Lucas 7
7
Jesus mtodanꞌ thi xa' nak mos xaꞌ nyebeꞌ lo sondad
1Senꞌ mne mni Jesus lo re men, mbroꞌ Jesus nda Jesus yez Capernaum. 2Nde yez ya nzo thi xaꞌ Rom, jwanꞌ nyebeꞌ lo thib ayoꞌ sondad, xaꞌ ya ngeno thi mos jwanꞌ nkeꞌ toz lazoꞌ xaꞌ, nde jwanꞌ toz nayiz mos, mer gaj mos. 3Senꞌ mbin xaꞌ nyebeꞌ ya ndej men Jesus, mtelꞌ xaꞌ pla xaꞌ Israel xaꞌ gox jwan' nyebe' lo re xa' Israel, sa ya naꞌb xaꞌ lo Jesus yeꞌd todanꞌ Jesus mos xaꞌ. 4Senꞌ mzin re xaꞌ lo Jesus mnaꞌb toz xaꞌ lo Jesus nchab xaꞌ:
—Nzal' ye'd la'stoa xaꞌ nyebeꞌ lo sondad. 5Tak nkeꞌ lazoꞌ xaꞌ na', xaꞌ Israel nde mtaꞌ xaꞌ thi yo tenꞌ ndyop na'.
6Zyasa nda Jesus kon re xaꞌ ya, per senꞌ ndozin Jesus gax liz xaꞌ, zyasa leꞌ xaꞌ nyebeꞌ ya mtelꞌ pla xa' nzal' ta xaꞌ, ngwa yab lo Jesus:
—Naꞌlit la xgab yotea lenꞌ liz na, tak nanzalꞌta na yotea lenꞌ liz na; 7jwanꞌ nasa na'ngad yub na ngaxin la. Per benꞌta mnabeꞌ lo yis sa dyanꞌ mos na. 8Tak noga na ngenon xaꞌ nyebeꞌ lon, nde noga ngenon re sondad jwanꞌ nyebeꞌn lon'. Senꞌ gab na lo thi xaꞌ, "wa", nda xaꞌ, senꞌ gab na lo thib xaꞌ, "deꞌ ", nde xaꞌ, nde senꞌ nyebeꞌn lo mos na li xaꞌ thi jwanꞌ, ndli xaꞌy.
9Senꞌ lo mbin Jesus jwanꞌ reꞌ leꞌka nzoyen Jesus, nde mbwiꞌ Jesus lo reta men ndanke xis Jesus nde nchab Jesus:
—Lipa nin lo goꞌ ke nek thib xaꞌ Israel teraꞌ yosal na jwanꞌ ndli toz lazonꞌ xaja ndli lazoꞌ mbiꞌ reꞌ.
10Nde senꞌ mbere re xaꞌ ta mtelꞌ xaꞌ nyebeꞌ lo re sondada liz xaꞌ, mbwiꞌ xaꞌ leꞌ mos xaꞌ ya mdyanꞌla.
Jesus mtoban thi xinꞌ ngol nguj sal' na'
11Senꞌ mne mbrid re jwanꞌ reꞌ, ngwa Jesus thi yez ndole Nain, kon re xin'te'd Jesus nde men toz ndanke xis Jesus. 12Senꞌ ndozin Jesus gax ro yez, mbwiꞌ Jesus nda ka's xa' thi thabol, nde thabol ya nak xinꞌ thi ngol nguj sal' na', thib nya or lo ngol. Nde men toz nda li kompay ngol. 13Senꞌ mbwiꞌ Jesus ngol ya, mblat lazoꞌ Jesus xaꞌ nde nchab Jesus lo xaꞌ:
—Naꞌgonta la.
14Nde mbike Jesus gax cho lon' nde mbwal Xa'y, leꞌ re xaꞌ neꞌ lon' nzob or nguja ngoto xaꞌ, nde nchab Jesus lo or nguja:
—Mbyo, nin loa: ¡Goche!
15Zyasa ngoche or nguja nde mdobte mdodiꞌs or, nde mdaꞌya' Jesus or lo xnaꞌr. 16Le' reta men ta nzi wiꞌ ya mzyeb toz xa' jwanꞌ ta ngoka, nde mdobte ni xaꞌ diꞌs wen lo Dios nchab xaꞌ:
—Thi profet ro nzo xij naꞌ.
Nde nchaba xaꞌ:
—Dios nde laꞌsto re men yez Dios.
17Nde dib lo xyon Judea nde re yez nzi dib tya mbin xaꞌ jwanꞌ mbli Jesus.
Juan ta ngole men mtelꞌ chop xaꞌ nyaꞌb diꞌs lo Jesus
18Re xa' xin'te'd Juan ta ngole mena mdej xa' lo Juan re jwanꞌ mbli Jesus. Zyasa mbrez Juan chop xin'te'd Juan, 19nde mtelꞌ Juan xaꞌ lo Jesus, sa nyabdiꞌs xaꞌ lo Jesus: "¿Cho lu nak xaꞌ ta nak kwent telꞌ Dios o ndablo kwed xaꞌ tediba xaꞌ?"
20Senꞌ mzin rop xaꞌ ta mtelꞌ Juan na lo Jesus, nchab xaꞌ:
—Juan ta ngole men mtel' ná' sa nyabdi's ná' loa: "¿Cho lipa lu nak xaꞌ ta nak kwent telꞌ Dios o ndablo kwed náꞌ tedib xaꞌ?"
21Nde le'xa zyapa mtodanꞌ Jesus bro men nayiz, re men ndyak yalti, re men jwanꞌ nzo mbi narax, nde bro men nglwe mtodanꞌ Jesus ngudlo xaꞌ. 22Zyasa mkab Jesus lo xin'te'd Juan nchab Jesus:
—Bya goꞌ nde btej goꞌ lo Juan reta jwanꞌ mbwiꞌ goꞌ nde reta jwanꞌ mbin goꞌ, re xaꞌ nglwe, ngwiꞌ xaꞌ, re xaꞌ naꞌakta tye ndye xaꞌ, re xaꞌ ndyak ye'sya's, mbyak xaꞌ, re xaꞌ nkweꞌ mxyalꞌ nza xaꞌ, re xaꞌ nguj mbroꞌxban, nde re xaꞌ prob ndoyon xa' diꞌs wen chanꞌ Dios. 23Nabeꞌz toz nda xaꞌ jwan' nanchakropta xgab na' kwent ndyonke xa' xis na.
24Senꞌ ndyala re xin'te'd Juan, Jesus mdobte mdodi's Xa' kwent chanꞌ Juan lo re men nchab Xa':
—¿Cho kwan mbwi' go' sen' ngwa go' izyo nagan? ¿Cho benta thi yi nkwin mbi mbwiꞌ goꞌ? 25Per, ¿cho ngwa wiꞌ goꞌ sa? ¿Cho thi mbiꞌ nok lar nap toza? Goꞌ mne le' re xaꞌ ndyokwa' nde re xa' ngeno re jwan' nap, liz rey nzo xa'. 26Per, ¿cho ngwa wiꞌ go sa? ¿Cho thi profet mbwiꞌ goꞌ? Lipa, nin lo goꞌ, thi profetka ngwa wiꞌ goꞌ, nde xa' nak mas ke thi profet. 27Juan reꞌ ngetej xkiꞌs Dios, tenꞌ nchab:
Na telꞌ thi xaꞌ kwiblo loa,
xaꞌ toxkwaꞌ xned la.
28Na ni lo goꞌ, xij reta mbi' ngol xis izyo re', tera' yo thi profet mas ntak lo Juan, per xaꞌ jwanꞌ mas lud ntak ten' nyebe' Dios, xaꞌ ya mas ntak lo Juan.
29Senꞌ mbin re men jwan' na nde axta re xaꞌ nthop tmi low par yez Rom mbyolo xa' gal' nak xned Dios, nde mblole Juan xa'. 30Per re xaꞌ fariseo nde re maestr nchak ley, mblotal xaꞌ yalwen jwanꞌ nchola's Dios li Dios lo xaꞌ, tak na'ndeyalta xa' ngo'le Juan xa'. 31Zyasa nchab Jesus:
—¿Cho kwan kalal na kon re men nzo tyemp reꞌ? ¿Cho kwan lal nak xa'? 32Nak xa' xaja re mbyo ta mbe lo xbiꞌ ngija nde mbez lo tan': "Mkeꞌ náꞌ flaut, nde naꞌnkanida goꞌ, mbilꞌ náꞌ di nabil ndye, nde naꞌngonꞌta goꞌ." 33Tak mbyeꞌd Juan ngole men, namdada xaꞌ pan nde nanguꞌda xaꞌ bin, nde mbez goꞌ mbi narax nzo xaꞌ. 34Mbye'd Xin' Mbi' ncha nde nchu', nde mbez goꞌ xaꞌ wacho nde xaꞌ nchuꞌ bin, nde nzalꞌ ta xa' re xaꞌ nthop tmi low par Rom nde kon re xaꞌ nzo'b xken na'. 35Per yalnchak chan' Dios ndloꞌ ndonoy re men jwanꞌ lí nkwan' na.
Jesus ngwa liz Simon xaꞌ fariseo
36Zyasa thi xaꞌ fariseo mna'b lo Jesus, sa ya tha Jesus liz xaꞌ, senꞌ ngote Jesus len' liz xaꞌ mdob Jesus ro mes. 37Nde yez ya nzo thi ngol jwanꞌ nzoꞌb xken naꞌ, senꞌ mne ngol ndobya Jesus liz xa' fariseo, ngwa ngol nde mbeꞌ ngol thi bot naksa' ke ndole alabastro nzo perfum. 38Nchonꞌ ngol ndoxub ngol lad xis Jesus, nde kon nit mbe lo ngol mbwaz ngol ni Xa', xisa kon yis yek ngol mkwiꞌs ngol ni Xaꞌ, mda ngol chut ni Xaꞌ nde mchub ngol perfum ni Xa'. 39Senꞌ mbwiꞌ xaꞌ fariseo ta mbeꞌ Jesus liz naꞌ ya, jwanꞌ mbli ngol ya, mbli xaꞌ xgab: "Tez liga profet nak Xaꞌ reꞌ, mnea Xaꞌ cho men nak ngol ta ndo gal Xaꞌ, ngol nzo'b xken na'y." 40Zyasa nchab Jesus lo xaꞌ fariseo:
—Simon, ncholas na tej na thi jwanꞌ loa.
Le' Simon mkab:
—Pteja, Maestr.
41Jesus nchab:
—Ngo chop xaꞌ nda'b tmi lo thi xaꞌ ngoꞌ prest. Thib xaꞌ ndab gayꞌ ayoꞌ tmi plat. Nde tedib xaꞌ nda'b chop siꞌ tmi plat. 42Nde nek thib xa' nandlid gan ngixa lo xaꞌ ta mda' prest tmi ya, zyasa xaꞌ ta mda' prest tmi ya mton' xa' jwan' nda'b rop xa' ya. Naya ptej lon, ¿Lo rop xa', xanya xa' mas nke' lazo' xa' jwan' ta mda' prest tmi ya?
43Leꞌ Simon mkab:
—Nda lazoꞌn xaꞌ jwanꞌ mdyon' mas bro tmi nda'b ba.
Jesus nchab:
—Lin lay.
44Zyasa mbwiꞌ Jesus lo ngol nde nchab Jesus lo Simon:
—¿Bwiꞌ nea, ngol reꞌ? Senꞌ ngoteꞌn len' liz la namdat la nit ngech nin, per ngol reꞌ mtach nin kon nit mbe ngudlo ngol nde mtokwiꞌs ngola kon yis yek ngol. 45Namdad la chut kwat na, per ngol reꞌ xata ngoten liz la ndoya ngol chut nin. 46Namchupta la aseyt yek na, per ngol reꞌ mchub perfum nin. 47Jwan' nasa na ni loa, reta xken ngol mdyon'la, jwanꞌ na bro toz nkeꞌ lazoꞌ ngol na, per xaꞌ lud xken naꞌ ndyonꞌ, lud nkeꞌ lazoꞌ xaꞌ.
48Zyasa nchab Jesus lo ngol:
—Reta xken la mdyon'la.
49Nde re xaꞌ jwanꞌ nzino Jesus ro mes, nchab xaꞌ:
—¿Cho nak Xaꞌ reꞌ, sa no Xa' nton' xken men?
50Per Jesus nchab lo ngol:
—Tak mbli lazoꞌa na, jwanꞌ na mblya lo xken la, nabe'z bya.
Currently Selected:
Lucas 7: zpt
Highlight
Copy
Compare
Share
Want to have your highlights saved across all your devices? Sign up or sign in
Active: ©Wycliffe Bible Translators, Inc. All rights reserved.
