Matayo 15
15
Yeesu aderha elugulu w'emigenzo y'aBayaahudi
Mariko 7.1-13
1Enyuma z'ebyo, aBafarisaayo n'abigiriza b'amarhegeko bahikira Yeesu gurhengera eYerusaleema. Baamubaza ntya: 2«Bichi birhumire abigirizwa baawe barhali bakenga emigenzo ya bashookuluza beerhu? Kwenge boowe, barhali bakalaba efune embere z'okulya gukulikirana n'eyo migenzo!»
3Yeesu abashubiza ntya: «Nenyu, girhumire murhali mwakenga eRhegeko lya Nnamahanga omu gukulikira emigenzo yenyu? 4Kwenge Nnamahanga aderhaga ntya: ‹Orhuule wakenga yisho na nyoko.› Kandi aderhere ntya: ‹Ola wadukanga eshe changwa nyina, akwaneene ayirhwe.› 5Aliko mwabo, munaderha oku omuntu akagala kubwira eshe changwa nyina mpu: ‹Echintu nankagurhabere mo, narhuulire cho miira emwa Nnamahanga.› 6Omu kujira ntyo, yi mwaderha ok'omuntu arhalemaga arhabaala eshe changwa nyina. Ntyo, muli mwakena eChinwa cha Nnamahanga elugulu w'ogukulikira emingenzo yenyu.
7«Mwe ndyaalya! Isaya aderhaga okuli, amango aleebaga elugulu wenyu ntya:
8‹Bano bantu, bali bankenga oku buunu bonyine,
aliko emirhima yaabo eba hale naani.#15.8 Osome Isaya 29.13.
9Kwenge okumparamya banamparamya, kuli kwa busha,
n'enyigirizo banayigiriza, biri binwa byajirwaga n'abantu.›»
Ebintu bizingiisa omuntu
Mariko 7.14-23
10Enyuma z'ebyo, Yeesu ahamagala echigusho ch'abantu. Anababwira ntya: «Murhege amarhwi munayunvirize ebinwa nababwira. 11Echija omu buunu b'omuntu, arhaali cho chimuzingiisa. Aliko chilaala girhenga mo cho chimuzingiisa.»
12Abigirizwa baage baja bamuyegeera n'okumubaza ntya: «K'orhenji okw'ebi binwa waderhere byagayisize aBafarisaayo?» 13Yeesu abashubiza ntya: «Ngasi mburho yooshi Daarha w'empingu arhabyaalaga nji yashigulwa. 14Cho girhumire, mubaleke abo Bafarisaayo! Kwenge bali mpumi ziri zalambagiza ezindi mpumi. Leero, akaba empumi eri yalambagiza eyaabo, booshi oku bali bombi banarhogera omu kijokole.»
15Petero ava amubwira ntya: «Waliha, orhuhuguulire ogo mugani.» 16Yeesu amushubiza ntya: «Ka nenyu murhaza kuba n'obwenge bw'okumenya? 17Ka murhamenyere oku ngasi chooshi chija omu buunu b'omuntu, chinaja omu nda, n'oku buzinda chanarhenga n'okuja omu musarani? 18Aliko byooshi birhenga omu buunu, omu murhima mu biba birhengeere. N'ebyo bye bizingiisa omuntu. 19Bulaala omu murhima mo murhenga enkengeero zibi zileerha obunizi, obuhushi, obubaraaga, obwizi, obuhamiiriza b'obubeeshi n'okudukangana. 20Ebi bye bizingiisa omuntu. Aliko okulya buzira gukalaba efune, gurhakazingiisa omuntu.»
Obwemeezi b'omukanaana-kazi
Mariko 7.24-30
21Yeesu abeere arhenga ahoola, aja oku lunda luli hoofu n'egishagala ch'eTiiro n'eche Sidoona. 22Abeere ahika yo, Mukanaana-kazi muguma walilamire eyo munda, amuhikira eyi ali amulakiirira omu kuderha ntya: «Nnaweerhu, Mwene Daawudi, ombeere obonjo! Mwali waani, abazimu yi bamulibuza bweneene!»
23Aliko ntaacho Yeesu amushubiize. Oku buzinda, abigirizwa baage bamuyegeera n'okumubwira ntya: «Oyu mukazi ali arhubera erhwe. Omubwire arhenge hano.» 24Yeesu ashubiza ntya: «Ntumirwe oku lubaga lw'aBaisraheeli lonyine, kwenge baali nka ntaama zaherere.»
25Aliko oyo mukazi ayinja n'okuva afukama embere za Yeesu anamubwira ntya: «Nnaweerhu, ontabaale!» 26Yeesu amushubiza ntya: «Birhali binja gurhoola ebiryo by'abaana n'okubiheereza ebibwana by'embwa.»
27Oyo mukazi aderha ntya: «Neechi Nnaweerhu! Oderhere okuli. Aliko chiro n'ebibwana by'embwa, binalya orhulyo rhunarhoga oku meeza ma nnahamwabo.» 28Yeesu aja amushubiza ntya: «Mukazi we! Obwemeezi bwawe buli bunene. Cho girhumire bikubeere nk'oku oshondere.» Mw'ebyo bishanji mwali w'oyo mukazi ava afuma.
Yeesu afumya balwala banene
29Enyuma z'ebyo, Yeesu arhenga eyo munda, agera eburhambirhambi bw'enyanja y'eGalilaaya. Ava azamuukira oku musozi, ayikala okoola. 30Bantu banene bweneene baja bamuhikira. Bamuleerhera ebirema n'empumi, banyamugama n'abantu bahunzize, n'abandi balwala banene. Bahira bo booshi embere za Yeesu, naye abafumya. 31Abo bantu booshi basoomerwa bweneene kwenge balibwene banyamugama baderha, ebirema byaaba bigumaguma, abahunzize balambagira n'empumi zabona. Banalema bakuuza Nnamahanga w'eIsraheeli.
Yeesu ayugusya balume bihumbi bine
Mariko 8.1-10
32Yeesu ahamagala abigirizwa baage, ababwira ntya: «Nabereere aba bantu obonjo, kwenge zeene zikola siku esharhu bali haguma naani eyi barhanagwerhe echo kulya. Ntashondere kubaleka bagende buzira kulya yi barhaholera omu njira n'enzara.»
33Abigirizwa baage bamushubiza ntya: «Hano, rhuli omu mpinga, ngahe rhwaja rhwabona ebiryo by'okuyugusya olu lubaga lungana ha?» 34Yeesu ababaza ntya: «Mugwerhe migati nga?» Nabo bamushubiza ntya: «Rhugwerhe migati mushanvu n'efi zigeheere, kandi zigekegeeke.»
35Yeesu arhegeka abo bantu booshi oku bayikale. 36Arhoola ela migati mushanvu na zila fi, akuuza Nnamahanga, anayichagulanga, ayiheereza abigirizwa baage. Nabo, babigabira echigusho ch'abantu. 37Booshi baalya banayugurha. Abigirizwa ba Yeesu babeere bagusha ebisigazo, bayunjuza rhurhanda mushanvu. 38Abalyaaga ebyo biryo, baliiri balume bihumbi bine buzira kuganja abakazi n'abaana.
39Enyuma z'aho, Yeesu asezera abo bantu, aja omu chombo, anagenda olunda lw'eMagadani.
Currently Selected:
Matayo 15: HAV
Highlight
Share
Compare
Copy
Want to have your highlights saved across all your devices? Sign up or sign in
©️2025 The Seed Company, Association de Traduction de la Bible et Alphabétisation (ATBA), and the Comittee de Langue Havu
