पेरेरित 9
9
साउल येसुमे बिस्वास करनें
पेरेरित २२:६-१६; २६:१२-१८
1उ बखततक साउल परभु येसुके चेलाभरिन मरना धम्कि दहत रेहें। तउ उ सबति बन्ना पुजारितिरा जाक, 2उ मुक्तिके डगरमे निंगइया सब लोग आउर मेहरुवाभरिन पकरके यरुसलेममे लाइक पाउँ कहिके दमस्कसके यहुदिभरिनके बइठक घरमे बुझाइक तहन अधिकार पत्र मँगनें।
3जब साउल दमस्कस सहरके लिग्घे पुगनें, तउ अरबरगि बदरिमहति उनका चारोघइन उजियर चम्कल। 4उहिबखत साउल भुइंमे गिरनें आउर अइसन अबाज सुन्नें, “साउल, ए साउल, तुम मोहके काहिक सतइतो?”
5तउ साउल पुछनें, “परभु तुम कउन बाटो?”
उ कहनें, “मइ येसु आहुँ, जेहके तुम सतइतो। 6अब तुम उठके सहर भित्तर जाउ आउर तुम्हिन का करेकपरि मइ तुम्हिन बतइमु।”
7जउन मनइभर साउलसँघ रेहें, ओइनें कुछु मन्के नाइसिक्के ठरहेल रेहें, काहिक्कि ओइनें अबाज केल सुन्नें पर कुहिक फेक नाइदिखनें। 8तउ साउल भुइंमेति उठके देखेक खुजनें, पर कुछु फेक नाइदिखनें। उहिकमारे उनका सँघरियाभर उनके डुरेक दमस्कसमे लइगिनें। 9तउके साउल तिन रोजतक कुछु फेक देखे नाइसिक्नें, न ते कुछु खइनें, न कुछु पिनें।
10उहिबखत दमस्कसमे हननिया नाउँके एक जनें बिस्वासि रेहें। परभु उनके दरसनमे अइसे कहनें, “हननिया!”
तउ हननिया कहनें, “परभु कहो।”
11परभु उनके कहनें, “तुम उठके सुधे कहना गल्लिमे रहल यहुदाके घरमे जाउ आउर टारससमहति आइल साउल नाउँके मनइकेहें खोजो। उ हुँवाँ पराथ्ना करत आहें। 12उ दरसनमे अपना आँखि खुले कहिके हननिया कहना मनइ अपन उप्पर हाथ धरल दिखले आहें।”
13हननिया जबाफ दहति कहनें, “परभु, इ मनइ ते यरुसलेममे रहल तुम्हर बिस्वासिभरिन ढेरे सतइले आहे कहिके मइ ढेरे मनइभरिनति सुनले आहुँ। 14तुम्हर नाउँमे बिस्वास करइयाभरिन पकरेक तहन खास पुजारिभरिनति अधिकार लइके हिंयाँ फेक आइल आहे।”
15पर परभु हननियाकेहें कहनें, “तुम जाउ, काहिक्कि मइ उनके अउरे जातके मनइभरिनके, राजाभरिन आउर इस्राइलिभरिन मोर बारेम परचार करेक तहन छँटले आहुँ। 16उ मोर तहन कत्ता दुख सहेकपरि, उ मइ ओहके दिखइमु।”
17तउ हननिया यहुदाके घरमे गिनें आउर साउलके मुरियक उप्पर हाथ धरके कहनें, “साउल भइया, जउन परभु येसु तुम आइत रहत डगरमे तुम्हरतिरा देखा परल रेहें, उ मोहके तुम देखे सिको आउर तुम पबित्र आत्मक सक्तिलइक भरपुर होउ कहिके पठइले आहें।” 18हननिया इ बात कहतिकेल साउलके आँखिमहति पुपरि ढार कुछ चिझ गिरल आउर उ फेर देखे सिक्ना हुइगिनें। तउ उ उठनें आउर बप्तिस्मा लहनें। 19ओहकापाछुक उ खाना खइनें आउर उनकामे तागत आइल।
साउल दमस्कस आउर यरुसलेम सहरमे
कुछ रोजतक साउल दमस्कसमे परभु येसुके चेलाभरिनसँघ बइठनें।
20उहि बखततिति साउल येसु परमेस्वरके लउँरा आहें कहिके यहुदिभरिनके बइठक घरमे परचार करे लगनें।
21उनका बात सुनइयाभर सब जनें अचम परनें आउर अइसे कहे लगनें, “यरुसलेममे येसुके नाउँमे आराधना करइयाभरिन खतम करेक खुजइया मनइ यिहि नाइआहें का? हिंयाँ फेक येसुके नाउँमे आराधना करइयाभरिन पकरके खास पुजारिभरिन तिरा कइदि बनाक लइजाइक तहन ते आइल होइ?”
22पर साउल आउ सक्तिलइक परचार करति बलगर हुइति गिनें आउर येसुये मुक्ति दिबइया खिरिस्ट आहें कहिके अइसन पक्का परमान दहनें कि दमस्कसके यहुदिभर फेक जबाफ देहे नाइसिक्नें।
23तउके ढेरे रोजपाछुक यहुदिभर साउलकेहें मारदहना योजना बनइनें। 24पर ओइन योजनाके बारेम साउल पता पइनें। यहुदिभर उनके मारेक तहन दिन-रात दमस्कस सहरके गेटमे लागल रेहें। 25पर एक रोज रातिक चेलाभर साउलकेहें झउवामे धरके सहरके दिबालमहति उतारके बाहिर भजइनें।
26जब साउल यरुसलेममे लउटके अइनें, उ चेलाभरिनसँघ भिटना इच्छा करनें। पर सब चेलाभर साउलसँघ डरइनें काहिक्कि उ सहिके परभुके चेला आहें कहिके ओइनें बिस्वास करे नाइसिक्नें। 27पर बारनाबास साउलकेहें अपनसँघ पेरेरितभरिन तिरा लइगिनें। साउल डगरमे परभुकेहें कइसे दिखनें आउर परभु उनकासँघ कइसे बात करनें आउर ओहकापाछुक उ दमस्कसमे येसुके नाउँमे हिम्मतति परचार करनें कहना सब बात बारनाबास ओइन बतादहनें। 28उहिकमारे साउल ओइनसँघे बइठनें आउर यरुसलेममे खुल्लम-खुल्ला नेंगे लगनें आउर अक्को फेक नाइडराक परभुके बारेम परचार करे लगनें। 29उ गिरिक भासा मन्कइया यहुदिभरिनसँघ बादबिबाद करनें, पर ओइनें उनके मारदेहेक खोजें। 30जब साउलकेहें मारेक खोजत आहें कहिके बिस्वासिभर पता पइनें, तउ ओइनें साउलकेहें कइसरिया सहरमे लइजाक हुँवाँति टारसस सहरमे पठादहनें।
31ओहकापाछुक यहुदिया, गालिल आउर सामरिया इलाकामे रहल सब मन्डलिमे सान्ति होक मन्डलि बलगर होइल। पबित्र आत्माति उत्साह पाइलकेमारे आउर परमेस्वरके डर मानके जिन्दगि बिताइलके मारे मन्डलि बरह्ति गेल।
एनियास आउर डोरकास
32जब पत्रुस सब जगामे निंगति लुड्डा सहरमे रहल बिस्वासिभरिनतिरा भेट करे गिनें। 33हुँवाँ उ एनियास नाउँके एक जनें मनइकेहें भेट करनें, उ मनइ लकबामारल रोग लागलकेमारे आठ बरसतक सथरिमहति उठे नाइसिकल रेहे। 34पत्रुस उनके कहनें, “ए एनियास, येसु खिरिस्ट तुम्हिन निक परहें। उठके अपना सथरि मिलाउ।” एनियास तुरन्ते उठनें आउर नेंगे सिक्ना हुइगिनें। 35तउ उनके अइसे निक होइल देखके लुड्डा आउर सारोनमे बइठइया सब मनइभर परभु येसुमे बिस्वास करनें।
36योप्पा सहरमे तबिता नाउँक एक जनें बिस्वासि मेहरुवा रेहें। गिरिक भासामे उनके डोरकास#९:३६ डोरकास: इ सब्दके अरथ हरनि आहे। केहें। उ बरहिया काम करें आउर गरिबभरिन फेक मदत करें। 37पत्रुस लुड्डामे रेहे बखत तबिता बिमार होक मरगिनें। तउके मनइभर उनका देहिंकेहें धोक उप्परका तल्लाके एकठोर कुन्ठिमे धरदहनें। 38लुड्डा सहर योप्पा सहरके लिग्घे रेहे। पत्रुस लुड्डामे आहें कहिके बिस्वासिभर पता पाइलपाछुक, ओइनें दुइ जनें मनइभरिन पत्रुसतिरा अइसे कहिके पठइनें, “दया करके हम्मरतिरा हालि आउ।” 39तउ पत्रुस ओइनसँघे योप्पा सहरमे गिनें। हुँवाँ पुगलपाछुक मनइभर उनके तबितक मरल देहिं रहल उप्परका तल्लाके कुन्ठिमे लइगिनें। बिधबाभर पत्रुसके चारोघइन जमा होक तबिता ओइनतहन सिंदहल लत्ता दिखइति रोइ लगनें। 40पर पत्रुस सब जन्हिन कुन्ठिमहति बाहिर निकार दहनें आउर घुठेलि गारके पराथ्ना करनें। ओहकापाछुक उ तबिताके मरल देहिंघइन घुमके कहनें, “ए तबिता, उठ।” तउ तबिता आँखि खुल्नें, आउर पत्रुसकेहें देखके उठके बइठगिनें। 41पत्रुस उनका हाथ पकरके ठरहबा दहनें। ओहकापाछुक पत्रुस सब बिस्वासिभरिन आउर बिधबाभरिन बुलइनें आउर जिति होइल तबिताकेहें ओइन जुम्मा लगादहनें। 42जब इ बात सब योप्पा सहरमे फइलल, हुँवाँ ढेरे मनइभर परभुमे बिस्वास करनें। 43ओहकापाछुक पत्रुस खलरिक काम करइया सिमोनसँघ ढेरे रोजतक योप्पामे बइठनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.