Matta 10
10
Tnac inelmaden imezwura
(Mq 3.13-19; Lq 6.12-16)
1Yasuɛ issawel i tnac n inelmaden-is, ifka-yasen tazmert s wayes ara ssufuɣen leǧnun, ara sseḥluyen mkul aṭṭan d mkul lɛib.
2Ha-ten-an yismawen n tnac-nni inelmaden n Yasuɛ :
Amezwaru d Semɛun ittusemman Buṭrus akked gma-s Andriyus, Yaɛqub mmi-s n Zabadi akked gma-s Yuḥenna, 3Filbas d Bartelmay, Ṭuma akked Matta amekkas n tebzert, Yaɛqub mmi-s n Ḥalfi akked Taddi ; 4Semɛun awaṭani, Yudas n Qeṛyut, win akken izzenzen Yasuɛ.
5Yasuɛ iceggeɛ tnac-agi n inelmaden-is, iweṣṣa-ten :
Ur ttṛuḥut ara ɣer tmura tibeṛṛaniyin, ur keččmet ara ɣer temdinin n wat Samarya ; 6ṛuḥet axir ɣer wulli iḍaɛen n wat Isṛail. 7Mi ara tetteddum, ttbecciṛet qqaret : Attaya tgelda n igenwan tqeṛṛeb-d ! 8Sseḥlut imuḍan, sseḥyut-d lmeyytin, ssizedget wid ihelken lbeṛs, ssufɣet leǧnun. Akken i wen-d-ittunefk mebla idrimen, fket ula d kunwi mebla idrimen. 9Ur ttawit yid-wen la uṛeɣ, la lfeṭṭa, la idrimen ; 10ur ttawit yid-wen agrab neɣ sin iqendyaṛ, ur ttawit irkasen neɣ aɛekkaz, axaṭer axeddam yuklal lqut-is.
11Di yal tamdint neɣ taddart anda ara tkecmem, steqsit ma yella win ara yesṭerḥben yis-wen, qqimet ɣuṛ-s alamma tekkrem ad tṛuḥem. 12Mi ara tkecmem ɣer yiwen wexxam, sellmet fell-asen, 13ma steṛḥben yis-wen, lehna-nwen ad ters fell-asen ; ma ur steṛḥben ara yis-wen, lehna-nwen ad teqqim ɣuṛ-wen. 14Ma ur qbilen ara ad setṛeḥben yis-wen neɣ ad semḥessen i wawal, ffɣet seg wexxam-nni neɣ si temdint-nni, zwit ula d aɣebbar seg iḍarren-nwen. 15Ad wen-iniɣ tidett : Ass n lḥisab, imezdaɣ n temdint-agi ad ttuɛaqben akteṛ n temdinin n Sudum akked Gumur#10.15 Walit Amezruy n talsa 18-19..
Aqehheṛ i d-iteddun
(Mq 13.9-13; Lq 21.12-17)
16Atan, ad kkun-ceggɛeɣ am ulli gar wuccanen, ḥeṛcet ihi am izerman, tesɛum neyya am yetbiren. 17Ḥadret ɣef yiman-nwen, axaṭer kra n yimdanen ad kkun-sbedden ɣer ccṛeɛ ; yerna ad kkun-wwten s ujelkaḍ di leǧwameɛ-nsen. 18Ɣef ddemma n yisem-iw, ad kkun-sbedden zdat lḥekkam akked igelliden, i wakken am nutni am at leǧnas nniḍen, ad slen s yisem-iw. 19Mi ara kkun-ṭṭfen, ur ttḥebbiṛet ara ɣef wamek ara temmeslayem, neɣ ɣef wayen ara d-tinim, imeslayen ara d-tinim, ad wen-d-ttunefken di teswiɛt-nni kan. 20Axaṭer mačči d kunwi ara imeslayen, meɛna d Ṛṛuḥ n Baba-twen ara d-immeslayen seg-wen.
21Amdan ad ifk gma-s ɣer lmut, ababat ad ifk mmi-s, dderya ad d-kkren ɣer imawlan-nsen, ad ten-ssiwḍen ɣer lmut. 22Ad kkun-keṛhen irkul ɣef ddemma n yisem-iw, meɛna win ara yeṭṭfen alamma d taggara, ad ittusellek. 23Mi ara tettwiqehṛem deg yiwet n temdint, rewlet ɣer tayeḍ. Ad wen-iniɣ tidett : Mmi-s n wemdan ad d-yas uqbel ad d-tekkem tudrin meṛṛa n tmurt n wat Isṛail.
24Ulac anelmad yugaren ccix-is neɣ aqeddac yellan sennig umɛellem-is. 25Akken ittwaḥseb ccix ara yettwiḥseb unelmad-is. Daɣen akken yella wemɛellem ara yili uqeddac-is. Ma semman i bab n wexxam Balzabul#10.25 Neɣ : Ameqqran n leǧnun, d isem nniḍen i ssexdamen i cciṭan., amek ur ttsemmin ara akkenni i wat wexxam-is !
Sɛut tissas
(Lq 12.2-7)
26Ur ten-ttaggadet ara ihi ! Axaṭer kra n wayen iffren ad d-iban, kra n lbaḍna yellan ad d-tban. 27Ayen i wen-qqareɣ deg iḍ, init-tt deg uzal, ayen i wen-d-nnan ɣer umeẓẓuɣ, berrḥet-tt sufella n ssqef. 28Ur ttaggadet ara wid ineqqen tafekka lameɛna ur zmiren ara ad nɣen ṛṛuḥ, aggadet win izemren ad iḍegger ṛṛuḥ akked tfekka ɣer ǧahennama. 29Ɛni ur znuzun ara sin iẓiwcen s uṣurdi ? Meɛna ula d yiwen deg-sen ur d-iɣelli ɣer lqaɛa mebla lebɣi n Baba-twen. 30Ula d anẓaden uqerruy-nwen ttwaḥesben irkulli. 31Ihi ur ttaggadet ara : Tesɛam azal akteṛ n waṭas n iẓiwcen !
32Kra win ara icehden yis-i zdat yimdanen, ula d nekk, ad cehdeɣ s yis zdat n Baba yellan deg igenwan. 33Kra win ara iyi-nekṛen zdat yimdanen, ad t-nekkṛeɣ ula d nekk zdat Baba yellan deg igenwan.
34Ur ttɣilet ara d talwit i d-usiɣ ad d-awiɣ ɣer ddunit ; ur d-usiɣ ara ad d-awiɣ talwit, meɛna d ajenwi. 35Axaṭer wwiɣ-d beṭṭu gar weqcic d baba-s, gar teqcict d yemma-s, gar teslit d temɣaṛt-is, 36ad d-kkren yeɛdawen seg at wexxam. 37Win iḥemmlen baba-s d yemma-s neɣ mmi-s d yelli-s akteṛ-iw ur yuklal ara ad yili d anelmad-iw.
38Kra win ur neqbil ara ad inɛettab ɣef ddemma n yisem-iw i wakken ad iyi-itbeɛ, ur yuklal ara ad yili d anelmad-iw.
39Win iḥerzen taṛwiḥt-is, ad as-tṛuḥ, ma d win ara isebblen taṛwiḥt-is ɣef ddemma-w ad yuɣal ad tt-yaf.
40Win isṭerḥben yis-wen, yis-i i yesteṛḥeb, win isṭerḥben yis-i, isteṛḥeb s win i yi-d-iceggɛen. 41Win isṭerḥben s nnbi imi d nnbi i yella, ad as-d-ittunefk wayen yuklal nnbi, win isṭerḥben s uḥeqqi imi d aḥeqqi i yella, ad as-d-ittunefk wayen yuklal uḥeqqi. 42Kra n win ara yefken lkas n waman isemmaḍen i yiwen seg imecṭuḥen-agi imi d anelmad-iw i yella, ad wen-iniɣ tidett : Ur as-ittṛuḥ ara lḥeqq yuklal.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.