Marcos 13

Jesús mdej yub yodoꞌ

(Mt. 24:1-2; Lc. 21:5-6)

1Senꞌ ndaroꞌ Jesús tenꞌ ndob yodoꞌ, tib xinꞌ teꞌd Jesús nchab:

—¡Maestr, bwiꞌ xa nawe nya re ke naksaꞌ yodoꞌ reꞌ nde nawe nya diba!

2Mkab Jesús lo xa', nchab Jesús:

—¿Cho ngwiꞌa dib yodoꞌ ro reꞌ? Nek thib ke ba nayaꞌntay xis ta ne'y, retay yub.

Jwan' lo' ak sen' tera' yoloy thibta ne

(Mt. 24:3-28; Lc. 21:7-24; 17:22-24)

3Zyasa nda xaꞌ tenꞌ ndole kox ya Olib, tenꞌ ndloꞌ ndob yodoꞌ. Tya mdob Jesús, leꞌ Pedr, Jakob, Juan nde Ndres, xaꞌta mnabdiꞌs xaꞌ lo Jesús, nchab xaꞌ:

4—Btej lo náꞌ. ¿Pol ak re jwanꞌ reꞌ? ¿Nde kwan libeꞌ men senꞌ lo tyobte aka?

5Leꞌ Jesús nchab:

—Nda wiꞌ toz goꞌ sa nek thib men nakwinꞌnoda xa' goꞌ. 6Tak nar toz xaꞌ ye'd nde nye xaꞌ: “Na nak Crist, Xaꞌ mtelꞌ Dios”. Nde bro toz men kwin'no xa'.

7Nde senꞌ lo gon goꞌ nzo yalbyo nde nzo'b diꞌs yora yalbyo, nazyepta goꞌ, tak nakiꞌnka ta aka nde na'nakta jwanꞌ nata mney. 8Zyara' yo re yez kon yez nde rey kon rey; nde na'r toz tenꞌ win xo nde taja yo win, zya anta ndryoꞌ men karrel, jwanꞌ re' nak xanꞌ re yalti jwan' ye'd.

9Lega goꞌ, nda wiꞌ toz goꞌ, tak tayaꞌ men goꞌ lo re xaꞌ nak sinꞌ nde lenꞌ yo tenꞌ ndyop men Israel tya kin xaꞌ goꞌ. We xaꞌ goꞌ lo re xaꞌ nyebeꞌ lo reta yez nde lo rey tak ndli lazoꞌ goꞌ na, tya tej goꞌ na lo xaꞌ. 10Nde ndablo nerla diꞌs wen chanꞌ Dios ryaꞌs dib xis izyo. 11Nde senꞌ nda xiꞌ xaꞌ goꞌ sa tayaꞌ xaꞌ goꞌ lo xaꞌ nak sinꞌ, nalit goꞌ xgab xamod kab goꞌ, tak Dios tob diꞌs ro goꞌ sa kab goꞌ nde nakta goꞌ jwanꞌ todiꞌs zya, Mbi Nayon chanꞌ Dios todiꞌs. 12Nde nzo xaꞌ tayaꞌ lega wes xaꞌ sa kuj men xaꞌ, xud xaꞌ tayaꞌ xinꞌ xaꞌ nde xinꞌ xaꞌ yo xud xaꞌ nde kuj xaꞌ xud xaꞌ. 13Nde reta men yiꞌno xaꞌ goꞌ tak ndli lazoꞌ goꞌ na. Leꞌ goꞌ jwanꞌ ne ndo lo xkiꞌs Dios, xek goꞌ kebeꞌ yolo reta jwanꞌ reꞌ, men ya kayaꞌ yalnaban adiꞌ.

14Men ndlab, xaꞌ ya yen diꞌs jwanꞌ mkeꞌ profet Daniel#13:14 Profet nak ti xaꞌ mbrid xkiꞌs Dios pola. nchab xa':#13:14 Daniel 9:27, 11:31, 12:11 “Senꞌ lo wiꞌ goꞌ ndoyak jwanꞌ narax nakap toz nya tenꞌ nandabloda aka”,#13:14 Tenꞌ nandabloda ak jwanꞌ nakap toz nya, tya nak lenꞌ yodoꞌ Jerusalén. zyasa bxonꞌ goꞌ, leꞌ reta men nzi lo xyon Judea, xyonꞌ xaꞌ nda xaꞌ yek yi'. 15Leꞌ xaꞌ ndo yek yo, lya xaꞌ nde na'yoted xaꞌ lenꞌ yo sa kote xaꞌ chanꞌ xaꞌ. 16Nde xaꞌ jwanꞌ nke sinꞌ wan, na'beretra xaꞌ sa we xaꞌ xab xaꞌ. 17Nalat tyák re ngol nzo xinꞌ nde re ngol jwanꞌ ngeno mbed mey wiz ya. 18Mna'b toz goꞌ lo Dios, sa naꞌakta jwanꞌ reꞌ senꞌ nxyo'b yop. 19Tak re wiz ya jwanꞌ toz yo yalti, ti yalti jwanꞌ nanchoda xata mtoxkwaꞌ Dios izyo nde axta naya nde na'yotray tedib gob. 20Nde tez Xaꞌ Nyebeꞌ taꞌ diꞌs bro yo yalti, nek tib men nabantra; benꞌta tak nkeꞌ lazoꞌ Dios re men jwanꞌ mbli Xaꞌ, jwanꞌ nasa lud taꞌ Xaꞌ diꞌs yo yalti.

21Zyasa tez nzo men nye lo goꞌ: “Bwiꞌ goꞌ, xaꞌ reꞌ nak Crist xaꞌ mtelꞌ Dios”, “Bwiꞌ goꞌ, leꞌ Xaꞌ ndo ba”, nalid lazoꞌ goꞌy. 22Tak zya ye'd re xaꞌ kwinꞌ gab xaꞌ, “xa' nak Crist nde xa' nak profet”#13:22 Profet nak ti xaꞌ jwanꞌ ndrid xkiꞌs Dios pola. nde li xaꞌ re yalnaro jwanꞌ nzoyen men, sa kwinꞌno xaꞌ men, axta noga re men jwanꞌ mbli Dios, chal xaꞌ kwin'no xaꞌ men ya. 23Jwanꞌ nasa nda wiꞌ toz goꞌ; tak mdej la nay lo goꞌ nal tera aka.

Sen' ye'd Xinꞌ Mbiꞌ

(Mt. 24:29-35,42-44; Lc. 21:25-36)

24Lenꞌ wiz ya, senꞌ mne mbrid reta yalti toz, leꞌ wiz na'toxnitray nde mbeꞌ natatray xni, 25nde reta mbel nzi lo beꞌ ryo'ndaba nde re yalne naro toz nzo lo beꞌ, xi'da. 26Zyasa wiꞌ goꞌ, Xinꞌ Mbiꞌ mbyeꞌd lo izyo, ye'd Xaꞌ xij xkow, ye'dno Xaꞌ yalne toz nde dib yalnaro chanꞌ Xaꞌ. 27Nde zya telꞌ Xaꞌ reta Áng Xaꞌ, nde thop Áng reta men jwanꞌ mbli Dios dib nax xis izyo, axta ploja tenꞌ mdib izyo nde mdib beꞌ.

28Pteꞌd goꞌ di's nabix chan' ya hig: Senꞌ ndryo'xo'b re xod yen'na nde ndryo'xo'b re la yenꞌ lo xod, mne goꞌ leꞌ beꞌ yi ndea gax. 29Nde taga jwanꞌ goꞌ, senꞌ mne go' ndoyakla reta jwanꞌ reꞌ, ndablo nye goꞌ leꞌ wiz yed Xaꞌ, ndosin gaxla. 30Lipa nin lo goꞌ, reta jwan' re' ak sen' tera' lux reta men ta nzi naya. 31Le' beꞌ nde izyo tluxa, per re xkiꞌs na na'luxtay.

32Per wiz ya nde hor ya ngenta cho nyey, nekla re áng nzi lo beꞌ, nde nekla Xinꞌ Mbi' naꞌnyeday, benꞌta Pay mney.

33Jwanꞌ nasa, brena goꞌ nde ptodiꞌsno goꞌ Dios, tak na'nyed goꞌ pol yoxo'b beꞌ ya. 34Naka xa ti mbiꞌ mbroꞌ nda tij, mtanꞌno xa' liz xaꞌ lo men nde mda' xa' yalnyebe' lo re mos, nde kad thiba xaꞌ sinꞌ li xa' nde mnabeꞌ xaꞌ tyobna xaꞌ jwanꞌ kenap ro yo. 35Taga goꞌ, brena goꞌ, tak na'nyed goꞌ pol bere xaꞌ nak liz; cho ndakow izyoy, cho rol yalꞌ la, senꞌ mbez ngidteꞌy, o ndatuxni izyoy, 36sa sen' lo xajta sin xaꞌ, naꞌyosibta xaꞌ goꞌ nziyat goꞌ. 37Nde jwanꞌ ta ntej na lo goꞌ reꞌ, lo reta men ntej nay: Brena goꞌ.

Currently Selected:

Marcos 13: zpt

Highlight

Copy