2 Juan 1
1
Da' n'aqtac 'me ỹátaqta 'eesa qataxa da' nauo'chi
1Jaỹim 'me jaỹim 'adasoxonquii, samaxa jan' ỹide jaga' ỹaqáỹa 'me liquiỹa ñi' Dios qataxa ga' lec'oqtepi 'me ỹátaqta ỹauotaxatpi. Sa na'chaỹiméta da' sauotec jega'me, qá'a nataq'en ỹima jen'me ỹaateton da' n'aqtac 'me ỹátaqta 'eesa. 2Jaỹim ỹátaqta sauoteque ỹima da' 'oñíita ỹasouaxat da' n'aqtac 'me ỹátaqta 'eesa, jeda'me huetaavlo naua' qadiquidiaqtel, qataxa na'chi 'eeta't da' qo'mi huetaavlo. 3Ñi'me qadet'a Dios qataxa so' qadesaliaxanec Jesucristo 'me lec'óxot jiñi'me 'ami ỹanema qomle da' lachítaqtaxanaxac qataxa da' lichoxodénataxanaxac qataxa da' l'emáxac. Jeda'me 'auacoñiiỹet qomle 'ami 'me 'auaatetoñii da' n'aqtac 'me 'eesa qataxa da' 'anchoxodiñiỹa't.
4Ỹátaqta let'ádaic da' ñitónaxac da' jaỹim 'uo na' selalégue jen' 'ac'óqo'tepi da' quétapegue' da' n'aqtac 'me 'eesa, da' 'ená'am joca'li qo'mi ỹanema dójo' lamaxasóxonaxac ñi' qadet'a Dios. 5Qataxa naỹi 'am ỹaqáỹa, 'am ñachoxodenot da' ñi' 'oonolec da' qo'mi ỹátaqta ỹauotec ga' laqáỹa. Dójo' sidíñi da' 'am samaxa sa 'te da' 'uootaxa dálaxaic namaxasóxonaxac, qá'a na'chidáta da' namaxasóxonaxac 'me saconaxaguet joca'li ỹímta da' s'amaqténataxanaq. 6Dójo' nauo'chi náỹi da' qoỹalaxaguet na' lamaxasóxonaxacpi ñi'me Dios. Dójo' namaxasóxonaxac 'me 'ami 'anaquiáxañiichiỹi jocalia'cho', jeda'me 'ami 'éetapegalo da' 'oñí'ỹam ga' siỹaxaua 'me dichoxodénataxan.
Jen' pecaicpi
7Qá'a jalcote jen' huetalégue jen' 'aléua pecaicpi 'me noqolgué'te' so' Jesucristo da' ỹátaqta 'eesa siỹaxaua. Jega'me na'chi 'éet'ec dójo', qana'chi naqaiga ga' pecaic qataxa nep'aguéetapegue' so' Cristo. 8Ma'chaxa qomle da' 'oñíita, qaidi sa 'te da' daqat jega'me náỹi da' 'ad'onataxanaxaquii. Na'chidáta da' 'auacoñiiỹet qomle ga' ỹátaqta nalot'a't 'anseeténaỹiquii.
9Qá'a gamachaqaiga da' 'uootaxa 'uáuapegueegue, sa 'te da' qapiỹaỹi jeda'me lapaxaguenataxanaxac so' Cristo, qa'chi jega'me sa 'te da' huet'aguet ñi' Dios. Qaláxasa ga' na'chi 'eeta't da' huétaỹi da' lapaxaguenataxanaxac so' Cristo, jega'me huet'aguet ñi' qadet'a Dios qataxa so' lec'óxot. 10Da' 'uootaxa 'uo ga' 'ami ỹic'atalo da' sa 'te da' ỹachítac dójo' napaxaguenataxanaxac, qana'chi jega'me sa 'te da' 'anasiñiiỹet da' ỹic'áta ga' 'ad'acháqadi, qataxa sa 'te 'ap'iỹíñii. 11Qá'a ga' nip'iỹí'ne' jega'me, qana'chi 'ená'am da' neuána'uo da' loic 'me ỹ'étetac.
Da' p'áteegue n'aqtac
12Ỹátaqta jalcote na' ỹ'aqtacpi da' 'ami senapegalo, qaláxasa sa 'te da' sedelégue jánjo' ỹide da' 'ami samaxalo. Qá'a seuatá'a qomle 'ami sec'atalo, ỹátaqta 'ami ñima'to da' 'ami senapegalo, qaidi da' qantónaxac ỹátaqta nalot'a't.
13Jen'me lec'óqo'tepi jañi' 'adaqáỹa 'am ỹamaxa da' lip'iỹénataxanaxac, jañi'me nataq'en liquiỹa ñi'me Dios. Já'a, na'chi naq'áita dójo'.
Currently Selected:
2 Juan 1: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.