Matayo 22
22
Omugani gw'edinye ly'obuhya
Luuka 14.15-24
1Yeesu agendekera kuderha n'echo chigusho ch'abantu omu migani. Ababwira ntya: 2«oBwami bw'empingu bushushanyizwe na mwami muguma wajiriraga omugala edinye ly'obuhya. 3Oyo mwami arhuma abaja baage baje guhamagala abantu bali balaalikirwe oku dinye. Aliko abo bantu barhashondaga guhika. 4Aja arhuma abandi baja. Ababwira ntya: ‹Muje kubwira abantu nalaalikaga oku dinye oku: ''Namalire kubaaga enka zaani, n'ezindi nyama zishishire. Muje mwayinja oku dinye, bulaala ebintu byooshi byarheganyizwe.''› 5Aliko aboola balaalikwa, barhalagaga n'ogo mulaali, bachigendera omu byaabo. Muguma aja omu shwa lyaage, n'owindi omu burhimbuuzi bwage. 6N'abandi bagwarha aboola baaja, babashurha bwenene n'okubayirha.
7«Oyo mwami aja ayunva oburhe. Arhuma abasoda baage baje kuyirha aboola biisi, banadwike egishagala chaabo. 8Aja abwira abaja baage ntya: ‹Ebiryo by'edinye byahire, aliko abantu nalaalikaga barhali bo balikwaneene kubirya. 9Bunoola, mujaage mwaja omu mashanganjira, n'abantu booshi mwabona, mubabwire bayinje oku dinye.› 10Balaala baja, baaja omu njira banagusha abantu booshi babonaga, ababi n'abenja. N'enju y'edinye yayunjula abahisi.
11«Oyo mwami abeere aja omu nju y'alole abahisi, abona muntu muguma orhayambeere omwambalo gw'edinye. 12Amubaza ntya: ‹Ego mwira waani, gurhe wajaaga muno buzira kuyambala omwambalo gw'edinye?› Oyo muntu arhashubizaga chintu. 13Elugulu w'echo, oyo mwami aja abwira abakozi baage ntya: ‹Oyu muntu, mumushweke amagulu n'amaboko, muje mwamukabula embuga omu mwizimya! Na mw'ogo mwizimya, mw'alakira n'okulibuka bwenene.› 14Oku buzinda, Yeesu aderha ntya: ‹Abantu bahamagerwe bali banene, aliko abagishogerwe bali bageeke.›»
Ogufurha ekooli lya Kayizaari
Mariko 12.13-17; Luuka 20.20-26
15Enyuma z'ebyoola, aBafarisaayo baaja akaligi yi bagale gurhega Yeesu kugerera ebinwa byaage. 16Bamurhumira abigirizwa baabo baguma, haguma n'abandi b'omu chigusho cha Heroode. Bahika kubaza Yeesu ntya: «Mwigiriza, rhuyinji ok'onaderha ebinwa by'okuli, kandi onayigiriza abantu ebinwa bya Nnamahanga ebi bakwaneene gukulikira nk'oku bihemere. Kandi orhayubaha chiro muntu orhanayuubahiswa n'obukulu bw'omuntu. 17Ojaage warhubwira gurhe obwene elugulu w'ogu mwazi: K'erhegeko lyeerhu lirhuyemeerere changwa nangwa okulema rhwafurha ekooli emwa mwami Kayisaari?»
18Aliko okubona Yeesu alimenyere enkengeero zaabo zibi, abashubiza ntya: «Mwe ndyaalya mwe! Girhumire mwantega ntya? 19Munyereke olufuranga munahaana omu gufurha ekooli.»
Bamuyeereka egicheri ch'olufuranga.#22.19 Echo chikoroto chaliiri ch'edinaari. Osome Matayo 20.2. 20Yeesu ababaza ntya: «Eri shusho n'eri ziino biyandikirwe hano, biri bya nde?» 21Bamushubiza ntya: «Bya Kayizaari.»
Yeesu aja ababwira ntya: «Muleme mwaha Kayizaari ebiri byaage, na Nnamahanga ebiri byaage.»
22Abo bantu babeere bayunva echo chinwa, basoomerwa bwenene. Bamuleka banachigendera.
aBasadukaayo babaza Yeesu elugulu w'obufuuke
Mariko 12.18-27; Luuka 20.27-38
23Mw'oloola lusiku lo n'olo, aBasadukaayo baguma nabo bahikira Yeesu. Abo Basadukaayo, bo banaderha oku abafu nji barhafuuka. 24Bamubaza ntya: «Mwigiriza, Muusa aderhere mpu: ‹Nk'omulume afiire buzira kuburha omwana, mwene waabo akwaneene kuyingira oyo mushumbakazi n'okuburhira nyagufa abaana.› 25Leero ahagarhi keerhu, haliiri barhabana mushanvu ba nda nguma. Efula yashaba omukazi, yafa buzira kuburha. Mudoorho waage ayingira omulamukazi. 26Oyo mudoorho waage naye byaaba ntyo. Byanaba ntyo oku wagasharhu guhika oku wamushanvu. 27Enyuma z'ogufa kw'abo barhabana booshi, ola mushumbakazi naye afa. 28Leero, olusiku abafu nji bafuuka, oyo mukazi nj'aba muka nde? Kwenge bala barhabana mushanvu booshi balimushabire.»
29Yeesu abashubiza ntya: «Mwagirhebekere bwenene, elugulu w'ogurhamenya aMandiko Matagatiifu, changwa obuhashe bwa Nnamahanga. 30Kwenge amango abafu nji bafuuka, abalume n'abakazi barhagachishabana. Aliko nji baaba nka bamalahika b'omu mpingu. 31N'oku biyerekeere obufuuke bw'abafu, ka murhashubiraga gusoma ebi binwa Nnamahanga ababwiraga ntya: 32‹Nyoono ndi Nnamahanga w'Aburahaamu, na wa Isaka, na wa Yakobo.›#22.32 Osome Lubunguluko 3.6. Yeesu ashuba kuderha ntya: ‹Nnamahanga arhali Nnamahanga w'abafu, aliko ali Nnamahanga w'abazeene!›»
33Abo bantu babeere bayunva ebyo binwa, basoomerwa bweneene elugulu w'enyigirizo za Yeesu.
Erhegeko likulu
Mariko 12.28-34; Luuka 10.25-37
34 aBafarisaayo babeere bayunva oku Yeesu ahimire aBasadukaayo omu binwa, baaja enaama. 35Mwigiriza w'amarhegeko muguma omu bo, ageregeza Yeesu ntya: 36«Mwigiriza, omu marhegeko, rhegeko lihe liri likulu omu mooshi?»
37Yeesu amushubiza ntya: «Osiime Nnaweerhu Nnamahanga waawe n'omurhima gwawe gooshi, n'emisi yaawe yooshi, n'obwenge bwawe booshi.#22.37 Osome Rhegeko 6.5. 38Elyoola ly'erhegeko likulu bweneene lyo na lirhanzi. 39N'erhegeko lyakabiri nalyo linali nk'elyo lirhanzi, linaderhere ntya: ‹Osiime omuturanyi waawe nk'oku ogisiima wenyine.›#22.39 Osome Balaawi 19.18. 40Ama marhegeko mombi mo mahekere ebinwa byooshi biyandikirwe omu Rhegeko lya Muusa n'omu bitaabu by'abaleebi.»
Kirisitu na Daawudi
Mariko 12.35-37; Luuka 20.41-44
41Abo Bafarisaayo babeere bachiri haguma, Yeesu ababaza ntya: 42«Bichi muganiizize elugulu wa Kirisitu? Oyo Kirisitu, ali mugala wa nde?» Nabo bamushubiza ntya: «Ali mugala wa Daawudi.» 43Yeesu aj'ashuba kubabaza ntya: «Leero gurhe Daawudi ahamagalaga Kirisitu oku ali Nnaweerhu, noobo oyo Daawudi aliiri ey'ayerekerwe na Muuka-Mutagatiifu? Kwenge Daawudi aderhere ntya:
44‹Nnaweerhu Nnamahanga abwiraga Nnaweerhu mpu:
"Yikala ekulyo kwani,
guhika mpire abanzi baawe eshiishi w'amagulu maawe."›#22.44 Osome Nanga 110.1.
45«Leero akaba Daawudi ahamagere Kirisitu ‹Nnaweerhu›, nka gurhe Kirisitu agashuba kuba mugala?»
46Ntyo, nta muntu waligalire kumushubiza chiro echinwa. Na gurhengera oloola lusiku, harhaliiri chiro n'omuntu washubire kandi kumubaza.
Currently Selected:
Matayo 22: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
