2 Tesalonicenses 3
3
Qo'mi 'antamñiilóo'te
1Da'me p'áteegue qad'aqtac, 'ami qadaqáỹa', qo'mi 'antamñiitalóo'te qomle, qaidi da' l'aqtac so' qadesaliaxanec té'tataxa da' ỹivíd'a ỹima jen' siỹaxadipi da' ỹi'ỹoxoden. Qana'chi 'ená'am ca'li da' 'oñíita. 2Nataq'en 'antamñiitalóo'te qo'mi, qaidi sa 'te qo'mi ỹiqueuógaxan'ape na' siỹaxadipi qalhuaxaicpi 'me sa ỹisiquiaxaná'a da' ỹiỹamqáchiiñi, qá'a sa ỹima na' siỹaxadipi da' huet'ot da' nip'iỹáxac. 3Qaláxasa so' qadesaliaxanec 'me sa 'te desepégaxanot ga' l'aqtac 'ami lecochiique da' 'ad'añaxaquii, qataxa 'ami netelaqténeeta naua' sa ỹiỹamadídiñi. 4So'me 'me qo'mi ỹanema da' qanaquitaxac da' 'oñíita da' 'oquiit'ot da'me sóxote 'av'íchiitac 'me 'ami samaxasoxolóo'te. 5So' qadesaliaxanec 'ami lecochiique da' ỹátaqta 'ami ỹaueegueta da' loqopi'chi ñi' Dios, qataxa 'ami lecochiique da' 'anapogáxadenaxaquii 'me 'ená'am da' neuénaxac so' Cristo.
Ga' siỹaxaua qoỹinapéga da' d'onataxan
6'Ami qadaqáỹa', 'ami saqátaxalo, qá'a qo'mi lamaxa's so' qadesaliaxanec Jesucristo, da' 'ená'te da' 'alapaqaỹiỹet gamachaqaiga 'adaqaỹai 'me sa d'onataxanapiỹe't, qataxa lamá'asa qomle sa 'te 'equegue da' qadapaxaguenataxanaxac 'me 'ami sanemáxama. 7Qá'a 'ami sóxote 'auaỹáchiñii da' 'adasoxoquii da' 'auloilégue da' 'ami saloxónaxalo 'me qadasoxoc. Ca'li 'ami souqátaavlo sa 'te taa'le sa s'onataxanaqpiỹe't, 8qataxa sa 'te taa'le salíinaqtac ga' jaloq ñi' 'oonolec da' 'oñíita taa'le sa 'te seseeténaq. Na'chidáta da' s'onataxanaq, qadiliiñáxac naua' noloqo'te qataxa pi'ỹáxadi, qá'a sétaaque da' qaỹa 'te ga' ỹimetelóo'te qo'mi da' 'oñíita. 9Temaqaidi da' qo'mi ỹiỹamqáchiiñi da' 'uootaxa 'ami siỹáxanoqto da' qo'mi 'alcochiiỹalo, qaláxasa qo'mi sepagaqpéga da' s'onataxanaq, qá'a sétaaque da' qo'mi 'auadénaxachii'. 10Qá'a ca'li 'ami souqátaavlo, qana'chi 'ami sanemáxama da'me lasoxoc da' ga' siỹaxaua da' sa d'onataxan, qana'chi dequé'e toqo'. 11Qá'a qo'mi semachaqtalégue da' 'uo na' sa 'te d'onataxanapiỹe't da' 'oñíita. Jaldáta da' ỹimelégue da' qaỹa 'te ỹí'et, sa d'onataxan. 12Ga'me siỹaxaua samaxasoxolégue qataxa senaqapéga, qá'a qo'mi lamaxa's so' qadesaliaxanec Jesucristo, da' d'onataxan, qaỹa 'te tátapiỹi lauel, qaidi naqchiñi ga' leuénec.
13'Ami qadaqáỹa', 'ená'te 'adíliñii'sopo' da' 'av'íchii ga' ỹiỹamqáchiiñi. 14Da'me 'uo ga' 'oonolec da' 'oñíita da' sa 'te ỹalaxalégue da' qad'aqtac 'me huetalégue jan' qadidíise, ga'me ỹátaqta 'aviñii. Qana'chi 'ená'te 'aneuoquiiỹet, qaidi mai'chi 'alóxoic ga'me. 15Qaláxasa 'ená'te taa'le 'aviñii sega'me 'adautéuai. Jaldáta da' ỹátaqta 'auqáchiiỹa, 'oñíit'em ga' 'adaqaỹaisa.
So' Pablo sétaaque da' qoỹan ga' 'ónaxaic nadíquiaxac
16So' qadesaliaxanec Jesús 'me chiỹoqo'ot da' n'emáxac, so'me 'me 'ami ỹanema qomle da' 'ad'emáxaquii ỹiméda naua' 'uóidi qataxa ỹima jen' chaqáina lasoxocpi. So'me 'me huetaavlo ỹima qomle da' 'oñíita.
17Jaỹim Pablo ỹátaqta mai'chi ñapoquena lidíisec jen' ỹip'iỹénataxanaxac. Naqaida da' séet'ec ỹima jan' ỹidíisepi da' ñidelégue. 'Éeta da' nedáguec jan' ỹidíise. 18So' qadesaliaxanec Jesucristo 'ami ỹanema qomle ỹima da' 'oñíita ga' 'ónaxaic 'adadíquiaxaquii. Já'a, na'chi naq'áita dójo'.
Currently Selected:
2 Tesalonicenses 3: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.