पेरेरित 4
4
पत्‍रुस आउर युहन्‍ना महासभक आगे
1पत्‍रुस आउर युहन्‍ना मनइभरिनसँघ अइसे बात करतिकरत पुजारिभर, मन्‍दिरके कप्‍तान आउर सदुकिभर ओइनतिरा अइनें। 2ओइनें दिक्‍काइल रेहें, काहिक्‍कि पत्‍रुस आउर युहन्‍ना येसु मरलमहति जिति होइल आहें आउर अस्‍ते आकुर मरल मनइभरिन फेक जिति करहें कहिके मनइभरिन सिखाइत रेहें। 3उहिकमारे ओइनें पत्‍रुस आउर युहन्‍नाकेहें पकरनें, आउर साँझ होइलके मारे ओइनें पत्‍रुस आउर युहन्‍नाकेहें रातभरके तहन जेलमे डारदहनें। 4पर उ सुसमाचार सुनइयाभरिनमे ढेरे मनइभर बिस्‍वास करनें। बिस्‍वास करइयाभर लोग मनइभर केल बारहके पाँच हजार पुगनें।
5दुसरा रोज सासकभर, अगुवाभर आउर बेबस्‍था सिखइया धरमगुरुभर यरुसलेममे जुटल रेहें। 6हुँवा सबति बन्‍ना पुजारि हन्‍नास, कइयाफा, युहन्‍ना, अलेक्‍जेन्‍डर आउर सबति बन्‍ना पुजारिके घरानक आकुर मनइभर फेक रेहें। 7ओइनें पत्‍रुस आउर युहन्‍नाकेहें बिचमे ठरहबाक पुछनें, “तोइनें कउन सक्‍तिलइक या केहका नाउँमे इ नङ्‍गराकेहें निक करले बाटो?”
8तउ पबित्‍र आत्‍मालइक भरपुर होक पत्‍रुस ओइन कहनें, “जनताके माननिय सासक आउर अगुवाभर हो, 9आज हमरे बरहिया काम करके नेंगे नाइसिक्‍नाकेहें नेंगे सिक्‍ना बनाइलमे तोइनें हम्‍हिन महासभाके आगे लाक कइसे निक करलि कहिके पुछबो कहलेति, 10तोइन आउर इस्‍राइलके सब मनइभरिन पता होबे, कि तोइनिहिंन आगे ठरहेल इ मनइ नासरतके येसु खिरिस्‍टके नाउँमे निक होइल आहे। जेहके तोइनें कुरुसमे टाङ्‌गके मरलो, पर परमेस्‍वर उनके मरलमहति जिति करनें। 11येसुके बारेम धरमसास्‍त्‍रमे अइसे लिखल आहे,
‘घर बनइया मिस्‍तिरिभर जउन पथ्‍राकेहें काम नाइलागि कहिके रद करले रेहें,
आखिरमे उहि पथ्‍रा घरके खास पथ्‍रा होइल।’#भज ११८:२२
12येसु केल मनइभरिन मुक्‍ति देहे सिक्‍हें, काहिक्‍कि हमरे मुक्‍ति पाइक तहन इ धरतिमे मनइभरिनके बिचमे अउरे कुइ नाउँ दहल नाइआहे।”
13जब मनइभर पत्‍रुस आउर युहन्‍नाके हिम्‍मत दिखनें आउर ओइनें दुनु जनें लिख-पर्‌ह नाइकरल आउर सधारन मनइ केल रेहें कहिके पता पइनें, तउ ओइनें सब जनें अचम परनें। ओइनें येसुनसँघ रेहें कहिके फेक पता पइनें। 14पर निक होइल मनइकेहें पत्‍रुस आउर युहन्‍नासँघ ठरहेल देखके ओइनें कुछु मन्‍के नाइसिक्‍नें। 15तभिकमारे ओइनें पत्‍रुस आउर युहन्‍नाकेहें महासभामहति बाहिर जाइक आग्‍याँ दहनें आउर ओइनें एक-अउरेसँघ अइसे छलफल करे लगनें, 16“अब यि मनइन हमरे का करि? काहिक्‍कि यरुसलेमके सब मनइभर येन करल इ अचमके काम पता पइले आहें। अब इ बातकेहें हमरे इन्‍कार करे नाइसिक्‍बा। 17पर इ बात अउरे मनइभरिनके बिचमे फइलेक नाइदेहेकपरि। तभिकमारे येन ‘येसुके बारेम अबतिति कुछु बात फेक कुहिकसँघ नाइकरियो’ कहिके चेताउनि देहेकपरि।”
18ओहकापाछुक ओइनें पत्‍रुस आउर युहन्‍नाकेहें भित्‍तर बुलाक “अबतिति येसुके बारेम कुहिकसँघ कबु फेक बात नाइकरियो आउर नाइसिखइयो” कहिके चेताउनि दहनें। 19पर पत्‍रुस आउर युहन्‍ना ओइन जबाफ दहनें, “तोइन कहल बात मानि कि परमेस्‍वरन कहल मानि, परमेस्‍वरके आगे कउन सहि आहे? तोइनें अपनें बिचार करो। 20काहिक्‍कि हम्‍मर देखल आउर सुनल बात हमरे बिना मन्‍कले रेहे नाइसिक्‍बा।” 21ओहकापाछुक ओइनें पत्‍रुस आउर युहन्‍नाकेहें सजाय दहना निरनय करे नाइसिक्‍के ओइन धम्‍कि दइक छोरदहनें, काहिक्‍कि ओइन करल अचमके काम देखके सब मनइभर परमेस्‍वरके परसन्‍सा करत रेहें। 22काहिक्‍कि जउन मनइ अचमके कामति निक होइल रेहे, ओहका उमेर चालिस बरसति जेदा रेहे।
बिस्‍वासिभरिनके पराथ्‍ना
23पत्‍रुस आउर युहन्‍ना ओइनति छुटकारा पाक बिस्‍वासिभरिनतिरा गिनें। खास पुजारि आउर अगुवाभरिन कहल सब बात ओइन सुनइनें। 24अइसन बात सुनलपाछुक ओइनें सब मिलके परमेस्‍वरसँघ अइसे पराथ्‍ना करे लगनें, “हे सरबसक्‍तिमान परभु, बदरि, धरति, समुन्‍दर आउर ओहमे रहल सब चिझ तुम्‍हि बनइलो।#पर्‌स २०:११; नहे ९:६; भज १४६:६ 25तुम पबित्‍र आत्‍माति अपना सेबक हम्‍मर पुरखा दाउदके मुहमहति अइसे मन्‍कलो,
‘अउरे जातके मनइभर काहिक दिक्‍कइतियाँ?
आउर मनइभर काहिक बेकारमे जाल रचतियाँ?
26परमपरभु आउर उनका छाँटल खिरिस्‍टके बिरोधमे
धरतिक राजा आउर
सासकभर एकसँघ जमा हुइनें।’#भज २:१-२
27काहिक्‍कि सहिके तुम्‍हर छाँटल, पबित्‍र सेबक येसुके बिरुधमे अउरे जाति आउर इस्‍राइलिभरिनसँघ हेरोद आउर पिलातस इ सहरमे जमा होइल रेहें।#मत्‍ति २७:१-२; मर्‌क १५:१; लुका २३:१,७-११; युह १८:२८-२९ 28पर ओइनें ते तुम्‍हर अपना सक्‍ति आउर इच्‍छालइक अग्‍देति करल निरनय ढार केल काम करनें। 29अब हे परमपरभु, ओइन दहल धम्‍किघइन धियान देउ, आउर तुम्‍हर दासभरिन पुरा हिम्‍मतसँघ तुम्‍हर बचन मन्‍के देउ। 30अपना सेबकभरिन तुम्‍हर पबित्‍र सेबक येसुके नाउँमे बिमरहियाभरिन निक करना आउर अचमके काम करति चिन्‍हा दिखइना सक्‍ति देउ।”
31अइसे पराथ्‍ना करसिकल‍पाछुक ओइन जमा होइल जगा हलल। ओइनें सब पबित्‍र आत्‍मालइक भरगिनें आउर ओइनें परमेस्‍वरके बचन नाइडराक सुनाइ लगनें।
बिस्‍वासिभरिनके साझा सम्‍पति
32बिस्‍वास करइयाभर सब अक्‍के मन आउर अक्‍के बिचारके रेहें, आउर ओइनमहति कुइ फेक अपना धन-सम्‍पतिक कुछ चिझ इ मोर आहे कहिके नाइकेहें, पर ओइनसँघ रहल सब चिझ साझा रेहे।#पेरे २:४४-४५ 33परभु येसु मरलमहति जिति होइल आहें कहिके पेरेरितभर बन्‍ना सक्‍ति पाक गबाहि देहें आउर परमेस्‍वर ओइन सबकाउप्‍पर दया करके ढेरे आसिस दहनें। 34ओइनमहति कुहिक फेर कुछु चिझके जरुरत नाइरेहे, काहिक्‍कि जेहकातिरा जगा जमिन कि घरबार रेहे, ओइनें उ बेंचके आइल पइंसा, 35पेरेरितभरिनतिरा लामें, आउर जेहके-जेहके जा-जा चिझके जरुरत परे, जरुरत परल ढार बाँटदियें।
36उ दिनमे साइपरस टापुके लेबि कुलके योसेफ नाउँ रहल मनइ रेहें। पेरेरितभर उनके बारनाबास कहिके बुलामें, जेहका अरथ उत्‍साह दहना मनइ आहे। 37उ फेक अपना खेत बेंचके पाइल पइंसा पेरेरितभरिनके आगे धरदहनें।
© 2024 (Active), Mother Tongue Translators Society and Wycliffe Bible Translators, Inc. All rights reserved.