Matta 11
11
Imceggɛen n Yeḥya Aɣeṭṭas
1Mi iweṣṣa Yasuɛ tnac yinelmaden-is, iṛuḥ Yasuɛ syenna ad ibecceṛ di tudrin n lejwahi-nni.
2Yeḥya yellan di lḥebs, isla s lecɣal n Lmasiḥ, iceggeɛ ɣuṛ-s inelmaden-is i wakken ad as-inin : 3D kečč i d win akken ara d-yasen neɣ ilaq-aɣ ad neṛǧu wayeḍ ? 4Yasuɛ yerra-yasen-d : Ṛuḥet ssiwḍet-as lexbeṛ i Yeḥya ɣef wayen twalam d wayen teslam : 5Iderɣalen ttwalin, iqudaṛen leḥḥun, ibeṛsiyen ṣeffun, iɛeẓẓugen sellen, lmeyytin ḥeggun-d, Lexbeṛ n Lxir ittubecceṛ i yimeɣban. 6D aseɛdi win iwumi ur ttiliɣ ara d sebba n tuccḍa#11.6 Neɣ : D aseɛdi win ur nettagi ara ad yamen yis-i. !
7Mi ṛuḥen yinelmaden-is, ibda Yasuɛ iheddeṛ i lɣaci ɣef Yeḥya : D acu i tṛuḥem ad t-d-teẓrem deg unezruf ? D aɣanim itthuzzu waḍu ? 8Ɣer wacu i tṛuḥem ad tfeṛǧem ? Ɣer yiwen wergaz yelsan llebsa ifazen ? Wid ittlusun llebsa ifazen, deg ixxamen n igelliden i ttilin. 9Anwa i ɣer tṛuḥem ad t-d-teẓrem ihi ? D yiwen n nnbi ? D tidett ih, d nnbi ! Ad wen-iniɣ : Yugar nnbi. 10Axaṭer d netta i ɣef yura : Atan ad zewwreɣ zdat-k amceggeɛ-inu, i wakken ad iheggi abrid zdat-k#11.10 Walit Malaxi 3.1; Icaɛya 40.3.. 11Ad wen-iniɣ tidett : Ulac mmi-s n tmeṭṭut yugaren Yeḥya Aɣeṭṭas. Lameɛna, amecṭuḥ maḍi di tgelda n igenwan, meqqer akteṛ-is. 12Seg wussan i deg ittbecciṛ Yeḥya Aɣeṭṭas armi d tura, tagelda n igenwan tettuweddef i nncaf, yerna d imencaf i t-ittḥawaṣen. 13Axaṭer lanbiya meṛṛa akked usaḍuf hedṛen-d ɣef tgelda n igenwan armi d lweqt n Yeḥya Aɣeṭṭas. 14Ma tebɣam ad tfehmem, d netta i d Iliya-nni ilaqen ad d-yas. 15Win yesɛan imeẓẓuɣen, isel-d !
16Ɣer wuɣuṛ ara metleɣ lǧil-agi ? Icuba ɣer warrac yeqqimen deg uzniq, ssawalen i warrac nniḍen, qqaren-asen :
17Newwet-awen-d ajewwaq
ur tecḍiḥem ara,
necna-yawen-d ccnawi n leḥzen
ur tmeǧǧdem ara.
18Axaṭer Yeḥya yusa-d, ur itett ur itess, tennam : Izdeɣ-it uṛuḥani. 19Mmi-s n wemdan yusa-d, itett, itess am wiyaḍ, teqqarem : Ittxemmim kan ɣef wučči d tissit, d ameddakel n imekkasen n tebzert ixeddaɛen akked yir imdanen lameɛna tidett tban-d s lecɣal-is.
Timdinin yugin ad amnent
(Lq 10.13-15)
20Yasuɛ ibda ittlummu timdinin-nni i deg ixdem aṭas n lbeṛhanat, axaṭer imezdaɣ-is ur d-uɣalen ara ɣer webrid n Ṛebbi. 21A nnger-im a tamdint n Kurazin ! A nnger-im a tamdint n Bitsayda ! Axaṭer lemmer lbeṛhanat iḍran deg-kunt ḍran di temdinin n Ṣur akked Ṣidun, tili imezdaɣ-nsent aṭas aya seg mi sburren tacekkaṛt n leḥzen, qqimen ɣef yiɣiɣden i wakken ad d-sbeggnen d akken ndemmen uɣalen-d ɣer ubrid n Yillu. 22Daymi, imezdaɣ n temdinin-agi ad ttuɛaqben akteṛ n wid n temdinin n Ṣur akked Ṣidun. 23Ula d kemm a tamdint n Kafernaḥum, tɣileḍ ad taliḍ ɣer igenni ? Xaṭi ! Ad tettwiḍeggreḍ ɣer laxeṛt ; axaṭer lemmer di temdint n Sudum i ḍran lbeṛhanat i yeḍran ɣuṛ-m, tili mazal-itt ar ass-a ! 24Daymi, ass n lḥisab aneggaru ad tettuɛaqbeḍ akteṛ n temdint n Sudum.
Azaglu fessusen
(Lq 10.21-22)
25Di lweqt-nni, Yasuɛ inṭeq yenna : Ḥemdeɣ-k a Baba, Illu n igenwan d lqaɛa, imi i d-tessekneḍ i yimecṭaḥ ayen i teffreḍ i wukyisen d imusnawen. 26Ih a Baba ! Ḥemdeɣ-k imi d wagi i d lebɣi-k.
27Baba yerra kullec gar ifassen-iw. Yiwen ur issin Amemmit anagar Ababat ! Yiwen ur issin Ababat anagar Amemmit akked win iwumi yebɣa Umemmit ad t-id-isken.
28Aset-d ɣuṛ-i a wid akk iɛyan, iɛebban taɛekkumt ẓẓayen, ad wen-fkeɣ asteɛfu. 29Refdet ɣef tuyat-nwen azaglu-inu tlemdem sɣuṛ-i, axaṭer ul-iw iččuṛ d ṛṛeḥma yerna d aḥnin, ad tafem talwit i teṛwiḥin-nwen. 30Azaglu-inu ishel, taɛekkumt-iw fessuset.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.