पेरेरित 6
6
सात जनें मनइ छाँटल गिनें
1उ बखतमे जब परभु येसुके चेलाभरिनके सँख्या बरह्ति गेल। तउ गिरिक भासा मन्कइया बिस्वासिभर हिब्रु भासा मन्कइया बिस्वासिभरिनके बिरुधमे गनगनाइ लगनें, काहिक्कि हर रोजके खइना चिझ बाँटे बखत हिब्रु भासा मन्कइया बिस्वासिभर गिरिक भासा मन्कइया बिधबाभरिनके वास्ता नाइकरें। 2तउके बारा जनें पेरेरितभर आकुर सब बिस्वासिभरिन बुलाक कहनें, “परमेस्वरके बचन परचार करेक छोरके हमरे खबइना आउर पिबइना बातमे अल्मलइना बरहिया नाइआहे। 3उहिकमारे हे दादाभइयो, तोइन बिचमहति सब मनइनति आदर पाइल, पबित्र आत्मा आउर गियानलइक भरल सात जनें मनइभरिन छाँटो। हमरे इ खइना चिझके जुम्मा ओइन दहबा। 4हमरे अपनेंभर पुरा समय पराथ्ना आउर परचारके काममे लगबा।”
5पेरेरितभरिनके बिचार सबके मन परल। उहिकमारे ओइनें बिस्वास आउर पबित्र आत्मालइक भरपुर होइल इस्तिफनस, फिलिप, परखरस, निकनोर, तिमोन, पमिरनास आउर एन्टिओखियाके यहुदि धरम अपनाइल निकोलाउसकेहें छँटनें। 6ओइनें उ छँटल सात जन्हिन पेरेरितभरिनके आगे लइनें। तउके पेरेरितभर ओइनउप्पर हाथ धरके पराथ्ना करदहनें।
7अइसे परमेस्वरके बचन फइलति गेल। यरुसलेममे बिस्वासिभर ढेरे बरह्ति गिनें। अइसे ढेरे यहुदि पुजारिभर फेक परभु येसुमे बिस्वास करनें।
इस्तिफनसके पकराउ
8अब परमेस्वरके अनुगरह आउर सक्तिलइक भरपुर होक इस्तिफनस मनइभरिनके बिचमे ढेरे अचमके चिन्हा आउर काम करके दिखइनें। 9पर स्वतन्त्र यहुदिभरिनके बइठक घरके कुछ सदस्यभर इस्तिफनसके बिरोध करेलगनें। ओइनें कुरेनि आउर अलेक्जेन्डिरिया सहर, किलिकिया आउर एसिया इलाकाति आइल यहुदिभर रेहें। ओइनें सब जनें मिलके इस्तिफनससँघ बातिकबाता करे लगनें। 10पर पबित्र आत्मा इस्तिफनसकेहें अइसन बुद्धि दहनें, उ मन्केंत आकुर जनें उनका सामना करे नाइसिक्नें। 11उहिकमारे ओइनें आकुर मनइभरिन उक्साक अइसे केहेक लगइनें, “मोसा आउर परमेस्वरके बिरुधमे मन्कत हमरे सुन्लि।” 12उस्तेकरके ओइनें मनइभरिन, अगुवाभरिन आउर बेबस्था सिखइया धरमगुरुभरिन भरकइनें। तउ ओइनें आक इस्तिफनसकेहें पकरके यहुदिभरिनके महासभामे लइगिनें। 13ओहकापाछुक ओइनें झुठा साछि देहेक तहन मनइभरिन लइनें तउके ओइनें अइसे कहनें, “इ मनइ ते जब फेक हम्मर पबित्र मन्दिर आउर मोसन दहल बेबस्थाके बिरुधमे मन्कत केल सुनले होइ। 14हमरे येहके अइसे कहत सुन्लि, ‘नासरत सहरके येसु इ मन्दिरकेहें भसकादिहि आउर मोसन दहल रितितिथि फेक बदलदिहि।’” 15तउ महासभामे रहल सब जनें इस्तिफनसकेहें एकटक लगाक दिखति रहनेंत उनका मुह स्वरगदुतके ढार चमकत दिखनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.