Colosenses 2
2
1Qá'a jaỹim sétaaque da' 'ami 'auaỹáchiñiita da' ỹátaqta jalcote da' ñaqaliitaxac ỹasouaxat da' 'oñíita, qataxa jen'me l'acháqa' di' noic Laodicea, qataxa ỹima jen'me maliaxa sa jaỹim ỹaateton. 2'Uo da' ñicotaxac, qá'a sétaaque da' jen'me d'anỹi jan' liquidiaqte, qataxa ỹapotena't da' nesóxodic, qataxa qaỹa 'te lovic da' quitaxac 'me chiỹaqáaue da' naatetonaxanaxac, da' qaidi ỹaateton da'me sa di'ỹoq 'me ỹaloxon ñi' Dios 'me naqaiso so' Cristo. 3Qá'a na'chiso 'me ỹimata'a't ỹima na' ỹodapecachi naỹátenaxanaxacpi qataxa jen' naatetonaxanaxacpi 'me 'chi huáñi. 4Jeda'me 'ami s'axatema, qaidi sa 'ami qoỹoqovi'n jen' 'chi 'ónaxaiqa naua' l'aqtaqa qaláxasa d'áxanataxa'n. 5Qá'a jaỹim, temaqaidi da' sa 'te 'ami salegoovlo, qaláxasa da' ỹaviliỹáxac 'ami ỹalquetaavlo. Qataxa jaỹim mátac ỹasouaxat da' 'ónaxaic 'adasoxoquii, qataxa da' 'an'añaxachíỹic da' 'adip'iỹáxaquii so' Cristo.
6Chan'eesa da'me 'éeta ca'li 'auacoñiiỹet so' qadesaliaxanec Jesucristo, qana'chi naqaida qomle da' 'auqochíita'uo so'me, 7ga'me lepata' da' 'ad'óiỹaxaquii nesoctalégue so'me, qataxa n'oxoosáiỹi so'me da' 'adip'iỹáxaquii. Qá'a naqaida 'me 'ami qoỹapaxaguenque joca'li, qaidi na'chi 'eeta't 'antóñiitapeec ñi' Dios.
Da' dálaxaic n'óiỹaxac 'me ỹoqotéta'uo so' Cristo
8Ma'choqo' qomle, 'ená'te da' 'oquiỹiỹi jen'me sétaaque da' 'ami ỹoqovi'n da' 'ami ỹidolóo'te jen'me naỹátenaxanaxac l'achaq'áina qataxa jen'me neenataxacpi 'me sa 'eesa. Qá'a jen'me sa chiỹaqaỹi so' Cristo; na'chinauá'te' naa'me 'chi nesenaxaco na' siỹaxadipi qataxa jen' leenataxacpi da' tátapiỹi lauel jen' ỹ'oqóchiỹi.
9Qá'a ỹima da' lasoxoc ñi' Dios ỹátaqta ỹimatalégue da' l'óiỹaxac so' Cristo. 10Qataxa naỹi ỹátaqta 'ami saqachiilo da' lasoxoc ñi'me Dios, qá'a 'auqochíita'uo so' Cristo. So'me 'me napacalégue ỹima jen' damaxasóxonacpi qataxa jen'me nañoqtaxanaxacpi 'me sa di'ỹoq. 11Nataq'en naỹi 'ami, da' 'auqochíita'uo so' Cristo, qana'chi 'ami qoỹ'a'n. Qaláxasa sa 'te naqaida da' ỹ'oqóchiỹi da' qoỹ'an jen' nó'oc, jeda'me 'adec'alaxaquii 'me naqaida 'me 'ami qoỹ'anque joca'li 'ami qonec'alaxatree'guesopa naua' loico na' qadapáchiỹaxac. Naqaida 'me n'anaxaset 'me chiỹoqo'ot so' Cristo. 12Qá'a ca'li 'ami qonachiláxa'n, qana'chi 'ená'am da' 'ami qoỹisii'nsopa so' Cristo, ca'li qoỹisiiñi. Qataxa joca'li qonec'alaxadiséguem, qana'chi nataq'en 'ami 'anec'aliiséguem, qá'a 'ami ỹátaqta 'au'amaqchíñii da' lañoqtaxanaxac ñi' Dios 'me nec'alaxatee'guesop da' neleuaxa jeso'me. 13Qá'a 'ami joca'li saua' ỹoxoguelo 'uóidi, qana'chi 'ená'am da' 'ami napa'li, ỹasouaxat naua' 'adoicódii', qataxa ỹasouaxat da' sa 'ami qoỹ'a'n. Qaláxasa naỹi ñi'me Dios 'ami ỹanema da' 'anec'aliiséguem 'ená'am so' Cristo, qana'chi ỹapalaxa't ỹima jen' 'adesamaxataxaquii. 14Qana'chi ñi'me Dios ỹapalaxat jaso' qadavíỹaxasete 'me qadasápaxaqui qataxa ỹí'et da' qane'uaxánaguec, qá'a sa salaxasoxolóo'te naua' nedétrañi naqátaxaco. Huá'a, qana'chi ỹapalaxateguet qa'en jaso'me qadavíỹaxasete ca'li qoỹip'enasee'mec jaso' nesodooso so'me. 15Qá'a so' Cristo ca'li ỹileu nétaỹi jaso' nesodooso, huá'a, qana'chi nemat jen' net'alpi qataxa ỹima jen' nañoqtaxanaxacpi 'me sa di'ỹoq. Huá'a, qana'chi 'en di'ỹoq da' ỹátaqta qaỹa 'te ga' nesáaque qa'en joca'li ỹauec 'ená'am da' lecoñitáisecpi ca'li demataxan.
'Anmichiỹáaque qomle ga' hua'ague da' piỹem
16Chan'eesa 'ami 'ená'te qomle da' 'auqochíiỹa ga' 'ami quetapeelóo'te ỹasouaxat ga'me ỹ'oqóchiỹi nalic, 'uootaxa ga'me náquip, 'uootaxa ga' nolo' 'me niỹamaqtac, 'uootaxa da' dálaxaic so' 'auóxoic, 'uootaxa ga' nolo' 'me mataxaqui. 17Qá'a ỹima jen'me 'chi lepaqal ga'me maliaxa naỹa'quéna, qaláxasa da'me 'eesa ỹátaqta lasoxoc, naqaiso so' Cristo. 18'Ená'te qomle da' 'axañíit'ac da' 'ami nenaxatelóo'te qana'chi ỹaconeguet ga' 'adavíguiquii jen'me siỹaxadipi 'me 'chi huómtaaue da' sega'me 'ónaxaicaloic qataxa netameetapecot na' namaxasec piỹem lé'ecpi. Qá'a jen'me táaue ga'me sa 'te ỹauañíỹi, qataxa 'chi ỹaseedétaỹi da' ni'ỹoxodénaxac, ỹasouaxat naua' mai'chi leenataxaco jen' lapáchiỹaxac. 19Qá'a jen'me siỹaxadipi sa ỹoqteuó'o so' Cristo 'me na'chiso laqaic da'me nó'oquiaxac. So'me 'me naqaiso nichíctaseguem qa'en da' ỹ'añaqtet da'me nó'oquiaxac, qataxa ỹátaqta ỹoqotet'a't qa'en jen'me ỹodapecachi leuoxosetpi da' ỹipaquíchiỹi qa'en da'me 'éetapeec ñi' Dios.
20Qá'a 'ami sóxote da' 'adeleuaxauai so' Cristo, qana'chi 'axañiidéegue naa'me leenataxaco na' siỹaxadipi da' tátapiỹi lauel jen' 'chi hua'ñína. ¿Tóoqo'chi 'ena'amo' taa'le maliaxása 'ovíitaavlo naua' loico jen' 'aléua? Qá'a 'chi 'anañañiiỹet da' 'av'íchii' jen'me napaxaguenataxanaxacpi 21'me 'eet'oi: “'Ená'te 'auacoñíiỹi dójo', qataxa 'ená'te 'av'iỹen díjo', qataxa 'ená'te 'uo ga' 'alasáq'a.” 22Ỹima jénjo' qodapaxaguenataxáatapeecpi, jen'me 'uo da' pa'l. Qá'a jen'me napaxaguenataxanaxacpi mai'chi lamaxasóxonaxac qataxa lapaxaguenataxanaxac jen'me 'chi siỹaxadipi. 23'Eesa ỹima da'me dójo' 'ená'am da' ỹátaqta 'uo na' ỹaỹáten ga' siỹaxaua da' ỹí'et. Qá'a jen'me ỹamaxalégue da' netamnaxac, qataxa da' sa ni'ỹoxoden, qataxa ỹa'uo da' ne'quetéetapeela't. Qaláxasa jen'me sa naqaida 'me lecochaxac ga'me, da' qaidi nala'aguet da' loqopi'chi da' lapáchiỹaxac.
Currently Selected:
Colosenses 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.