Colosenses 3
3
1Qomle 'eesa da' 'ami 'adec'alíiỹi so' Cristo joca'li nec'aliséguem, qana'chi 'anmichiỹáaque ga'me huet'ague da' piỹem 'me net'ague so' Cristo da' nes'oot'ague jen' ỹaỹáten ñi' Dios. 2Ỹátaqta tátapiilo naua' 'adai'lídii' ga'me huet'ague di' piỹem, 'ena'salo naua' huetalégue jen' 'aléua. 3Qá'a 'ami sóxote da' 'adeleuaxauai so' Cristo, qana'chi naỹi da' 'ad'óiỹaxaquii huet'ot so'me da' ỹoqotéta'uo ñi' Dios. 4Qá'a so' Cristo naqaiso 'me qad'óiỹaxac, qana'chi qomle ỹivíta da' n'iỹílaq, naloxon, qaama'le nataq'en 'ami 'analoxóñii. Qana'chi 'anhuáñiỹa'uo da' l'ónaxac so'me.
Da' toisec n'óiỹaxac qataxa da' dálaxaic
5Chan'eesa ỹátaqta 'aviñii' qaỹaua ỹima naua' 'adoicódii' 'me huetralégue jen' 'aléua. Qaỹa qomle ga' nichíuatetapegue' jaga' sa loua, qataxa 'ená'te 'auacoñíiỹi ga' desepaxanaqtaxan, qataxa sa 'te 'oquíitapee'to naua' mai'chi 'adoqopitaxacódii' qataxa naua' sa n'oi'n 'adeenataxacódii'. Qataxa 'ená'te 'ami qopitaxanaqtáqaiqa, qá'a dójo' 'ená'am da' qonetaméetapecot ga' 'chi niquí'i. 6Qá'a naqainaua naua' chiỹoqodáỹi da'me qaỹa 'te 'ená'am da' lichic lalemataic ñi' Dios da' ỹa'uo ga' ne'uaxánaguec jen'me sa ỹoqocha'alo naua' l'aqtaqa ñi'me. 7Qa'chi ỹima jénjo' 'ami 'av'íchiitaco' joca'li so' toisec 'adasoxoquii. 8Qaláxasa naỹi 'axañíiñi qomle ỹima naua' 'adoicódii' 'eet'oi: nalemataic, naqaleuaxa, sa nó'inpi, jauténaxac, qataxa naua' sa n'oi'n n'aqtaqa 'me qoncosaỹapeguee'galo. 9Qataxa 'ená'te 'uo ga' ỹoqovin ga' laqáỹa, qá'a sóxote da' 'ami 'axañíiñi so'me toisec 'adóiqui qataxa ỹima jen'me lasoxocpi 'me 'av'íchiitac joca'li. 10Qataxa sóxote da' 'auañíiñi da' dálaxaic nasoxoc 'me nichíctaseguem, cha ỹivíde'ta da' 'ená'am da' lasoxoc ñi' Dios 'me mai'chi l'onatac, qaidi ỹátaqta qoỹaateton ñi'me. 11Chan'eesa naỹi qaỹa 'te da' ỹ'oqóchiỹi da' judío lé'ec ga' siỹaxaua 'uootaxa sa judío lé'ec, 'uootaxa ga' n'añiisec 'uootaxa qaỹa 'te ga' n'anaxaset, qataxa ga' ỹaqá'a lé'ec, 'uootaxa jen'me víaxa lé'ec, 'uootaxa ga' nelatac 'uootaxa ga' sa nelatac. Qá'a so' Cristo na'chisóta, qataxa ỹimata'a't ỹima na' siỹaxadipi.
12Qá'a ñi'me Dios ỹátaqta 'ami noqopitalo, qataxa 'ami liquiỹáqa, da' qaidi 'ami lalémaxase'te. Chan'eesa ỹátaqta 'auañíiñi qomle da' nichoxodénataxanaxac, 'ami huotaxanaqtáqaiqa, qataxa sa 'te 'ami págaqtenaxaiqa, qataxa huosóta da' 'adasoxoquii, qataxa 'ami pogáxadenaxaiqa. 13Ñi' 'oonolec da' 'oñíita ỹátaqta napogáxadeneguet ga' laqáỹa qataxa ỹichoxoden da' 'uo ga' lesamaxataxac. Da' 'eet'eque so' Cristo da' 'ami ỹichoxode'n, naqaida 'me 'av'íchii. 14Qaláxasa ỹátaqta napacalégue qomle da' jalcote 'aviñii da' 'adesóxodiquii, qá'a naqaida da' ỹoqoda't qa'en na' siỹaxadipi, qataxa ỹátaqta nalóchiiñi qa'en ỹima jen' chaqáina. 15Qataxa da' n'emáxac 'me chiỹoqo'ot ñi' Dios ỹilo'ogue qomle jan' 'adiquidiaqchiipi, qá'a naqaida 'me 'uo da' 'ami ỹiỹáxanalo ñi' Dios, da' sétaaque da' sega'me 'oonolec qa'en da' 'adimíỹaỹi da' napat. Chan'eesa ỹátaqta 'ami madet'apolqa qomle.
16Qataxa da' lapaxaguenataxanaxac so' Cristo ỹátaqta saqachiilo qa'en qomle naua' 'adiquidiaqchídii'. Qataxa ỹátaqta 'ami ỹátenaxanaxaiqa da' 'auapaxaguiñii qataxa da' 'au'añaqchichii ga' 'adaqaỹai. Qataxa da' 'au'ónaxañiitac, qana'chi 'au'óñii' naua' ỹodapecachi nalaco 'me chiỹoqo'ot so' Espíritu Santo. Qataxa ỹátaqta ỹima jan' 'adiquidiaqchii da' 'auañiitapecot da' 'antónaxaquii ñi' Dios. 17Qataxa ỹima jen'me 'av'íchiitac 'uootaxa ga' 'ad'aqtaqui, qaláxasa 'av'íchiiỹet da' lenaxat so' qadesaliaxanec Jesús. Qataxa 'auachíỹoxochiỹaỹi so'me da' 'auañiitapecot da' 'antónaxaquii ñi' qadet'a Dios.
Da' lasoxoc ga' 'amaqténataxanaxaic da' ỹilo'oguet ga' laqáỹa
18'Ami ỹauodipi 'me sóxote 'au'óñii, ỹátaqta 'auqochiiỹalo qomle naua' 'adóuadii', qá'a naqaida da' 'ad'onataxanaxaquii, qá'a 'au'amaqchíñii so' qadesaliaxanec. 19Qataxa 'ami l'idimpi 'me sóxote da' 'au'óñii, ỹátaqta 'adoqopichiiỹalo naa'me 'adóuadii'. Qataxa 'ená'te taa'le sa 'auodínaac jaga'me. 20Qataxa 'ami ñoqolqapi, ỹátaqta 'auqochiiỹalo naa'me 'adet'áldii', qá'a da'me ỹátaqta ỹiỹamaxaden ñi' qadasoxola' Dios. 21Qataxa 'ami net'al 'me 'uo da' 'adec'óxoqui, 'ená'te 'aualemataqchichii ga' 'ac'óxochii, qaidi sa 'alóxoỹi lauel. 22Qataxa 'ami namaxa'spi, ỹátaqta 'auqochíiỹa qomle ga' ỹ'oqóchiỹi 'adadípai. 'Ená'te jaldáta da' 'ami ỹilotalóo'te, da' qaidi 'ami ỹiỹamaxade'n, jaldáta da' huesóte' naua' 'adiquidiaqchídii', ỹasouaxat da' 'au'óiỹa ñi' Dios. 23Gamachaqaiga 'av'íchii, qaláxasa ỹátaqta 'ansapáchiitelégue, 'ená'am 'aviñii da' na'chiñi ñi' qadasoxola' da' 'au'onataxañiitapecot. Sa 'te naqaiga ga' siỹaxaua. 24Qá'a 'ami sóxote da' 'auaỹáchiñii ñi'me qadasoxola' 'ami ỹanema qomle ga'me ỹaqátaxatapiỹe't da' sétaaque ỹanem na' lalémaxasetpi. Qá'a 'ami 'au'onataxañiitapecot so' Cristo 'me na'chiso so' ỹátaqta 'adasoxoládii. 25Qaláxasa ga'me loico ló'o, mai'chi lauéguec ga'me náaue ga' sa nó'in 'me ỹ'étetac. Qá'a ñi'me Dios qaỹa 'te ga' ỹilótaỹi jen' siỹaxadipi.
Currently Selected:
Colosenses 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.