1 Juan 5
5
Da' 'éeta da' qadoxonec jen' jaloicpi
1Ỹima jen'me 'uo da' lip'iỹáxac so' Jesús da' na'chiso so' net'a 'me qadec'alaxaqui, jen'me 'me lec'oqtepi ñi' Dios. Ga' ỹauotec ga' net'a, nataq'en ỹauotec ga' lec'oqtepi jega'me. 2Da' 'uootaxa sauotaxac ñi' Dios, qataxa s'étaq ỹima jen'me damaxasóxootapeelégue, qana'chi saỹátenaqta da' sauotaxac nataq'en jen' lec'oqtepi jiñi'me. 3Qá'a da' qoỹauotec ñi' Dios, jeda'me náỹi da' qoỹalaxaguet jen'me lamaxasóxonaxacpi jiñi'me. Jen' lamaxasóxonaxacpi sa 'te da' desali. 4Qá'a ỹima jen' lec'óqo'tepi ñi' Dios, jen'me nemat jen' jaloicpi 'me huetalégue jen' 'aléua. Qataxa naqaida da' qadip'iỹáxac da' chiỹaqaỹi da' ñimataq jen' jaloicpi. 5Chan'eesa ga' 'uo da' lip'iỹáxac so' Jesús da' naqaiso so' lec'óxot ñi'me Dios, 'me na'chigáta ga' loxonec jen' jaloicpi.
Da' n'aqtaguec so' lec'óxot ñi' Dios
6Da' livídaxac joca'li huét'a jen' 'aléua so' Jesucristo, dos naua' n'anaxase'te: so' noxop joca'li qonachiláxan, qataxa saua' letauo' joca'li qoỹalaat. Sa na'chisóta so' noxop, qá'a nataq'en saua' letauo' joca'li qoỹalaat. So' Espíritu Santo naqaiso so' ỹ'axat dójo', qaa'le ỹátaqta 'eesa da' l'aqtaxanaxac. 7Tres naua' huet'oto di' piỹem 'me ỹ'axa't dójo': ñi' qadet'a, qataxa so' lenaxat n'aqtac, qataxa so' Espíritu Santo. Qana'chi náajo' tres 'ená'am ga' 'oonolec. 8Qataxa tres naua' huetralégue jen' 'aléua 'me ỹ'axa't dójo': so' Espíritu Santo, qataxa so' noxop 'me qonachilíỹi, qataxa saua' netauo' 'me qoỹicodédeegue. Nauójo' tres 'eeta't da' l'aqtaxanaxa'j. 9Qo'mi s'amaqténaq da' l'aqtaxanaxac ga' 'chi siỹaxaua. Qaláxasa ga' l'aqtaxanaxac ñi' Dios ỹátaqta p'asáiỹi, qá'a jeda'me ỹ'axat da' n'aqtaguec so' lec'óxot. 10Jega'me ỹ'amaqten so' lec'óxot ñi' Dios, qana'chi jega'me huétaaue jañi' liquidiaqte dójo' n'aqtaxanaxac. Qaláxasa jega'me sa ỹ'amaqten ñi' Dios, qana'chi jega'me 'ená'am da' qovínaxanaxaic qa'en jiñi'me. Qá'a sa ỹ'amaqten da' l'aqtaxanaxac ñi' Dios joca'li ỹ'axat so' lec'óxot. 11Dójo' l'aqtaxanaxac ñi' Dios náỹi da' qo'mi ỹanema da' nec'alaxa 'me qaỹa 'te loiquiaqa', qataxa dójo' nec'alaxa chiỹaqaỹi so' lec'óxot. 12Jega'me ỹoqotéta'uo so' lec'óxot ñi' Dios, jega'me nataq'en huet'oto dójo' nec'alaxa, qaláxasa jega'me sa ỹoqteuó'o jeso'me, sa huo'ot dójo' nec'alaxa.
Da' p'áteegue naqátaxac
13'Ami 'me 'au'amaqchíñii so' lec'óxot ñi' Dios, 'ami samaxalo jánjo' ỹide 'me sedelégue, da' qaidi 'auaỹáchiñii da' 'ami huet'oto da' nec'alaxa 'me qaỹa 'te loiquiaqa'.
14Ỹátaqta sa ñ'aloxonqot ñi' Dios, qá'a qo'mi saỹátenaq da' 'uootaxa siỹáxanaqaaque ga' ỹiỹamaxaden jiñi'me, qaláxasa qo'mi demachiỹalo. 15Qataxa da' qo'mi saỹátenaq ñi'me Dios demachíỹa da' qantamnaxac, nataq'en saỹátenaq da' sóxote qo'mi huet'oto ga' siỹáxanaqtaaque.
16Da' 'uootaxa 'uo ga' ỹauáachiỹi ga' lip'iỹáxaua da' 'uo ga' ỹisamaxata'aguet loic, da' 'uootaxa sa 'te da' taỹá'a qa'en da' neleuaxa, n'óota da' netameelégue jega'me. Qana'chi ñi' Dios ỹanem jega'me da' lec'alaxa, da' 'uootaxa jega'me lasouaxac sa 'te da' taỹá'a qa'en da' leleuaxa. Qá'a 'uo ga' nasouaxaset 'me taỹá'a qa'en da' leleuaxa ga' siỹaxaua. Qaláxasa sa 'te da' séetapega da' qontameelégue jénjo' nasouaxaset. 17Ỹima jen' n'etaxalóxocpi náỹi jen' nasouaxasetpi, qaláxasa 'uo ga' nasouaxaset sa 'te da' taỹá'a qa'en da' leleuaxa ga' siỹaxaua.
18Saỹátenaq da' jega'me 'ená'am qa'en da' ỹátaqta let'ása jiñi'me Dios, jega'me 'ená'te quet'ot da' ỹa'uo ga' loic. Qá'a so' lec'óxot ñi' Dios netelá'a jega'me, qana'chi so' paiỹac qadó'o sa ỹañoxot da' 'uo ga' 'éet'ec.
19Qo'mi saỹátenaq da' qo'mi lalémaxase'te ñi' Dios qataxa da' jen' siỹaxadipi laỹi 'me huetalégue jen' 'aléua ỹima huet'ot da' l'añaxac so' paiỹac qadó'o.
20Nataq'en qo'mi saỹátenaqta so' lec'óxot ñi' Dios jeso'me janac da' qo'mi ỹanema da' qadaatetonaxanaxac, qaidi saatetonaqáta jiñi'me ỹátaqta 'eesa qan'étoqo't. Soqotaqáta'uo jeso'me lec'óxot Jesucristo 'me ỹátaqta 'eesa. Naqaiso so' ỹátaqta qantamnaxala', qataxa naqaiso jeso'me chiỹoqo'ot da' nec'alaxa 'me qaỹa 'te loiquiaqa'. 21'Ami ỹalqolqa, ỹátaqta 'avichiỹa'aguet qomle ga' laqáỹa qoỹíitapega qantamnaxala', qamaale ỹaqá'a. Já'a, na'chi naq'áita dójo'.
Currently Selected:
1 Juan 5: PLGNT93
Highlight
Share
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.