Lecɣal n Imceggɛen 7
7
Stifanus zdat n useqqamu n ccṛeɛ
1Amesfel ameqqran isteqsa Stifanus yenna-yas : D tidett wayen akka i d-nnan ?
2Stifanus yerra-yas : Ay atmaten, ay imɣaṛen n wat Isṛail, ḥesset-iyi-d ! Illu di lɛaḍima-s tameqqrant, isbeggen-d iman-is i jeddi-tneɣ Ibrahim, mi yella di tmurt n Igarsaffen#7.2 Walit Amezruy n talsa 24.10 akked tezmilt. uqbel ad izdeɣ di temdint n Ḥaran#7.2 Tamdint n Haran tezga-d azal n meyya kilumitrat ɣer usamar n Lfurat, deg wenẓul n Surya ; walit Amezruy n talsa 11.31.. 3Yenna-yas : Ffeɣ si tmurt-ik, si tmurt n imawlan-ik, tṛuḥeḍ ɣer tmurt ara ak-d-ssekneɣ#7.3 Walit Amezruy n talsa 12.1.. 4Iffeɣ ihi si tmurt n Ikaldaniyen, iṛuḥ ad izdeɣ di temdint n Ḥaran. Mi yemmut baba-s, Illu yewwi-t-id ɣer tmurt-agi i deg tzedɣem tura. 5Illu ur as-ifki ara di tmurt-agi ula d azal n terdast i deg ara yessers aḍar-is ; meɛna iwɛed-as ad as-ifk tamurt-agi i netta d dderya n dderya-s#7.5 Walit Amezruy n talsa 13.15. ɣas akken imiren mazal ur isɛi ara dderya, Illu yenna-yas : 6Dderya n dderya-k ad tezdeɣ deg yiwet n tmurt tabeṛṛanit, dinna ad ten-rren d aklan, ad sɛeddin fell-asen lḥif azal n ṛbeɛ meyya yiseggasen. 7Lameɛna Illu yenna-d : Ad uɣalen ad d-ffɣen si tmurt-nni, ad iyi-ɛebden deg wemkan-agi ; ma d lǧens-nni i ten-irran d aklan, d nekk ara ten-iḥasben#7.7 Walit Amezruy n talsa 15.13-14 ; Tuffɣa 12.40.. 8Dɣa Illu yefka-d i Ibrahim tamsisit n ṭṭhaṛa. S wakka, mi d-yesɛa mmi-s Isḥaq, Ibrahim isseḍher-as deg wass wis tmanya n tlalit-is. Isḥaq daɣen ixdem akken i mmi-s Yaɛqub ; ula d Yaɛqub isseḍher i tnac-nni warraw-is yellan d lejdud-nneɣ.
9Ihi arraw-agi n Yaɛqub usmen ɣef gma-tsen Yusef, kkren zzenzen-t ɣer tmurt n Maṣer anda yuɣal d akli. 10Lameɛna Illu yella yid-s, ittsellik-it si tegnatin n ccedda ; issers-d fell-as ṛṛeḥma yerna-yas-d leɛqel s wayes ara yiɛziz ɣer Ferɛun agellid n tmurt n Maṣer. Ferɛun isbedd-it d lḥakem ɣef tmurt-is akked wexxam-is meṛṛa.
11Yeɣli-d laẓ ɣef tmurt n Maṣer akked tmurt n Kanɛan, d lweqt n ccedda tameqqrant ; lejdud-nneɣ ur ufin ara ayen ara ččen. 12Mi yesla Yaɛqub d akken llan yirden di tmurt n Maṣer, iceggeɛ ɣer dinna tikkelt tamezwarut, arraw-is yellan d lejdud-nneɣ. 13Mi uɣalen tikkelt tis snat, Yusef isbeggen-d iman-is ɣer watmaten-is, ɛeqlen-t d netta. Yuɣal Ferɛun iẓra seg wansi i d-yekka Yusef. 14Yusef iceggeɛ ad d-awin baba-s Yaɛqub akked wat wexxam-is meṛṛa i yellan di xemsa usebɛin yid-sen. 15Yaɛqub yuder ɣer tmurt n Maṣer ikemmel dinna ussan-is armi yemmut, am netta am lejdud-nneɣ. 16Wwin-d iɣsan-nsen ɣer taddart n Cakim, meḍlen-ten deg uẓekka i yuɣ Ibrahim s yedrimen ɣef warraw n Ḥamur n taddart n Cakim.
17Mi d-iwweḍ lweqt i deg ara yeḍru wayen i yewɛed Yillu i Ibrahim s limin, agdud-nneɣ yufa-t-id lḥal innerna s waṭas di tmurt n Maṣer ; 18imiren ikker-d ugellid nniḍen ur nessin ara Yusef. 19Agellid-nni iḥqeṛ lɣaci-nneɣ, ittqehhiṛ lejdud-nneɣ, issaweḍ armi i yefka lameṛ ad ǧǧen arraw-nsen i laẓ#7.19 Walit Tuffɣa 1.15-22. akken kan ara d-lalen, i wakken ur ttidiren ara.
20Di lweqt-nni i d-ilul Musa ; icbeḥ ɣer Yillu. Yettuṛebba deg wexxam n imawlan-is tlata wagguren s tuffra ; 21uɣalen rran-t zdaxel n tqecwalt, serrḥen-as deg wasif ; d yelli-s n Ferɛun i t-id-ijemɛen, tṛebba-t-id am mmi-s. 22Ikker-d gar imaṣriyen, ilmed akk tamusni-nsen ifazen. Yuɣal d argaz amusnaw, izewṛen ama deg yimeslayen ama di lecɣal.
23Mi yessaweḍ ṛebɛin yiseggasen di leɛmeṛ-is, immekta-d atmaten-is at Isṛail, iṛuḥ ad iẓer acu n lḥala i deg ttɛicin. 24Yiwen wass iwala s wallen-is yiwen Umaṣri ikkat yiwen seg wat Isṛail ; ikker ad t-iḥudd, yerra-yas-d ttaṛ ; iwwet amaṣri-nni, yenɣa-t. 25Yenwa ad fehmen watmaten-is d akken s ufus-is ara ten-isellek Yillu ; lameɛna nutni ur fhimen ara. 26Azekka-nni iwala sin yirgazen n wat Isṛail ttnaɣen wway gar-asen, iger iman-is, iɛreḍ ad ten-ifru, yenna-yasen : Ɛni mačči d atmaten i tellam ? Acimi i tettnaɣem wway gar-awen ? 27Lameɛna win akken iḍelmen wayeḍ idemmer Musa yenna-yas : Anwa i ak-irran d aqerruy neɣ d lḥakem fell-aɣ ? 28Ɛni tebɣiḍ ad iyi-tenɣeḍ akken tenɣiḍ amaṣri-nni iḍelli#7.28 Walit Tuffɣa 2.14. ? 29Ɣef ddemma n yimeslayen-agi Musa yerwel, iṛuḥ ad izdeɣ di tmurt n Midyan. Dinna i yesɛa sin n warrac.
30Mi ɛeddan ṛebɛin yiseggasen, iban-as-d yiwen n lmelk deg yiwen uḥeǧǧaǧu n tmes iceɛlen deg yiwen udarnu, mi yella deg unezruf n wedrar n Sinay. 31Musa yewhem deg wayen ittwali ; akken kan iqeṛṛeb ɣuṛ-s, Ameɣlal yessawel-as-d seg uḥeǧǧaǧu-nni n tmes, yenna-yas-d : 32D nekk i d Illu n lejdud-ik, Illu n Ibrahim, n Isḥaq akked Yaɛqub.#7.32 Walit Tuffɣa 3.6. Musa yeqqim ittergigi, yuggad ad irfed ula d allen-is. 33Ameɣlal yenna-yas : Kkes arkasen seg iḍarren-ik axaṭer amkan-agi anda tbeddeḍ d amkan iqedsen. 34Walaɣ lbaṭel iḍerrun d wegdud-iw di tmurt n Maṣer ; sliɣ-d i unazeɛ-nsen ; ṣubbeɣ-d i wakken ad ten-sellkeɣ. Ṛuḥ tura ad ak-ceggɛeɣ ɣer tmurt n Maṣer.
35Musa-nni i nekṛen mi akken i as-nnan : Anwa i ak-irran d imḍebber neɣ d lḥakem ? D netta i d-iceggeɛ Yillu d aqerruy, d amcafeɛ n wegdud ; s lemɛawna n lmelk i as-d-iḍehren deg udarnu ireqqen. 36D netta i ten-id-issufɣen si tmurt n Maṣer. Yexdem aṭas n lbeṛhanat d leɛǧayeb di tmurt-nni, deg ilel Azeggaɣ, deg unezruf n Sinay, anda akken qqimen ṛebɛin yiseggasen. 37D netta daɣen i yennan i wat Isṛail : Ad wen-d-ifk Yillu si gar watmaten-nwen yiwen n nnbi am nekk. 38Asmi akken i yennejmaɛ wegdud deg unezruf, d netta iwumi d immeslay lmelk-nni deg wedrar n Sinay, d netta iwumi d-ifka Yillu imeslayen n tudert i wakken ad aɣ-t-id-issiweḍ. 39Lameɛna lejdud-nneɣ ugin ad as-aɣen awal ; ur t-qbilen ara axaṭer deg ulawen-nsen bɣan ad uɣalen ɣer tmurt n Maṣer. 40Nnan i Harun : Xdem-aɣ-d iṛebbiten am wid n imaṣriyen, ara nezzwer zdat-neɣ, axaṭer Musa-agi i aɣ-d-issufɣen si tmurt n Maṣer, ur neẓri ara d acu i yeḍran yid-s#7.40 Walit Tuffɣa 32.1.. 41Dɣa deg ussan-nni, jemɛen-d uṛeɣ, ssefsin-t xedmen s yis yiwen ugenduz. Imiren zlan-as asfel, xedmen-as tameɣṛa, feṛḥen s wayen xedmen ifassen-nsen. 42Illu yeṭṭaxeṛ fell-asen, iǧǧa-ten ad ɛebden itran n igenni, d ayen i yuran di tektabt n lanbiya :
Ay agdud n wat Isṛail, ɛni i nekk iwumi i d-tefkam lewɛadi d iseflawen,
di ṛebɛin yiseggasen-nni i tesɛeddam deg unezruf ?
43 Xaṭi meɛna tbubbem aqiḍun n Mulux # 7.43 D asebdad i ɛebbden zik-nni yimezdaɣ n tmurt n Kanɛan.
akked yitri n Rufan # 7.43 D itri i ɛebbden yimezdaɣ n tmurt n Kanɛan. i tḥesbem d iṛebbiten-nwen ;
lmeṣnuɛat-nni i txedmem i wakken ad ten-tɛebdem !
Daymi ara kkun-nfuɣ ɣer mebɛid, akkin i temdint n Babil # 7.43 Walit
Ɛamus 5.25-27. !
44Deg unezruf, lejdud-nneɣ llan sɛan aqiḍun n ufniq n temsisit ; aqiḍun-nni ittwaxedmen akken i as-t-id-imla Yillu i Musa mi as-d-yenna : Xdem-it am akken i t-twalaḍ di lemtel i ak-d-ssekneɣ#7.44 Walit Tuffɣa 25.40.. 45Mi d-iwweḍ uqiḍun-nni ɣer ifassen n lejdud-nneɣ, wwin-t-id yid-sen mi i ten-issekcem Yacuɛa#7.45 D anelmad n Musa, d netta i yeskecmen agdud n Isṛail ɣer tmurt n Kanɛan. ɣer tmurt n leǧnas-nni i ssufɣen s tezmert n Yillu. Aqiḍun-nni yeqqim dinna armi d zzman n Dawed, 46i yufan lemziya ɣer Yillu, yessuter-as ad ibnu axxam i Yillu n Yaɛqub#7.46 Walit Ihellilen 132.5 ; 1 Amezruy 17.1.. 47Lameɛna d Sliman i as-ibnan axxam ! 48Ɣas akken Win-Ɛlayen ur izeddeɣ ara deg ixxamen ibnan s ufus n wemdan, akken i d-yenna nnbi Icaɛya :
49 Igenni d akersi n tgeldit-iw,
lqaɛa d takeddart n yiḍarren-iw.
Ameɣlal yenna-d : Acu n wexxam i tzemrem ad iyi-tebnum,
neɣ anda-t wemkan i deg zemreɣ ad steɛfuɣ ?
50 Ɛni mačči d afus-iw i d-ixelqen kullec # 7.50 Walit
Icaɛya 66.1-2. ?
51A wid isbeddayen iɛenqiqen-nsen ! Tesɣaṛayem ulawen-nwen, tqeflem imeẓẓuɣen-nwen, tetteddum di nneqma i Ṛṛuḥ imqeddes am kunwi am lejdud-nwen ! 52Anwa nnbi ur qhiṛen ara lejdud-nwen ? Nɣan wid akk ittbecciṛen si zik ɣef Uḥeqqi ara d-yasen ; tura d kunwi i t-ixedɛen yerna tenɣam-t. 53Tewweḍ-ikun-id ṭawrat s ufus n lmalayek, lameɛna kunwi tugim ad as-taɣem awal !
Lmut n Stifanus
54Mi slan i yimeslayen-agi, imseflen iffeɣ-iten leɛqel, qeṛṛcen tuɣmas-nsen fell-as. 55Lameɛna Stifanus yeččuṛen d Ṛṛuḥ imqeddes, irfed allen-is ɣer igenni, iwala tamanegt n Yillu akked Yasuɛ ibedden ɣer uyeffus n Yillu. 56Imiren iɛeggeḍ, yenna : Atan ttwaliɣ igenwan ldin, ttwaliɣ Mmi-s n wemdan ibedd ɣer tama tayeffust n Yillu ! 57Qeflen imeẓẓuɣen-nsen, bdan ttɛeggiḍen, ẓedmen fell-as akken ma llan. 58Zzuɣṛen-t beṛṛa n temdint, ṛejmen-t s iblaḍen i wakken ad t-nɣen. Inagan ǧǧan iceṭṭiḍen-nsen ɣer yiwen ilemẓi isem-is Cawul, i wakken ad ten-iɛass. 59Mi akken i t-ṛejmen, Stifanus ideɛɛu yeqqar : A Yasuɛ, atan ṛṛuḥ-iw gar ifassen-ik ! 60Imiren iɣli ɣef tgecrar, iɛeggeḍ s lǧehd-is : Ay Ameɣlal ur ten-ttḥasab ara ɣef ddnub-agi ! Akken kan i d-yenna imeslayen-agi, iffeɣ-it ṛṛuḥ.
Currently Selected:
Lecɣal n Imceggɛen 7: TiIq
Highlight
Copy
Compare
Share
Want to have your highlights saved across all your devices? Sign up or sign in
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.