At Ṛuma 14
14
Ttemqadaṛet wway gar-awen
(1 Kur 4.3-5; 8.1-13; 10.23-33)
1Qeblet gar-awen win ur neǧhid ara di liman, ur kkatet ara deg-s ma ixuṣṣ di lefhama.
2Axaṭer yiwen yumen d akken yezmer ad ičč kullec, wayeḍ ixuṣṣen di liman ittkukru, itett kan lxeḍra. 3Win itetten kullec ur ilaq ara ad iḥqeṛ win ur ntett ara, win ur ntett ara ur ilaq ara daɣen ad iḥaseb win itetten, axaṭer iqbel-it Yillu akken yella. 4D acu-k kečč i wakken ad tḥasbeḍ aqeddac n wayeḍ ? Ma ixdem ccɣel-is neɣ iqqim, ayagi d ccɣel n umɛellem-is ! Meɛna ad ibedd ɣer ccɣel-is, axaṭer Illu yezmer ad t-iṭṭef ur iɣelli ara.
5Ḥed iqqar llan wussan yesɛan azal kteṛ n wiyaḍ, wayeḍ iqqar ussan akk ɛedlen ur mxalafen ara. Mkul yiwen ilaq ad itḥeqqeq deg wayen ittxemmim.
6Win ittaken azal i wussan akteṛ n wiyaḍ, ixeddem ayagi i Umeɣlal, win itetten kullec, itett s wul yeṣfan axaṭer ittḥemmid Illu ɣef wayen itett ; win ur ntett ara kullec, ixdem ayagi s wul yeṣfan imi ula d netta ittḥemmid Illu ɣef wayen itett. 7Ihi ulac win ittɛicin i yiman-is, ulac daɣen win immuten i yiman-is. 8Axaṭer ma nedder, nedder i Umeɣlal, ma nemmut, nemmut i Umeɣlal. Ihi ama nedder ama nemmut, nekni d ayla n Umeɣlal. 9Axaṭer Lmasiḥ immut, yerna yeḥya-d i wakken ad yili d Ssid n wid immuten akked wid iddren. 10Ma d kečč acuɣer i tettḥasabeḍ gma-k ? Acuɣer i t-tḥeqṛeḍ ? Ɛni ur nettɛeddi ara akk zdat n ccṛeɛ n Yillu ? 11Axaṭer yura :
Nekk Ameɣlal, ggulleɣ s yixf-iw,
d akken yal tagecrirt ad teknu zdat-i,
yal iles ad iḥmed Illu # 14.11 Walit
Icaɛya 45.23. .
12Axaṭer yal yiwen deg-neɣ ad ittuḥaseb zdat Yillu ɣef wayen ixdem.
Ḥadret atmaten-nwen di liman
13Ur ttemḥasabet ara ihi wway gar-awen, meɛna ḥadret iman-nwen i wakken ur txeddmem ara ayen ara yesseɣlin atmaten-nwen di ddnub.
14Ẓriɣ yerna tḥeqqeqeɣ di Yasuɛ, d akken ulac ayen ineǧsen di timmad-is ; meɛna win iḥesben kra inǧes, ayenni yenǧes i netta. 15Ma tesḥezneḍ gma-k ɣef ddemma n wayen i tettetteḍ ur tesɛiḍ ara lmaḥibba. Ḥader ihi ad tiliḍ s lmakla-inek, d sebba n uɣelluy i gma-k i ɣef immut Lmasiḥ. 16Ayen tḥesbem kunwi d ayen ilhan, ur ilaq ara ad yili d sebba s wayes ara wwten deg-wen wiyaḍ. 17Axaṭer tagelda n Yillu mačči d lmakla neɣ d tissit meɛna d lḥeqq, d lehna akked lfeṛḥ s Ṛṛuḥ imqeddes. 18Win iteddun akka deg webrid n Lmasiḥ, ad iɛǧeb i Yillu, yerna ad yiɛziz ɣer yimdanen. 19S wakka ihi, ad nnadi ɣef wayen ara aɣ-d-yawin lehna, d wayen ara aɣ-isnernin di liman. 20Ur ssexṛab ara ccɣel n Yillu deg ul n gma-k ɣef ddemma n lmakla. S tidett, ayen akk ittmaččan d leḥlal, lameɛna d leḥṛam fell-ak ma telliḍ d sebba n uɣelluy n gma-k ɣef ddemma n wayen i tettetteḍ. 21I wakken ur tettiliḍ ara d sebba n uɣelluy n gma-k, xḍu i lmakla n weksum immezlen i ssadatt neɣ tissit n ccṛab, d wayen akk izemren ad isseɣli gma-k di ddnub. 22Ayen s wayes tumneḍ keččini, eǧǧ-it i yiman-ik gar-ak d Yillu. D aseɛdi win ur nesseḍlam ara iman-is deg wayen i ixeddem. 23Meɛna win ittcukkun deg wayen itett, d leḥṛam fell-as, axaṭer ur itett ara s nneya. Kra n wayen ur nettwaxdam ara s liman d nneya, d leḥṛam.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.