At Ṛuma 6
6
Tikli n umasiḥi
(Kul 3.1-10)
1Acu ara d-nini ihi ? Ad nkemmel ad nettɛici di ddnub i wakken ad timɣuṛ ṛṛeḥma n Yillu ? 2Ala ! Nekni i yemmuten deg wayen yeɛnan ddnub, amek ara nkemmel ad nettɛici deg-s ?
3Neɣ ur teẓrim ara d akken nekni akk i yettwaɣeḍsen i wakken ad neddukel d Yasuɛ Lmasiḥ, nettwaɣḍes yid-s di lmut-is ? 4S weɣḍas, nettwamḍel yid-s i wakken, nekni daɣen ad d-neḥyu akken i d-iḥya Lmasiḥ si gar lmeyytin s tezmert n Ṛebbi, ad nekcem di tudert tamaynut. 5Axaṭer ma yella nezdi yid-s s lmut yecban lmut-is, ad nezdi daɣen yid-s di ḥeggu-ines. 6Ilaq-aɣ ad nẓer d akken amdan-nni i nella zik, immut, ittwasemmeṛ akked Lmasiḥ i wakken ad temmet tfekka yeččuṛen d ddnub, ur nettili ara d aklan n ddnub. 7Axaṭer win yemmuten, yettwasellek si tezmert n ddnub, 8imi nemmut akked Lmasiḥ, numen daɣen d akken ad nidir yid-s. 9Neẓra d akken Lmasiḥ seg wasmi i d-iḥya si gar lmeyytin, ur ittuɣal ara ad immet, lmut ur tezmir ara ad teḥkem fell-as. 10Axaṭer taluft n ddnub ifra-tt ɣef yiwet n tikkelt i dayem s lmut-is. Tura atan d amuddur, yedder i Yillu. 11Ula d kunwi ḥesbet iman-nwen am akken temmutem ɣef wayen iɛnan ddnub, meɛna teddrem i Yillu di tdukkli akked Yasuɛ Lmasiḥ.
12Tura ur ttaǧǧat ara ddnub ad iḥkem fell-awen, ur xeddmet ara ccehwat n tnefsit-nwen am zik. 13Ur ttaǧǧat ara iselqam n tfekkiwin-nwen ad ɣlin di ddnub, i wakken ad ixdem yis-sen cceṛ ; lameɛna qeddmet iman-nwen i Yillu am wid i d-iḥyan si lmut i wakken ad tqeddcem fell-as ad txeddmem anagar lxir. 14Ddnub ur ittuɣal ara ad iḥkem fell-awen axaṭer ur tellim ara seddaw n usaḍuf lameɛna seddaw n ṛṛeḥma n Yillu.
15Acu ara d-nini ihi ? Ad neǧǧ ddnub ad iḍebber fell-aɣ tura imi nella seddaw n ṛṛeḥma n Yillu mačči seddaw n usaḍuf ? Ad aɣ-imneɛ Ṛebbi seg wannect-agi ! 16Ur teẓrim ara d akken ma tuɣalem d aklan n yiwen i wakken ad iḍebber fell-awen, ilaq ad as-taɣem awal ama d ddnub ittawin ɣer lmut ama d ṭṭaɛa n Yillu i yettawin ɣer tudert taḥeqqit. 17Lameɛna ad neḥmed Illu imi zik tellam d aklan n ddnub, ma tura tḍuɛem s wulawen-nwen awal i tlemdem. 18Tettusellkem-d si ddnub tuɣalem d aklan n lḥeqq. 19Tura ad wen-d-hedṛeɣ s lɛeqliya-nwen i wakken ad tfehmem axaṭer annect-agi yewɛeṛ i lefhama. Am akken tsellmem iman-nwen zik d aklan i lɛaṛ i wakken ad txedmem lɛaṛ, tura sellmet iman-nwen d aklan i lḥeqq d ṣṣwab i wakken ad teṣfu tudert-nwen. 20Asmi tellam d aklan n ddnub texḍam i lḥeqq. 21Acu i trebḥem s lecɣal-nni s wayes i tesseḍḥam tura, lecɣal-nni i yettawin ɣer lmut. 22Tura tettwasellkem si ddnub, tuɣalem d iqeddacen n Yillu, lfayda-nwen d tikli deg webrid yeṣfan akked tudert n dayem. 23Axaṭer lexlaṣ n ddnub d lmut, meɛna tikci n Yillu, d tudert n dayem di Yasuɛ Lmasiḥ Ssid-nneɣ.
Currently Selected:
At Ṛuma 6: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.