Matayo 21
21
Yeesu aja omu gishagala ch'eYerusaleema
Mariko 11.1-11; Luuka 19.28-40; Yohaana 12.12-19
1Yeesu n'abigirizwa baage babeere bali hoofu n'egishagala ch'eYerusaleema, bahika omu gishagala ch'eBetefaage, hoofu n'omusozi gw'eMizeyituuni. Yeesu arhuma bigirizwa baage babiri, 2ababwira ntya: «Muje omu gishagala chiri embere zenyu. Hano muchigera mo, mwashimaana epunda n'omwana gwayo, bazishwekere haguma. Ezo punda, muzishwekuule, munazinderhere. 3Nakaba muntu mulebe ababazize chintu elugulu w'ezo punda, mumushubize oku Nnaweerhu azilagire ko. Ho n'aho, oyo muntu aja abaleka muziheke.»
4Ebyo byaabaga ntyo, y'echo chinwa chiyenera, echi Nnawerhu aderhaga kugerera omuleebi ntya:
5«Mubwire aBanyasayuuni ntya:
‹Mulole! Mwami wenyu ayinjire emwenyu,
ali mwirhonzi, ayikeere oku punda
n'eyo punda echiri chaana.›»#21.5 Osome Zakariya 9.9.
6Abo bigirizwa bagenda, bajira nk'oku Yeesu abarhegekaga. 7Baleerha eyo punda n'echaana chaayo. Baasasa oku zo emyambalo yaabo, Yeesu aja ayikala oku yo. 8Chigusho chinene ch'abantu baasasa emyambalo yaabo omu njira, abandi bacha emirhabi y'emirhi, banayisasa omu njira. 9Bantu banene baliiri balambagira embere zaage n'abaliiri balambagira enyuma zaage, booshi baliiri baderha n'omulenge munene ntya:
«Akuuzwe Mwene Daawudi!
Agishwe ola oyinjire oku ziino lya Nnaweerhu!
Akuuzwe Nnamahanga oli omu mpingu!»
10Yeesu abeere aja omu gishagala ch'eYerusaleema, echo gishagala chooshi chabumba olwamo lunene. Abantu barhondera kubazana ntya: «Oyu ali nde?»
11Echo chigusho ch'abantu chashubiza ntya: «Oyuula ali Yeesu, muleebi w'omu gishagala ch'eNazareeti, omu gihugo ch'eGalilaaya.»
Yeesu alibisya abarhimbuuzi omu Nju ya Nnamahanga
Mariko 11.15-17; Luuka 19.45-46; Yohaana 2.13-17
12Enyuma z'aho, Yeesu aja omu Nju ya Nnamahanga. Alibisya abantu booshi baliiri baguziza n'abaliiri bagulira omu Nju ya Nnamahanga. Ahenya ameeza m'abaliiri bakaaba efuranga, anahenya ebichumbi by'abantu baliiri baguza amaguuku. 13Yeesu aja ababwira ntya: «Biyandikirwe omu Mandiko Matagatiifu ntya:
‹eNju yaani nji yaaba Nju y'amasaala.›
Aliko mwabo mwayihindamwire kuba hantu h'ebishumuusi!»#21.13 Osome Yeremiya 7.11; Isaaya 56.7.
14Empumi n'ebirema bahikira Yeesu mw'eyo Nju ya Nnamahanga. 15Aliko abakulu b'abadaahwa n'abigiriza b'eRhegeko lya Muusa babeere babona ebisomereene Yeesu ajiraga, n'okuyunva okw'abaana bali baderha n'omulenge munene omu Nju ya Nnamahanga ntya: «Akuuzwe Mwene Daawudi!», bagaya bwenene. 16Echo charhuma babaza Yeesu ntya: «K'oyunvirhe ebinwa aba baana bali baderha?»
Naye abashubiza ntya: «Neechi! Nayunvirhe! Leero mwabo murhashubiraga gusoma oku Mandiko Matagatiifu maderhere ntya:
‹Kulengera obuunu bw'abaana badoorho, n'obuunu bw'enjolyaana,
walema wabala obukuuze bwawe!›#21.16 Osome Nanga 8.2.»
17Oku buzinda, Yeesu aleka abo bantu, arhenga mw'echo gishagala ch'eYerusaleema, anaja kulyaama omu gishagala ch'eBetaniya.
Yeesu avuma omurhi gw'etiini
Mariko 11.12-14,20-24
18Bw'abeere bwacha eseezi, oku Yeesu ali agaluka omu gishagala ch'eYerusaleema, ayunva enzara. 19Abona omurhi muguma gw'etiini eburhambi bw'enjira, ayegeera hoofu nago. Aliko arhabonaga ko chiro n'elehe liguma, si ebibabi byonyine. Echo charhuma Yeesu aja avuma ogo murhi ntya: «Gurhondera buno, guhika esiku n'amango, orhahiira okayaana chiro n'elehe!» Ho n'aho ogo murhi gwayuuma.
20Abigirizwa ba Yeesu babeere babona ebyoola, basoomerwa bwenene. Baamubaza ntya: «Gurhe ogu murhi gw'etiini gwamayuuma ntya juba?»
21Yeesu abashubiza ntya: «Okuli mbabwirire oku akaba mugwerhe obwemeezi buzira kuganganwa, mwakagala kujira ebiila najiriire ogu mutiini. Nji mwanagala kubwira ogu musozi ntya: ‹Chikundula ahoola, onaje guchikabula omu nyanja›, n'ebyoola nji byaaba. 22N'akaba mugwerhe obwemeezi, chooshi mwahema Nnamahanga, abaha cho.»
Ngahe obuhashe bwa Yeesu burhengere?
Mariko 11.27-33; Luuka 20.1-8
23Enyuma z'aho, Yeesu ashuba kuja omu Nju ya Nnamahanga n'ogurhondera kuyigiriza abantu. Abakulu b'abadaahwa n'abashamuka b'aBayaahudi bamuyegeera n'okumubaza ntya: «Ebi bintu oli wajira, oli wabijira oku buhashe buhe? Na nde waguhaaga bo?» 24Yeesu abashubiza ntya: «Naani, nababaza echibazo chiguma chonyine. Mukanshubiza, naani nababwira oku buhashe bwa nde, ndi najira ebiila. 25Obuhashe Yohaana aliiri abatiiza mo abantu, ngahe bwarhengeraga? Mumbwire, akonva bwarhengeraga emwa Nnamahanga changwa emw'abantu!»
Baja mahwe, banabwirana ntya: «Rhugashubiza oku bwarhengeraga empingu, arhubaza ntya: ‹Leero gichi charhumaga murhamuyemeera?› 26Na rhukamushubiza oku bwarhengeraga emw'abantu, rhuyuubahire echi chigusho ch'abantu, kwenge booshi bayinji oku Yohaana aliiri muleebi.»
27Elugulu w'echoola, bamushubiza ntya: «Rhurhenji!» Yeesu naye ababwira ntya: «Naani ntababwira oku buhashe buhe ndi najira ebi bintu.»
Omugani gw'abaana babiri
28Yeesu ashuba kuderha ntya: «Gurhe mubwene elugulu w'ogu mwazi? Haliiri mulume muguma waligwerhe baana baage babiri. Oyo mulume abwira omwana waage murhanzi ntya: ‹Ego mwana waani, zeene oje gushiiba wakola omu shwa lyeerhu ly'emizabiibu.›» 29Oyo mwana ashubiza ntya: «Nangwa, ntaaja yo!» Aliko enyuma bugeeke agishuba emurhima, anaja gukola.
30«Oyo mulume ava abwira omwana waage mudoorho nk'oku abwiraga ola murhanzi. Oyo mwana ashubiza ntya: ‹Neechi daarha, naaja yo!› Aliko arhajaaga yo.
31«Leero mwaba bombi, nde wajirire obulonza bw'eshe?» Bamushubiza ntya: «Omurhanzi.»
Elugulu w'echo, Yeesu aderha ntya: «Okuli mbabwirire, oku abafurhiisa b'amakooli n'abahushi, bo babarhanga kuja omu Bwami bwa Nnamahanga. 32Kwenge Yohaana ahikire mwenyu y'abayereke enjira ekwaneene embere za Nnamahanga, murhamuyemeraga. Aliko abafurhiisa b'amakooli n'abahushi, boowe balimuyemereere. Kandi, chiro akaba mwalibwene ebyo byooshi, murhahindamukaga gurhenga omu byaaha byenyu, yi mumuyemeere.»
Omugani gw'abahinzi babi
Mariko 12.1-12; Luuka 20.9-19
33Yeesu ashuba kuderha ntya: «Muyunvirize ku guno gwindi mugani. Haliiri mulume muguma wahingaga eshwa lyaage ly'emizabiibu. Elyo shwa, alihira ko oluzirhu, ajokola aha balema bakandira amalehe m'emizabiibu. Ayumbakira abalanzi balyo echiraaro chilehere. Amalire kuyunvikana echigabane n'abahinzi baguma, abalama.
34«Amango m'ogushaluula mahikire, nyina eshwa arhuma abaaja baage emunda bala bahinzi bali, yi bamuhe echigabi chaage ch'eshaluulo. 35Aliko bala bahinzi bafarha abo baja. Muguma bamushurha bwenene, n'owindi bamuyirha, n'owagasharhu bamuyirha omu kumubanda amabaale. 36Oyo nyina eshwa ashuba gurhuma abandi bakozi banene kulusha bala barhanzi. Aliko abo bahinzi babajirira nk'oku bajiriraga bala barhanzi.
37«Oku buzinda, nyina eshwa aja abarhumira omwana waage, aderha ntya: ‹Oyu mwana waani yeewe bamukenga.› 38Aliko abo bahinzi babeere babona oyo mwana waage, baderha ntya: ‹Oyuula, yi walya omwandu gw'eshe. Mujire, rhumuyirhe yi rhuguyorhane.› 39Baja bamugwarha n'okumukululira eburhambi bw'elyo shwa, bamuyirha.»
40Yeesu aja abaza ntya: «Amango nyina elyo shwa ly'emizabiibu nj'agaluka, gurhe nj'ajira abo bahinzi?» 41Bamushubiza ntya: «Abo bantu babi, nj'ayirha bo buzira kubayunvira obonjo. N'elyo shwa lyaage, nj'alihaana echigabane oku bandi bahinzi abalema bamuha echaage chigabi ch'eshaluulo.»
42Yeesu aj'ashuba kubabaza ntya: «Ka murhashubiraga gusoma oku Mandiko Matagatiifu maderhere? Biyandikirwe mo ntya:
‹Ebaale ab'okuyumbaka balahiraga,
lyo lyahindukire baale linene ly'oku pembe.
Na Nnaweerhu ye wajiraga ebyoola.
Na byo biri bisomereene ku rhwabo!›#21.42 Osome Nanga 118.22-23.
43«Cho girhumire, mbabwirire oku mwabo, Nnamahanga nj'abanyega oBwami bwage, n'okubuha abandi bantu abanjibalema bajira obulonza bwage. [44Omuntu nji wahenera kw'elyo baale, nj'avunanguka. N'ola nji lyahenera ko, nji lyamuhomboola.]#21.44 Olu lukere lurhali omu bitaabu binene bya miira.»
45Abakulu b'abadaahwa n'aBafarisaayo babeere bayunva kw'eyo migani ya Yeesu, baja bamenya okw'aliiri aderha elugulu waabo. 46Echo charhuma, baja bashonda obulyo bw'okumugwarha, aliko bayuubaha ebigusho by'abantu, bulaala abo bantu baliiri bayemereere oku Yeesu ali muleebi.
Currently Selected:
Matayo 21: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
