Lecɣal n Imceggɛen 6
6
Sebɛa inelmaden yettwaxtaṛen
1Deg ussan-nni, leḥsab n widak yumnen s Yasuɛ yettzid irennu. At Isṛail i d-yusan si tmura nniḍen, ittmeslayen s tyunanit, cetkan ɣef wat Isṛail yellan di tmurt, axaṭer mi ara feṛqen lmakla, ur d-ttelhayen ara d tuǧǧal-nsen. 2Tnac imceggɛen-nni snejmaɛen-d inelmaden meṛṛa, nnan-asen : Mačči d lḥeqq ad neǧǧ Awal n Yillu di rrif i wakken ad nelhi d wefṛaq n lqut i mkul yiwen. 3Ihi ay atmaten, xtiṛet-d si gar-awen sebɛa yirgazen i deg sɛan laman yimdanen n tmurt meṛṛa, yeččuṛen d Ṛṛuḥ imqeddes akked leɛqel, d nutni ara nwekkel ɣef ccɣel-agi. 4Ma d nekni, lweqt-nneɣ ad t-nesɛeddi di tẓallit akked uselmed n wawal n Yillu.
5Tajmaɛt akk iɛeǧǧeb-as ṛṛay-agi. Kkren xtaṛen-d Stifanus yellan d argaz iččuṛen d liman akked Ṛṛuḥ imqeddes. Xtaṛen daɣen Filbas#6.5 Walit Lecɣal n Imceggɛen 8.5-40 ; 21.8 ; mačči d amceggeɛ Filbas meɛna d Filbas nniḍen kan., Brukurus, Nikanur, Timun, Barmenas, akked Nikulus n temdint n Anṭakya, i ikecmen si zik di ddin n wat Isṛail. 6Wwin-ten-id, sbedden-ten zdat n imceggɛen. Imceggɛen ẓẓullen fell-asen yerna ssersen ifassen-nsen fell-asen.
7Yuɣal wawal n Yillu ittwassen di yal amkan, leḥsab n wid yumnen s Lmasiḥ ittzid irennu di temdint n Urucalim yerna aṭas n imseflen i yumnen, qeblen abrid n Lmasiḥ.
Stifanus ittwaḥbes
8Stifanus yeččuṛen d ṛṛeḥma d tezmert n Yillu, ixeddem lbeṛhanat d leɛǧayeb imeqqranen gar lɣaci. 9Kra n yimdanen si lǧameɛ iwumi qqaren “n iḥeṛṛiyen”#6.9 Tajmaɛt n iḥeṛṛiyen, d tajmaɛt n wid yellan d aklan uɣalen d ilelliyen. i d-yusan si Qiṛwan, si Skandriya, at Isṛail i d-yusan si Silisya d Asya, bdan ttmeslayen akked Stifanus ; 10lameɛna ur zmiren ara ad t-ɣelben deg awal axaṭer ittmeslay s ṣṣwab d leɛqel i as-d-ifka Ṛṛuḥ imqeddes. 11Imiren fkan tajɛelt i kra n yirgazen i wakken ad d-inin : Nesla-yas yekfeṛ ɣef Musa akked Yillu ! 12Sekkren ccwal gar lɣaci d imṛayen akked imusnawen n ṭawrat, dɣa ṭṭfen Stifanus wwten-t, wwin-t ɣer useqqamu n ccṛeɛ. 13Sbedden-d inagan i d-icehden fell-as s zzuṛ, nnan-d : Argaz-agi, yezga yekkat deg wemkan-agi iqedsen akked ṭawrat ! 14Nesla-yas mi yeqqar : Yasuɛ-nni Anaṣari, ad ihudd amkan-agi yerna ad ibeddel lɛaddat i aɣ-d-iǧǧa Musa.
15Wid akk yellan deg useqqamu n ccṛeɛ, reṣṣan allen-nsen ɣef Stifanus ; ttwalin udem-is am akken d udem n lmelk.
Bible en kabyle © Alliance biblique universelle, 2024.
Le travail de traduction, réalisé principalement en Algérie entre 1992 et 2024, a été effectué par l’Association Chrétienne d’Expression Berbère (ACEB) avec le soutien de l’Alliance biblique universelle.