖော့ ဆူ့ရဲ့အဆက်ကော် ပေးအပ်ထားပြီးဖြစ်ဟယ်။ 12ငှားဟားတဲ့လူဟ သိုးထိန်းကောင်းမဟုတ်ပဲသလဲ သိုးတေကော်လဲ မပိုင်ဆိုင်ဘူး။ ဝံပုလွေတစ်ကောင်လာနေဟာကော် မြင်တဲ့အခါ သိုးတေကော် ထားခမောက် ထွက်ပ္လေးဟားမှာပဲ ဖြစ်ဟယ်။ ဟဲင်းကြောင့် ဝံပုလွေတေဟ သိုးတေကော် ဖမ်းယူဆွဲစားမောက် တစ်ကွဲတစ်ပြား ဖြစ်စေမဲင်ဖြစ်ဟယ်။ 13လူငှားဟ ငှားဟားတဲ့လူဖြစ်ညောင်း သိုးတေရဲ့အရေးကိစ္စကော် ဂရုမစိုက်ပဲ ထွက်ပ္လေးဟာဖြစ်ဟယ်။ 14ငါဟ သိုးထိန်းကောင်းဖြစ်ဟယ်။ ငါရဲ့သိုးတေကော် ငါဆိသလဲ ငါရဲ့သိုးတေဟလဲ ငါ့ကော် ဆိကြဟယ်။ 15အဲလဲပဲ ငါ့ရဲ့ဖခမည်းတော်ဟ ငါ့ကော် ဆိတော်မူသလဲ ငါဟလဲ ငါရဲ့ဖခမည်းတော်ကော် ဆိဟယ်။ ပြီးခါ ငါဟ ငါ့သိုးတေအတွက် ငါ့ရဲ့အဆက်ကော် စွန့်လွှတ်ဖော့ အလိုရှိဟယ်။ 16ဟဲင်းသိုးခြံထဲမှ မဟုတ်တဲ့ တခြားသိုးတေလဲ ငါ့နားမှာ ရှိဆေးဟယ်။ ဟဲင်းသိုးတေကော်လဲ ငါခေါ်ဆောင်ခဲ့ရမှာဖြစ်ဟယ်။ ဆူ့တော့ဟလဲ ငါ့ရဲ့အဆံကော် နားထောင်ကြညောင်း သိုးအုပ်ဟ တအုပ်တည်း ဖြစ်ဟားမှာဖြစ်မောက် သိုးထိန်းဟလဲ တစ်ယောက်တည်းပဲဖြစ်လိမ့်မဲင်။ 17ါဟ အဆက်ကော် နောက်တခါ ပ္လန်လည်ရယူဖော့ ငါ့ရဲ့အဆက်ကော် စွန့်မှာဖြစ်ညောင်း အဖဘုရားရှင်ဟ ငါ့ကော် ချစ်တော်မူဟယ်။ 18မဆူ့မှ ငါ့အဆက်ကော် ငါ့နားဟနေ နှုတ်ယူမဲင်မဟုတ်ဘူး။ ငါ့အဆက်ကော် ငါ့ဆန္ဒအရ ငါစွန့် လွှတ်မှာဖြစ်ဟယ်။ ငါ့မှာ ငါ့ရဲ့အဆက်ကော် စွန့်လွှတ်ပိုင်ခွင့်ရှိသလဲ ဟဲင်းအဆက်ကော် ပ္လန်လည်ရယူပိုင်ခွင့်လဲရှိဟယ်။ ငါဟ ဟဲင်းအမိန့်ကော် ငါ့ရဲ့ဖခမည်းတော်နားဟနေ ရရှိဟာဖြစ်ဟယ်" လောက် မိန့်တော်မူလေဟယ်။ 19အဲစကားတော်တေကြောင့် ဂျူးလူမျိုးတော့ကြားမှာ ဆဖောထားကွဲလွဲမှုတေ ရှိကြပ္လန်လေဟယ်။ 20ဟဲင်းလူတေထဲမှ အများစုဟ "ဆူဟ မကောင်းဆိုးဝါးပူးကပ်လောက် ရူးနေဆမားဖြစ်ဟယ်။ စာလောက်ဆူ့စကားကော် နားထောင်နေကြဟား" လောက် ဆိုကြဟယ်။ 21တခြားလူတေဟ "အဲစကားတေဟ မကောင်းဆိုးဝါးပူးကပ်ဆမားရဲ့ စကား မဖြစ်နိုင်ဘူး။ မကောင်းဆိုးဝါးဟ မျက်မမြင်ကော် ပ္လန်မောက် မြင်စေနိုင်လောက်လား" ဆိုမောက် ပြောကြဟယ်။ 22ဟဲင်းအချိန်ဟ ဆောင်းရာသီဖြစ်မောက် ဂျေရုဆလင်မြို့မှာ ဂျူးလူမျိုးတေရဲ့ ဗိမာန်တော်သန့်စင်ခြင်းပွဲတော် တစ်ခုရှိဟယ်။ 23ကိုယ်တော်ယေရှုဟ ဗိမာန်တော်ဝင်းအတွင်းရှိ ရှောလမုန်ရဲ့မုဒ်ဆောင်လောက် ခေါ်တဲ့နေရာမှာ လမ်းလျှောက်ကြွတော်မူချိန်မှာ 24ဂျူးလူမျိုးတေဟ ကိုယ်တော်ရဲ့ ပတ်ပတ်လေမှာ စုရုံးလာကြမောက် "သင်ဟ ကျွန်ုပ်တော့ကော် ဖယ်လောက်ကြာအောင် မဆေမချာဟာတေန သံသယဖြစ်စေနေအုံးမဟား။ သင်ဟ ကယ်တင်ရှင်မေရှိယမှန်ခါ ကျွန်ုပ်တော့ကော် အတိအလင်းပြောကြားပါ" လောက် ပြောဆိုကြလေဟယ်။ 25ကိုယ်တော်ယေရှုဟ ဆူ့တော့ကော် "သင်တော့ကော် ငါပြောပြခဲ့လယ်ဝ သင်တော့ဟ ငါ့ကော်မယုံကြည်ကြဘူး။ အဖခမည်းတော်ရဲ့ အခွင့်အာဏာန ငါလုပ်တဲ့အရာတေဟ ငါ့ရဲ့ကိုယ်စား ဆက်ဆေခံကြဟယ်။ 26ဟဲင်းပေမဲ့ သင်တော့ဟ ငါ့ကော် မယုံကြည်ကြဘူး။ စာလောက်ဟားဆိုခါ သင်တော့ဟ ငါ့ရဲ့သိုးတေမဟုတ်ကြပဲညောင်း ဖြစ်ဟယ်။ 27ငါ့ရဲ့သိုးတေဟ ငါ့အဆံကော် နားထောင်ကြဟယ်။ ငါဟ ဆူ့တော့ကော် ဆိမောက် ဆူ့တော့ဟလဲ ငါ့နောက်ကော် လိုက်လာကြဟယ်။ 28ငါဟ ဆူ့တော့ကော် နိစ္စထာဝရအဆက်ကော် ပေးမှာဖြစ်ဟယ်။ ဆူ့တော့ဟ ဖယ်အခါမှ ပျက်စီးခြင်းကော် ရောက်မှာမဟုတ်တဲ့အပြင် မဆူ့ဟမှလဲ ဆူ့တော့ကော် ငါ့နားဟနေ ခွဲထုတ်နိုင်မှာမဟုတ်ဘူး။ 29ဆူ့တော့ကော် ငါ့နားပေးအပ်တော်မူတဲ့ ငါရဲ့အဖဘုရားရှင်ဟ တခြားလူအပေါင်းတော့ထက် ပိုမောက်ကြီးမြတ်ဟာဖြစ်လောက် မဆူ့ဟမှ ငါရဲ့အဖဘုရားရှင်နားဟနေ ဆူ့တော့ကော် ခွဲထုတ်နိုင်မှာမဟုတ်ဘူး။ 30ငါ့ရဲ့ခမည်းတော်နငါဟ တစ်စုတစ်စည်းတည်းဖြစ်ဟယ်" လောက် ပ္လန်လည်မိန့်တော်မူလေဟယ်။ 31ဟဲင်းခါ ဂျူးလူမျိုးတေဟ ကိုယ်တော်ကော် ခဲနပေါက်ဖော့အတွက် ကျောက်ခဲတေကော် ထပ်မံမောက် ကောက်ယူကြပ္လန်ဟယ်။ 32ဟဲင်းပေမဲ့ ကိုယ်တော်ယေရှုဟ "ငါဟ ဖခမည်းတော်နားဟနေ ကောင်းမွန်တဲ့ အမှုကိစ္စ အများဟုန်းကော် သင်တော့ကော် ပြသခဲ့ပြီးဖြစ်ဟယ်။ ဟဲင်းအမှုကိစ္စတေထဲဟ ဖယ်အမှုကိစ္စကြောင့် သင်တော့ဟ ငါ့ကော် ခဲန ပေါက်ကြမဟား" လောက် မေးတော်မူလေဟယ်။ 33ဂျူးလူမျိုးတေဟ ကိုယ်တော်ယေရှုကော် "ကောင်းတဲ့အမှုကိစ္စကော် လုပ်ညောင်း သင့်ကော် ငါတော့ ခဲန ပေါက်ကြဟာမဟုတ်ဘူး။ သင်ဟ လူဖြစ်နေဟာတောင် သင့်ကိုယ်သင် ဘုရားရှင်ယောင်ဆောင်မောက် ဘုရားရှင်ကော် စော်ကားလောက်ညောင်း ဖြစ်ဟယ်" လောက် ပြောဆိုကြလေဟယ်။ 34ကိုယ်တော်ယေရှုဟ "သင်တော့ရဲ့ပညတ်ကျမ်းမှာ 'ငါဆိုဟာဟ သင်တော့ဟ ဘုရားတေဖြစ်ကြဟယ်' ဆိုမောက် ရေးထားဟာမဟုတ်ဝါး။ 35ကျမ်းစာမှာ ရေးဆားဖော်ပြထားတဲ့ အရာတေဟ အမြဲတမ်း ထာဝရမှန်ကန်ဟာကော်လဲ ငါတော့ဆိကြဟယ်။ ဘုရားရှင်ဟ ဆူ့ရဲ့နှုတ်ကပါတ်တော်တေကော် ပေးအပ်ထားခြင်းခံရဆမားတေကော် ဘုရားတေလောက် ပြောထားဟာမဟုတ်ဝါး။ 36ငါဆိုဟာဟ ဖခမည်းတော်ဟ ငါ့ကော် ရွေးချယ်မောက် ခုလောကကော် စေလွှတ်တော်မူတဲ့လူဖြစ်ဟယ်။ ဟဲင်းကြောင့်လောက် ငါဟ ဘုရားရှင်ရဲ့ဆားတော်ဖြစ်ဟယ်လောက် ငါပြောဟာကော် သင်တော့ဟ စာလောက် ငါဟဘုရားရှင်ကော် စော်ကားပြောဆိုနေဟာလောက် ပြောရဟား။ 37တကယ်လောက်ငါဟ ဖခမည်းတော်ရဲ့ အမှုတော်တေကော် လုပ်ဆောင်နေခြင်းမရှိပဲခါ ငါ့ကော် မယုံကြည်ကြနဲ့။ 38ဟဲင်းပေမဲ့ ငါလုပ်ဆောင်နေလောက်ရှိခါ သင်တော့ဟ ငါ့ကော် မယုံကြည်ပဲတောင် အမှုတော်တေအပေါ် ယုံကြည်ကြပါ။ ဟဲင်းမှ ဖခမည်းတော်ဟ ငါ့နားမှာရှိမောက် ငါဟလဲ ဖခမည်းတော်နားမှာ ရှိကြောင်းကော် သင်တော့ဆိရှိနားလေကြရမှာ ဖြစ်ဟယ်" လောက် မိန့်တော်မူဟယ်။ 39ဟဲင်းခါ လူတေဟ ကိုယ်တော့်ကော် ဖမ်းဆီးဖော့ ထပ်ကြိုးစားကြညောင်း ကိုယ်တော်ဟ ဆူ့တော့လက်မှ လွတ်မောက် ကြွဟားခဲ့လေဟယ် 40ကိုယ်တော်ဟ အဝေးကော် ပ္လန်လည်ထွက်ခွာဟားမောက် ဂျော်ဒန်မြစ်အလွန်ရှိ ယောဟန် ဟောအရင်ဟ ရေနှစ်မင်္ဂလာပေးနေခဲ့တဲ့နေရာကော် ကြွတော်မူမောက် ဟဲင်းနေရာမှာ နေထိုင်တော်မူဟယ်။ 41လူအများတော့ဟလဲ ကိုယ်တော့်နားကော် လာကြမောက် "ဟုတ်တည်းတည်း ရေနှစ်မင်္ဂလာဆရာယောဟန်ဟ ဖယ်နိမိတ်လက္ခဏာကော်မှ မလုပ်ခဲ့လယ်ဝ အဲလူရဲ့အကြောင်းကော် ရေနှစ်မင်္ဂလာဆရာယောဟန် ပြောခဲ့ဆမျှတေဟ မှန်ကန်နေပါလား" လောက်ဆိုကြဟယ်။ 42ဟဲင်းလဲန ဟဲင်းအရပ်ရှိ လူအများဟုန်းတော့ဟ ကိုယ်တော်ယေရှုကော် ယုံကြည်ခဲ့ကြလေဟယ်။
Currently Selected:
John 10: INT
Highlight
Share
Compare
Copy
Want to have your highlights saved across all your devices? Sign up or sign in
This translation of the Intha NT is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
