पेरेरित 10
10
पत्रुस करनेलियसके घरमे
1कइसरिया सहरमे करनेलियस नाउँ रहल एक जनें मनइ रेहें। उ इटालिया कहना पल्टनके कप्तान रेहें। 2उ परमेस्वरके आराधना करइया मनइ रेहें। उ आउर उनका सब परिबार परमेस्वरके डर मानें। ओइनें जरुरतमे परल मनइभरिन खुल्ला मनति मदत करें, आउर सदा परमेस्वरसँघ पराथ्ना करें। 3एक रोज करनेलियस दुपहरके तिन बजेघइन दरसनमे इस्पस्टति परमेस्वरके एकठोर स्वरगदुतकेहें अपनघइन आइत दिखनें। स्वरगदुत करनेलियसकेहें कहनें, “ए करनेलियस!”
4करनेलियस स्वरगदुतघइन निहारके दिखनें आउर डराक कहनें “परभु कहो?”
तउ स्वरगदुत उनके कहनें, “तुम्हर पराथ्ना आउर तुम गरिबभरिन दहल दान परमेस्वर बलिदानके रुपमे सुइकार करले आहें। 5अब तुम योप्पा सहरमे रहल पत्रुस कहना सिमोनकेहें बुलाइक तहन मनइभरिन पठाउ। 6उ खलरिक काम करइया सिमोनके घरमे आहें, जेहका घर समुन्दरके टिकरामे आहे।” 7जब करनेलियससँघ मन्कइया स्वरगदुत बिदा होक गिनें, उ अपना दुइ जनें कमइया आउर परमेस्वरके आराधना करइया एकठोर सिपाहिकेहें बुलइनें। उ सिपाहि हरदम करनेलियसके सेबामे लागलरेहें। 8ओहकापाछुक करनेलियस अपन देखल सब बात कहिके ओइन योप्पा सहरमे पठइनें।
पत्रुसके दरसन
9अउरे रोज जब ओइनें योप्पा सहरके लिग्घे अइनें, तउ दुपहरके बारा बजल रेहे आउर उहिबखत पत्रुस घरका छतमे पराथ्ना करे गिनें। 10पराथ्ना करतिकरत उनके भुँख लागल, तउ उ कुछ चिझ खइना मन करनें। जब अउरे जनें खइना चिझ बनाइत रेहें, उहिबखत पत्रुस धियान मग्न हुइनें आउर एकठोर दरसन दिखनें। 11उ दरसनमे पत्रुस स्वरग उघरल आउर हुँवाँति चार कोनिमे बाँधल एकठोर तन्ना जइसन कुछ चिझ धरतिमे गिरत दिखनें। 12उ तन्नामे धरतिक सब मेलक चार गोर रहल पसु आउर घिसटत निङ्गना जिब आउर सब मेलक चिरइंचुरङ्गनभर रेहें। 13तउ पत्रुस एकठोर अबाज सुन्नें, “ए पत्रुस उठो, आउर ओइन मारके खाउ।”
14पर पत्रुस कहनें, “नाइ परभु, मइ कबु फेक असुद्ध आउर अपबित्र चिझ नाइखइले आहुँ।”
15तउ पत्रुस फेर अबाज सुन्नें, “परमेस्वरन सुद्ध बनाइल चिझकेहें तुम असुद्ध नाकहो।” 16तिन दाउँ अस्ते होइल करल आउर ओहकापाछुक उ तन्ना स्वरगघइन उठाइलगेल।
17जब पत्रुस अपना देखल दरसनके अरथ सम्खे नाइसिक्के अल्मल परनें, उहिबखत करनेलियसके पठाइल मनइभर सिमोनके घरकेहें पता लगाक उनका घरके दोरमे ठरहिनें। 18तउके ओइनें मन्कइति पुछनें, “पत्रुस कहना सिमोन हियाँ आहें कि?”
19जब पत्रुस अपना देखल दरसनके बारेम बिचार करत रेहें, तउ पबित्र आत्मा उनके कहनें, “देखो, तिन जनें मनइभर तुम्हिन खोजत आहें। 20उहिकमारे अब उठो आउर तरे जाउ आउर कररा नाइमन्ति ओइनसँघे जाउ, काहिक्कि मइ ओइन पठइले आहुँ।” 21तउ पत्रुस तरे अइनें आउर ओइनतिरा जाक कहनें, “तोइन खोजल मनइ महि आहुँ। तोइनें हियाँ का काममे आइल बाटो?”
22तउ ओइनें कहनें, “कप्तान करनेलियस हम्हिन पठइले आहें। उ बरहिया आउर परमेस्वरके डर मनइया मनइ आहें। यहुदियक सब जनें उनका आदर करतियाँ। तुम्हिन उनका घरमे बुलाक तुम्हरति उपदेस सुनियो कहिके पबित्र स्वरगदुतति हुकुम पइले आहें।” 23इ सुनके पत्रुस उ मनइभरिन भित्तर लइजाक स्वागत-सत्कार करनें। ओइनें उ रात हुँये बइठनें।
करनेलियसके घरमे पत्रुस
अउरे रोज पत्रुस आउर योप्पामे रहल कुछ बिस्वासिभर फेक उनकासँघ गिनें।
24दुसरा रोज ओइनें कइसरिया पुगनें। हुँवाँ करनेलियस अपना सँघरियाभरिन आउर नातपातभरिन बुलाक ओइन असरा लागत रेहें। 25जब पत्रुस घर भित्तर पेले लगनें, तउ करनेलियस उनका गोरमे घुप्टे परके दन्डवत करनें। 26पर पत्रुस उनके उठइति कहनें, “उठो, मइ फेक ते मामुलि मनइ केल आहुँ।” 27पत्रुस करनेलियससँघ बात करति घर भित्तर गिनें आउर हुँवाँ ढेरे मनइ जमा होइल दिखनें। 28पत्रुस ओइन कहनें, “हमरे यहुदिभर अउरे जातके मनइभरिनसँघ सँगत करेक या भेटघाट करेक हम्मर धरम नाइदहता कहना बात तोइन सब जन्हिन पता आहे। तभुफेक परमेस्वर मोहके कुइ मनइकेहें अपबित्र या असुद्ध नाइमनियो कहिके दिखइले आहें। 29उहिकमारे तुम मोहके बुलाइक पठइति केल मइ कुछु कररा नाइमानके आइगिनु। अब मोहके बताउ काहिक बुलइले बाटो?”
30तउ करनेलियस कहनें, “चार रोज पहिलेक बात आहे। मइ दुपहरके तिन बजेघइन पराथ्ना करेबखत अरबरगि उजियर लत्ता पइंधल मनइ मोर आगे ठरहेक कहनें, 31‘ए करनेलियस, परमेस्वर तुम्हर करल पराथ्ना सुनले आहें आउर गरिबभरिन तुम्हर दहल दान दिखले आहें। 32उहिकमारे योप्पा सहरमे आइल पत्रुस कहना सिमोनकेहें बुलाइक पठाउ। उ समुन्दरके लिग्घे घर रहल खलरिक काम करइया सिमोनके घरमे बइठल आहें।’ 33ओहकापाछुक मइ तुरन्ते तुम्हिन बुलाइक मनइभरिन पठइनु आउर तुम हियाँ आक बरहिया करलो। अब हमरे सब जनें परमेस्वर तुम्हिन आग्याँ करल बात सुनेक तहन परभुके आगे जमा होइल होइ।”
पत्रुसके सन्देस
34तउ पत्रुस कहनें, “परमेस्वर सब मनइभरिनसँघ बराबर बिउहार करतियाँ कहिके अब बरहियस सम्खले आहुँ।#बेबस १०:१७ 35पर परमेस्वरके आदर करइया आउर बरहिया काम करइया सब जातके मनइभरिन उ गरहन करतियाँ। 36तोइन पता आहे कि, येसु खिरिस्ट सबका परभु आहें। परमेस्वर उनका मारफत सान्ति दहना सुसमाचार इस्राइलि मनइभरिन तिरा पठइनें। 37उ खबर युहन्नाके बप्तिस्माके परचार पाछुक गालिल इलाकाति सुरु होक सब यहुदियाके इलाकामे फइलल बात तोइन पते आहे। 38परमेस्वर नासरतके येसुकेहें छाँटके पबित्र आत्मा आउर सक्तिलइक भरपुर करनें। ओहकापाछुक येसु बरहिया काम करति आउर सइतान लागल मनइभरिन निक परति सब जगामे गिनें, काहिक्कि परमेस्वर उनकासँघ रेहें। 39यहुदिभरिनके देसमे आउर यरुसलेम सहरमे येसुन करल सब कामके हमरे साछि होइ। ओइनें येसुकेहें कुरुसमे टाँगके मारदहनें। 40पर परमेस्वर येसुकेहें तिसरा रोजमे मरलमहति जिति परनें आउर मनइभरिनतिरा दिखादहनें। 41सब जनें ते नाइदिखनें, पर परमेस्वर हम्हिन साछि बनाइक तहन छँटले आहें। उ मरलमहति फेर जिति होइलपाछुक हमरेहे होइ जउन उनकासँघ खइलि आउर पिलि। 42येसु हम्हिन खुसिक सुसमाचार परचार करेक तहन आग्याँ दहले आहें आउर परमेस्वर उनके जिति आउर मरल मनइभरिन नियायधिस बनइले आहें, कहिके साछि देहेक तहन आग्याँ दहले आहें। 43सब अगम्जानिभर फेक उनका बारेम साछि दहले रेहें, कि उनकामे बिस्वास करइया सब जनें उनका नाउँमे पापके माफ पइहें।” 44जब पत्रुस इ बात कहत रेहें, तउ उनका बचन सुनइया सब मनइभरिनमे पबित्र आत्मा अइनें। 45परमेस्वर अउरे जातके मनइभरिन फेक बरदानके रुपमे पबित्र आत्मा दहल देखके पत्रुससँघ आइल यहुदि बिस्वासिभर अचम परनें, 46काहिक्कि ओइनें अउरे जातिभरिन अउरे भासामे मन्कत आउर परमेस्वरके परसन्सा करत सुन्नें। तउ पत्रुस कहनें, 47“अब येन पानिक बप्तिस्मा लेहेक तहन कउन रोके सिकि? काहिक्कि येने फेक हम्मर पाइल ढार पबित्र आत्मा पइले आहें।” 48उहिकमारे पत्रुस ओइन येसु खिरिस्टके नाउँमे बप्तिस्मा लेहेक आग्याँ दहनें। ओहकापाछुक ओइनें पत्रुसकेहें कुछ रोजतक ओइनसँघ बइठेक तहन बिन्ति करनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.