At Ṛuma 13
13
Qadṛet lḥukuma
(1 Buṭ 2.13-17)
1Yal amdan, ilaq ad iqadeṛ iduba ɛlayen, axaṭer ulac adabu ur d-nekki ara sɣuṛ Yillu, yerna iduba yellan, d Illu i ten-isbedden. 2S wakka ihi, win ara ixalfen adabu, iɛuṣa lameṛ n Yillu, yerna imɛuṣa ad d-sseɣlin lɛiqab ɣef yiman-nsen. 3Inesduba ur ttwaggaden ara mi ara nexdem ayen yelhan meɛna mi ara nexdem ayen n diri. Ma ur tebɣiḍ ara ad taggadeḍ adabu, xdem ayen ilhan dɣa ad ak-cekkṛen, 4axaṭer iqeddec ɣef Yillu i nnfeɛ-inek. Meɛna ma txeddmeḍ cceṛ, ɣas aggad axaṭer ur iṭṭif ara ajenwi baṭel, imi ɣef Yillu i iqeddec i wakken ad d-isbeggen urrif-is ɣer win ixeddmen cceṛ. 5Ɣef wayagi yewwi-d ad t-nḍuɛ, mačči kan ɣef tuggdi n lɛiqab meɛna i lmend n lxaṭer-nneɣ.
6Daymi i tettxelliṣem tabzert, axaṭer wid ittḍebbiren deg wannect-agi, xeddmen ccɣel-nsen akken i t-d-yenna Yillu. 7Rret i mkul yiwen lḥeqq-is : Tabzert i win i wen-ittalasen tabzert, lemkes i win i wen-ittalasen lemkes, tuggdi i win ittalasen tuggdi, leqdeṛ i win i wen-ittalasen leqdeṛ.
Win iḥemmlen lɣiṛ-is
8Ɣuṛ-wat ad wen-ittalas yiwen lḥaǧa anagar leḥmala n wway gar-awen, axaṭer win iḥemmlen wiyaḍ, atan ixdem ayen akk i d-tenna ṭawrat. 9Axaṭer lumuṛat i d-iqqaren : Ur txeddmeḍ ara lɛaṛ, ur tneqqeḍ ara, ur tettakreḍ ara, ur teṭṭamaɛeḍ ara#13.9 Walit Tuffɣa 20.13-17., akked lumuṛat nniḍen meṛṛa nnejmaɛen deg wawal-agi : Ad tḥemmleḍ lɣiṛ-ik am yiman-ik#13.9 Walit At Lawi 19.18.. 10Win yesɛan leḥmala deg ul-is ur ittḍurru ara wiyaḍ, ihi win iḥemmlen wiyaḍ, ixdem ayen akk i d-tenna ṭawrat.
Ddut skud mazal tafat
11Imi teẓram d acu n lweqt i deg nella, tura yewweḍ-d lawan i deg ara d-akim seg iḍes axaṭer ass n leslak iqeṛṛeb-d ɣuṛ-neɣ akteṛ n wass amezwaru i deg numen. 12Qṛib ad ikfu yiḍ, iteddu ad yali wass, ad nḍegger akkin ɣef yiman-nneɣ lexdayem n ṭṭlam, ad nels leslaḥ n tafat. 13Ad nelḥu ɛinani s tezdeg akked ṣṣfawa di tafat n wass ; xḍut i ssikṛan d ccehwat, i leɛdez d lexdayem icemten, i čaqlalat d tismin. 14Meɛna lset tudert tamaynut yellan di Yasuɛ Lmasiḥ, ur ttaǧǧat ara iman-nwen ad kkun-yawi ṭṭmeɛ n lebɣi n tnefsit-nwen.
Currently Selected:
At Ṛuma 13: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.