Lucas 23

Mbeꞌ xaꞌ Jesus lo Pilat

1Zyasa mdoli reta xaꞌ, nde mbeꞌ xaꞌ Jesus lo Pilat. 2Nde mdobte mkeꞌ xaꞌ yalke yek Jesus, nchab xaꞌ:

—Mbi' re' ngoga lo náꞌ, ngetoxol Xa' re men las náꞌ. Mbez Xaꞌ lo men, nandabloda kix náꞌ tmi low lo Cesar, nde mbloꞌro Xaꞌ, mbez Xaꞌ, le' Xaꞌ nak Xaꞌ mtelꞌ Dios, nde rey nak Xa'.

3Zyasa mnabdiꞌs Pilat lo Jesus, nchab:

—¿Cho lu nak Rey lo re xaꞌ Judi?

—Jesus mkab, nchab:

—Le'ga lu ndoteja.

4Zyasa nchab Pilat lo re nglweyꞌ jwanꞌ nyebeꞌ nde lo re men nzi tya.

—Nekthib yalke naꞌnzalta na nchap mbiꞌ reꞌ.

5Per mas ne ro re xaꞌ, nchab xaꞌ:

—Nyaga ndli xa' nchak xol' reta men dib Judea, xata mdobte Xa' axta Galilea nde naya axta nche' ngoxob Xa' ngetote'd re men.

Mbeꞌ xaꞌ Jesus lo Herodes

6Senꞌ mbin Pilat jwanꞌ reꞌ, zyasa mnabdiꞌs Pilat nchab Pilat:

—¿Cho xaꞌ Galilea mbiꞌ reꞌ? 7Nde senꞌ mbin Pilat ke Jesus nak xaꞌ yez tenꞌ nyebe' Herodes, zyasa mtelꞌ Pilat Jesus lo Herodes, tak lenꞌ wiz ya noga Herodes mbya yez Jerusalen. 8Senꞌ mbwiꞌ Herodes Jesus, jwanꞌ toz ngo nale lazoꞌ xa', tak ndala ncholaꞌs xa' wiꞌ xa' Jesus, tak nchon xa' nda' men kwent chan' Jesus nde ndombed xa' wiꞌ xa' li Jesus thi yalnaro. 9Zyasa mnabdiꞌs Herodes naꞌr jwanꞌ lo Jesus, per ngen kwan nkab Jesus. 10Re nglweyꞌ jwanꞌ nyebeꞌ nde re maestr nchak ley ta nzi tya, anega ndo xa' ngeke' xa' yalke yek Jesus. 11Zyasa Herodes nde kon re sondad xaꞌ, mblotal xaꞌ Jesus nde par xiꞌno xaꞌ Jesus mbwok xaꞌ Jesus thi lar wen nde bere mtelꞌ Herodes Jesus lo pilat tedib gob. 12Nde lenꞌ wiz ya bere mzalꞌta Pilat kon Herodes tedib gob, tak mas pola nanzal'ta xki's rop xa'.

Mdaya' xa' Jesús sa gaj Jesús

13Zyasa mbrez Pilat re nglweyꞌ jwanꞌ nyebeꞌ, re xaꞌ ngeno yalnyebeꞌ nde re ma yez, 14nde nchab Pilat lo xaꞌ:

—Goꞌ ndeno mbiꞌ re lon, mbez goꞌ xaꞌ ntoxol re men, per naya nzi wiꞌ goꞌ mnabdiꞌs na lo xaꞌ, nde naꞌyosalta na nek thib yalke jwanꞌ nkeꞌ goꞌ yek xaꞌ. 15Nde noga' Herodes naꞌngazalta xa' nek thib yalke mbli mbiꞌ reꞌ, jwanꞌ nasa mzire Herodes xaꞌ lon tedib gob. Per ngen cho jwanꞌ narax mbli mbiꞌ reꞌ par gaj xaꞌ. 16Senꞌ mne mdin na Xa', lan Xa'.

17Nde reta lin' len' ni, nakin' la' xa' thi xa' jwan' nge lizyi'b. 18Zyasa reta xaꞌ nzi tya mdobte ne toz mbrez xaꞌ, nchab xaꞌ:

—¡Blaꞌ diꞌs gaj mbiꞌ reꞌ nde blaꞌ Barrabas!

19Tak Barrabas nge lizyiꞌb kwent mtoxol xaꞌ men xis xaꞌ nak sin' nde mbij xaꞌ thi men. 20Per Pilat mni lo xaꞌ tedib gob, tak Pilat ncholaꞌs laꞌ Jesus. 21Nde reta men masra ne toz mbrez xaꞌ, nchab xaꞌ:

—¡Pkeꞌ Xaꞌ lo cruz! ¡Pkeꞌ Xaꞌ lo cruz!

22Zyasa ngo xob mbyon gob mni Pilat lo xaꞌ nchab:

—Per ¿cho jwanꞌ narax mbli mbiꞌ reꞌ? Naꞌyozalta na nek thib jwanꞌ narax mbli Xaꞌ sa gaj Xaꞌ. Senꞌ mne mdin na Xa', lan Xa'.

23Per re men ne ro xaꞌ masra' ne toz mbrez xaꞌ, mnaꞌb xaꞌ sa keꞌ Pilat Jesus lo kruz, nde por lo ne toz mbez xaꞌ, mbli xaꞌ gan, mbli Pilat jwanꞌ ncholaꞌs xaꞌ. 24Zyasa mnebeꞌ Pilat ak axaja ncholaꞌs re xaꞌ ya. 25Zyasa mdaꞌ Pilat di's mbroꞌte Barrabas, xaꞌ jwanꞌ nge lizyiꞌb kwent mtoxol' xa' re men xis xaꞌ nak sin' nde mbij xaꞌ men nde mdayaꞌ Pilat Jesus axaja ncholaꞌs re xaꞌ ya.

Mke' xaꞌ Jesus lo kruz

26Senꞌ mbeꞌ xaꞌ Jesus sa keꞌ xaꞌ Jesus lo kruz, zyasa thi xaꞌ yez Cirene ndole Simon, jwanꞌ ndobere ndya ngwa sin', mnibeꞌ sondad lo xaꞌ mxoꞌbyen xaꞌ kruz, mbeꞌ xaꞌy nde ndanke xaꞌ xis Jesus.

27Nde men toz ndanke xis Jesus nde re ngol jwanꞌ toz tir mbez ngol nchonꞌno ngol Jesus. 28Per Jesus mbwiꞌ lo re ngolꞌ nde nchab Jesus:

—Men got yez Jerusalen, naꞌgonod goꞌ na, che'la leꞌga goꞌ bin'no go' nde bin'no re xinꞌ goꞌ. 29Tak tsin wiz senꞌ gab men: ꞌꞌWen nda re ngol jwanꞌ na'nkeloda xinꞌ naꞌ nde re ngol jwanꞌ namxanta mbed, nekla mdaꞌ nis nguꞌ mbed.ꞌꞌ 30Zyasa tyobte gab re men re lo yiꞌ: ꞌꞌGob xis náꞌ,ꞌꞌ nde lo re kox, ꞌꞌBwot xis náꞌ.ꞌꞌ 31Tez ta ndlino xaꞌ ya yeba, ¿cho leta ya bis, xa lino xa'y?

32Nde noga mbeꞌ xaꞌ chop xaꞌ xkap, sa thita kuj xa' xa' kon Jesus. 33Senꞌ mzin xaꞌ tenꞌ ndole "Zij yek men," tya mkeꞌ xaꞌ Jesus lo kruz, nde kon rop xaꞌ xkapa: thib xaꞌ mkeꞌ xaꞌ lad ban Jesus nde tedib xaꞌ mkeꞌ xaꞌ lad beg Jesus. 34Zyasa nchab Jesus:

—Xud na, btonꞌ xken xaꞌ, tak naꞌnyed xaꞌ jwanꞌ ndli xaꞌ.

Nde re sondad, mblibe' xaꞌ xis xab Jesus sa nyenꞌ xanya xaꞌ ndinꞌ yan'noy. 35Nde men nzi tya nzi wiꞌ xa', nde axta re xaꞌ nyebeꞌ yolow nxino xaꞌ Jesus nchab xaꞌ:

—Mtola' Xaꞌ xaꞌga re men, xa na'naya tolaꞌ Xaꞌ leꞌga leꞌ Xaꞌ, tez lipa nak Xaꞌ, Xaꞌ mtelꞌ Dios nde Xaꞌ mblí Dios.

36Noga re sondad nxino xaꞌ Jesus nde mbike xaꞌ gax tenꞌ nge Jesus sa taꞌ xaꞌ nit ub ni gu Jesus, 37nde nchab xaꞌ lo Jesus:

—¡Tez lu nak Rey lo re xa' judi, le' ptolaꞌ lazo'a.

38Nde mkeꞌ xaꞌ thi letr a'yek Jesus, jwan' nge diꞌs grieg, diꞌs latin nde diꞌs hebreo, nchab: ꞌꞌXAꞌ REꞌ NAK REY LO RE XAꞌ JUDI.ꞌꞌ

39Nde thib xaꞌ xkap nge lo cruz cho Jesus mnixin xaꞌ lo Jesus, nchab xaꞌ:

—Tez nak la xaꞌ mtelꞌ Dios, le' ptolaꞌ lazo'a nde btolaꞌ náꞌ.

40Le' tedib xaꞌ xkap jwanꞌ nge tedib lad cho Jesus, mbrez xa' yek ta xa':

—¿Cho nanzyebta la Dios, ta thita yalti ndoriꞌd re yon naꞌ? 41Per rop naꞌ nzal'ka na' rid naꞌ re yalti reꞌ, por re jwanꞌ narax mbli naꞌ; per mbiꞌ reꞌ namblid Xaꞌ nek thib jwanꞌ narax.

42Zyasa nchab xaꞌ lo Jesus:

—Jesus, telaꞌs la na senꞌ tyobtea nyebeꞌa.

43Jesus mkab lo xaꞌ:

—Nipa na loa, thita kwen' lo beꞌ na wiz.

Nguj Jesus

44Nde a rolja wiz mbla yalꞌkow dib izyo, axta hor mbyon bzyeba. 45Nde mdo' wiz, nde lar jwanꞌ nge len' yodoꞌ, a rolja mcheda ngok chop ley. 46Zyasa ne mbrez Jesus, nde nchab Jesus:

— Xud na, lo ya'a tayan xbin na.

Nde senꞌ mne nchab Jesus jwanꞌ reꞌ, nguj Jesus.

47Senꞌ mbwiꞌ xaꞌ nyebeꞌ lo re sondad jwan' ngok, mblinaro xaꞌ le Dios, nde nchab xaꞌ:

—Lipa mbiꞌ reꞌ ngok Xaꞌ thi mbi' gal'.

48Nde reta men jwanꞌ nzi tya, mbwiꞌ xaꞌ reta jwanꞌ ngok, mbere xa' yez, nginya' xaꞌ lazoꞌ xaꞌ. 49Le' re xaꞌ jwanꞌ ncholo Jesus, nde re ngol jwanꞌ xata jwan' mdonke xis Jesús xata mbro' xa' Galilea, tij mbre re xa' mbwi' xa' reta jwan'.

Mka's xaꞌ Jesus

50Ngo thi mbiꞌ wen nde galꞌ nak ndole Jose, xaꞌ yez Arimatea lo xyon Judea. Nde no xaꞌ nak xaꞌ nyebeꞌ ro lo re xaꞌ Israel. 51Per nanda'd ro xaꞌ lo re xaꞌ ta mtoti Jesus, tak xaꞌ ngembed sin yalnyebeꞌ chan' Dios, 52zyasa ngwa xaꞌ lo Pilat nde mnaꞌb xaꞌ thabol Jesus. 53Senꞌ ngolo mbla xaꞌ thabol Jesus lo cruz, mchal lar xaꞌ Xa' nde mka's xaꞌ Xa' lenꞌ baꞌ jwanꞌ mdenꞌ xaꞌ lad ke, tenꞌ tera' ga's nek thib men. 54Nde wiz ya nak wiz ntoxkwaꞌ xaꞌ jwanꞌ wa xaꞌ lenꞌ wiz ndryoꞌxkwen xaꞌ, nde tud la ndab tyobte wiz ya.

55Nde no re ngol jwanꞌ mbro'no Jesus Galilea, mdonke ngol nde mbwiꞌ ngol baꞌ tenꞌ mka's xa' Jesus. 56Senꞌ mbere re ngol yo, mtoxkwaꞌ ngol aseyt nde pomad naxeꞌ ndyaꞌ. Nde mbroꞌxkwen xaꞌ wiz jwan' ndryoꞌxkwen men Israel, xata nyebeꞌ ley chan' Moisés.

Currently Selected:

Lucas 23: zpt

Highlight

Copy

Compare