At Ṛuma 5
5
Talwit n wid yumnen s Lmasiḥ
(1 Buṭ 1.3-9; 1 Yuḥ 4.9-10)
1Tura imi nuɣal d iḥeqqiyen s liman, ters-d lehna gar-aɣ d Yillu s Ssid-nneɣ Yasuɛ Lmasiḥ. 2Yis daɣen i nufa abrid s liman ɣer ṛṛeḥma-agi deg i nella tura. Lfeṛḥ-nneɣ, d asirem nesɛa d akken ad ntekki di lɛaḍima n Yillu. 3Ula di lmeḥnat, nettili di lfeṛḥ axaṭer neẓra lmeḥna tettawi-d ṣṣber, 4ṣṣber isseǧhad deg ujeṛṛeb, lǧehd deg ujeṛṛeb ittawi-d asirem. 5Asirem-agi ulac deg-s lexdeɛ, axaṭer leḥmala n Yillu teẓẓa deg ulawen-nneɣ s Ṛṛuḥ imqeddes i aɣ-d-ittunefken.
6Asmi akken i aɣ-iɣleb ddnub ur as-nezmir ara, Lmasiḥ immut ɣef ddemma n imednuben di lweqt ilaqen. 7Iwɛeṛ i wemdan ad iqbel ad immet ɣef ddemma n uḥeqqi ; ahat ad yili win ara iqeblen ad immet ɣef ddemma n wemdan yelhan ; 8ma d Lmasiḥ, netta yemmut fell-aɣ mi akken nella d imednuben ; s wakka i aɣ-d-ibeggen Yillu leḥmala-ines. 9Imi nuɣal tura d iḥeqqiyen ɣer Yillu s idammen n Lmasiḥ yuzzlen fell-aɣ, s yis daɣen ara nettusellek seg urrif n Yillu. 10Asmi akken nella d iɛdawen-is, ifka-d Mmi-s i wakken s lmut-is ad aɣ-issemṣalaḥ yid-s. Tura imi nemṣalaḥ d Yillu, ad nettusellek daɣen s tudert n Mmi-s. 11Mačči d ayagi kan, lameɛna tura lfeṛḥ-nneɣ atan deg Illu, s Ssid-nneɣ Yasuɛ Lmasiḥ i aɣ-issemṣalaḥen tura yid-s.
Adem akked Lmasiḥ
(1 Kur 15.21-22, 45-49, 56-57)
12S wakka ihi, ddnub ikcem-d ɣer ddunit s yiwen wemdan, amdan-agi d Adem ; ddnub-agi yewwi-d lmut, lmut tḥuza akk imdanen, axaṭer imdanen meṛṛa denben. 13Uqbel ad d-ifk Yillu ṭawrat i Musa, ddnub yella yakan di ddunit ; meɛna anida ulac asaḍuf, ulac lḥisab ɣef ddnub. 14Ɣas akka, si zzman n Adem armi d zzman n Musa lmut teḥkem ula ɣef yimdanen ur nɛuṣa ara Illu am akken i t-iɛuṣa Adem, netta yellan d lemtel n win ara d-yasen. 15Ur nezmir ara ad nemtel ddnub n Adem ɣer lemziya d ṛṛeḥma n Yillu ; Adem iɛuṣa Illu yiwet n tikkelt iwwi-d lmut i yimdanen meṛṛa, acḥal ihi meqqret akteṛ ṛṛeḥma n Umeɣlal i d-ittunefken i yimdanen s Yasuɛ Lmasiḥ. 16Ṛṛeḥma-agi n Yillu mačči am ddnub n yiwen wemdan. Axaṭer yiwen n ddnub iwwi-d lḥisab d lɛiqab, ma d ṛṛeḥma n Yillu, tettekkes lḥisab d lɛiqab ɣef waṭas n ddnubat. 17Ma yella lmut teḥkem ɣef yimdanen meṛṛa s ddnub n yiwen wemdan, ihi wid iwumi d-tettunefk ṛṛeḥma d lḥeqq, ad ḥekmen yerna ad idiren s Yasuɛ Lmasiḥ.
18S wakka, ddnub n yiwen wemdan isseɣli-d lɛiqab ɣef yimdanen meṛṛa, akken daɣen lḥeqq i yexdem yiwen wemdan, iwwi-d leslak i yessidiren imdanen meṛṛa. 19Ihi am akken aɛaṣi n yiwen wemdan, yerra aṭas n yimdanen d imednuben, akken daɣen ṭṭaɛa n yiwen wemdan terra aṭas n yimdanen d iḥeqqiyen.
20Asaḍuf iger-d iman-is i wakken ad d-ibeggen acḥal meqqer ddnub, lameɛna anda yekteṛ ddnub, ṛṛeḥma n Yillu meqqret akteṛ. 21S wakka ddnub iḥkem s lmut, ma d ṛṛeḥma n Yillu teḥkem s lḥeqq, tettawi ɣer tudert n dayem s Yasuɛ Lmasiḥ Ssid-nneɣ.
Currently Selected:
At Ṛuma 5: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.