At Ṛuma 12
12
Tikli tamaynut akked Lmasiḥ
(Ifs 4.1-16; 1 Kur 12.12-27)
1Ad kkun-nhuɣ ihi ay atmaten i lmend n ṛṛeḥma n Yillu i wakken ad tqeddmem tifekkiwin-nwen am wesfel iddren, iṣfan ara iɛeǧben i Yillu ; d wagi i d aɛbad-nwen s ṛṛuḥ. 2Ur ttɛanadet ara lǧil-agi n tura, meɛna ǧǧet Illu ad ibeddel ixemmimen-nwen d lɛeqliya-nwen i wakken ad tissinem lebɣi-ines : Ayen ilhan, ayen iṣfan ur nesɛi lɛib, d wayen akk i t-iɛeǧben.
3S ṛṛeḥma i yi-d-ittunefken, ad d-iniɣ i mkul yiwen deg-wen : Ur ssimɣuṛet ara iman-nwen, sqenɛet akken tellam, ddut s neyya ɣef leḥsab n liman i wen-d-ifka Yillu. 4Am akken nesɛa aṭas n iselqam di tfekka-nneɣ, meɛna mkul yiwen seg iselqam-nni s lxedma-ines, 5akken daɣen nekni, ɣas deg waṭas yid-neɣ i nella, s tdukli-nneɣ nettili d yiwet n tfekka di Lmasiḥ, aql-aɣ meṛṛa d iselqam wway gar-aneɣ, wa yeḥwaǧ wayeḍ. 6Lameɛna di ṛṛeḥma-ines, Illu yefka-yaɣ-d tikciwin imxalafen : Ilaq yal yiwen ad ixdem ayen i as-d-ifka Yillu, akken ilaq, s wul d liman : 7Ama d axebbeṛ sɣuṛ Yillu s Ṛṛuḥ imqeddes, ama d leqdic, 8ama d aselmed, neɣ d nehhu. Ilaq daɣen win ittseddiqen, ad iseddeq mebla ṭṭmeɛ, win ittḍebbiren ad iḍebber s ṣṣwab, win ittḥunun ɣef yimeɣban ilaq ad iḥun fell-asen s wul-is.
9Ilaq ad tili leḥmala-nwen teṣfa ; keṛhet cceṛ, ṭṭfet deg wayen ilhan. 10Sɛut daymen leqdeṛ wway gar-awen ; sɛut leḥnana, myeḥmalet s leḥmala n tegmatt. 11Qedcet ɣef Umeɣlal s wulawen-nwen d wayen yellan di tezmert-nwen, zewṛet, ur ttilit ara d imeɛdazen. 12Feṛḥet ɣef ddemma n usirem i tesɛam, sɛut ṣṣber di tegnitt n ccedda, deɛɛut dayem ɣer Yillu, ur ḥebbset ara. 13Ɛiwnet atmaten-nwen di liman deg wayen uḥwaǧen, steṛḥbet s lfeṛḥ s wid i d-ittasen ɣuṛ-wen.
14Dɛut s lxir i wid i kkun-ittqehhiṛen, deɛɛut s lxir, ur deɛɛut ara s cceṛ.
15Feṛḥet d wid ifeṛḥen, ttrut d win ittrun.
16Ur xeddmet ara lxilaf wway gar-awen, ur ssimɣuṛet ara iman-nwen meɛna ddut s wannuz, ur ḥettbet ara iman-nwen d wid yessnen#12.16 Walit Inzan 3.7..
17Ur ttarrat ara ttaṛ seg wid i kkun-iḍurren, nadit ɣef wayen ilhan zdat yimdanen meṛṛa. 18Ma yella wamek ara d-tekk sɣuṛ-wen lehna, ilit di lehna akked yimdanen meṛṛa. 19Ur ttarrat ara ttaṛ ay imeɛzuzen, lameɛna ǧǧet kullec gar ifassen n Yillu, d netta ara ixedmen ccɣel-is. Atah wayen yuran di Tira Iqedsen : D nekk ara yerren ttaṛ, ara yerren i yal yiwen ayen yuklal#12.19 Walit Asmekti 32.35., i d-yenna Umeɣlal. 20Yura daɣen :
Ma yelluẓ weɛdaw-ik efk-as ad ičč,
ma yeffud efk-as ad isew,
axaṭer ma txedmeḍ akka,
am akken d tirgin iṛeqqen ara tesserseḍ ɣef uqerruy-is # 12.20 Inzan 25.21-22. .
21Ur ttaǧǧa ara cceṛ ad ak-iɣleb, lameɛna ɣleb cceṛ s lxir.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.