2 Tesalonicenses 2
2
Ga'me siỹaxaua 'me 'itaxalóxoic
1Naỹi, 'ami qadaqáỹa', sétaaque da' s'axátaq da' l'iỹílaxasoxoc so' qadesaliaxanec Jesucristo, qomle janac da' qo'mi ỹimata'a't. 'Ami saqátaxalo 2da' 'ená'te qomle da' qaỹa 'te lasápaxac da' qoỹasáxañi da' 'adeenataxaquii, qataxa 'ená'te taa'le 'ami ỹoqolanaqte't da' 'uootaxa qoỹíitapega da' sóxote ỹivíta ga' lalóqo' da' nóvi' so' qadesaliaxanec. Qá'a sa qoue da' 'uo ga' 'éetapega sega'me ỹosáxanaxan so' Espíritu Santo, 'uootaxa ga' n'aqtaxanaxac, 'uootaxa 'auacoñiiỹet jaga' nidíise da' qoỹíitapega qad'onata. 3Qaláxasa 'ená'te taa'le 'ami noqovíñii's. Qá'a qomle diáqat'a da' nóvi' ga' nolo', qana'chi 'uáiñi da' nichaachiñi ga' siỹaxadipi, ỹátaqta nauté'ne' ñi' qan'étoqo't, qana'chi di'ỹoq ga'me siỹaxaua 'me 'itaxalóxoic, ga'me 'me taỹá'a da' ỹátaqta sa 'te laỹamaxa. 4Na'chiga ga' nauténa ỹima na' ỹachítac da' lenaxat ñi' Dios, 'uootaxa na'me qontaméetapecotpi, cha ỹivíd'a da' nes'oolégue ga' tamnaqa' da' qonetamnot ñi' Dios, qana'chi 'enapeela't na'chiñíta 'me tamnaxala'.
5¿Qo'li sa 'te 'antovíñiit'ac da' sóxote 'ami s'axátetapeema dójo' ca'li 'ami souetaavlo? 6Qá'a 'ami sóxote 'auaỹáchiñiita da'me nequepaxatet'aguet ga'me siỹaxaua 'itaxalóxoic da' sa 'te naloxon naỹi, qom'te ỹivíta ga' lalóqo', qana'chi di'ỹoq. 7Qá'a da'me sa di'ỹaxa n'etaxalóxo sóxote da' d'onataxáatac. Qaláxasa 'chi ỹiuatét'a da' qonaqat da'me n'eláxatetañi. 8Huá'a qomle, qana'chi naloxon ga'me siỹaxaua 'me 'itaxalóxoic. Qaláxasa so' qadesaliaxanec Jesús ỹalaat qomle, ỹalaatec na' laỹat 'me nái'ỹa jen' nedégaxat da' ỹipetetot ga'me. Qana'chi qaỹa 'te laỹamaxa qa'en ỹasouaxat na' l'edáxa qomle n'iỹílaq ñi'me qadesaliaxanec. 9Da' livídaxac ga'me 'itaxalóxoic naquétaaue da' loiquiaxac so' qadó'o paiỹac Satanás. Ỹátaqta jalcote da' lañoqtaxanaxac, nataq'en ỹí'et jen' n'anecpi qataxa jen' sa qoỹauanápiỹi 'me noqovínaxanaxac. 10D'onataxana ỹima na' loiquiaxacpi da' 'chi ỹoqovin na' siỹaxadipi 'me taỹá'a da' laqataxac 'me qaỹa 'te loiquiaqa', qá'a sóxote da' sa ỹaconeguet da' ỹataqtelégue lasoxoc da' n'aqtac 'me nec'alaxaqui. 11Chan'eesa ñi' Dios maliaxa demachí'ỹa da' 'equegue qa'en da' noqovínaxanaxac, qaidi p'íid'a da'me sa 'eesa. 12Qaidi ỹátaqta let'ádaic da' ne'uaxánaguec ỹima jen'me sa 'te ỹ'amaqten da' 'eesa lasoxoc, jaldáta da' noqopita jen' sa ỹiỹamaxañi.
'Ami niquiỹáqa da' 'ami qonec'alaxatréegue
13'Ami qadaqáỹa', 'me nauotaxa'u so' qadesaliaxanec, qo'mi qolqat'ot da' qantónaxac da' sanaqátapeguem ñi' Dios ỹasouaxat da' 'oñíita, qá'a ñi'me 'ami liquiỹáqa joca'li maliaxa qaỹa jen' 'aléua da' 'ami nec'alaxatréegue. Da'me nec'alaxa chiỹoqo'ot so' Espíritu Santo da' 'ami qa'en lalémaxase'te ñi' Dios, qataxa chiỹaqaỹi da' 'eesa n'aqtac 'me nec'alaxaqui 'me 'au'amaqchíñii. 14Na'chida 'me 'uo da' 'ami ỹiỹáxanalo ñi' Dios, sétaaque da' 'auacoñiiỹet da' n'aqtac 'me nec'alaxaqui 'me s'axátaqtac. Qataxa sétaaque da' 'anouáñiỹa'uo da' l'ónaxac so' qadesaliaxanec Jesucristo.
15Chan'eesa 'ami qadaqáỹa', qaỹo' qomle ga' 'auqochíiỹa, qataxa 'an'añaxachíỹic da' qadapaxaguenataxanaxac 'me 'ami sanemáxama ca'li 'ami souqátaavlo, 'uootaxa ga' huetalégue jaga' qadidíise. 16Ñi'me qadesaliaxanec Jesucristo qataxa ñi' qadet'a Dios ñi'me ỹálaqtaxanaxaic 'me qo'mi noqopitalo, qataxa qo'mi ỹanema da' qad'añaxac 'me sa n'aidé'na, qataxa da' 'ónaxaic qanaquitaxac, 17ñaa'me 'me ỹ'añaqte't qomle naua' 'adiquidiaqchídii', qataxa 'ami 'uañaxaiqa qa'e'n da' 'au'axáchii qataxa 'av'íchii ỹima jen' ỹiỹamqáchiiñi.
Currently Selected:
2 Tesalonicenses 2: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.