मती 9

लकुआ हू बिमार मनके होज करवो

(मरकुस 2:1–12; लूका 5:17–26)

1पसे ईसु एक नाव माते सड़जो नी दरिया ने पीली हाड़े कफरनहूम नगर मा आजो जिय वी रेतो तो। 2मनका एक लकुआ हू बिमारे खाटला माते हुवाड़ीनी वणा कनी लाजअ, नी ईसुई वणने विसवास जुईनी, वणा लकुआ हू बिमार आदमी हू केजू, “हे सुरा, हिमत राक, तारे पाप माप थाजा।”

3नी जुओ, थुड़ाक मुसा ने नियम हिकाड़वा वाला एक बिजा हू केवा लागा, “ई मनक ते आपड़े सबद हू परमेसवर ने बुराई करे हे।”

4ईसुई वणने मन ने वाती जाणीनी केजू के, “तमो आपड़े आपड़े मन मा बुरा विसार हय करो हो? 5वदार सरल हूं हे? हूं यू केवू के, ‘तारे पाप माप थाजा’ या यू केवू के, ‘उट नी हिड़?’ 6पण तणी तमो जाणी जो के, मय मनक ने सुराय बी तरती माते पाप माप करवा ने अदिकार हे।” ईसुई लकवा हू बिमार मनक हू केजू, “आपड़े खाटलो उटाड़ नी घेर जातो रे।”

7लकवा हू बिमार मनक ऊबो थाजो नी आपड़े घेर जातो रेजो। 8जेरे मनके यू जुजू ते बयी गिय नी परमेसवर ने मईमा करवा लागअ के, जणाय मनकय एवो अदिकार आलजो हे।

मती ईसु वाहे हिड़वा लागो

(मरकुस 2:13–17; लूका 5:27–32)

9ईसु विय हू मोरी गियो ते मती नाम ने एक मनक कर नाका ने सोकी माते बेटो डिटो। ईसुई वणाहू केजू, “मारे वाहे आव।”

नी वी ऊबो थाजो नी वणा वाहे थाई गियो।

10 # लूका 15:1,2 इम थाजू के, जेरे ईसु मती ने घेर मा खावा खावा बेटो ते, कईक पापी नी कर लिवा वाला आवीनी ईसु नी विने सेला हाते खावा खावा बेठा। 11यू जुईनी फरीसी ईसु ने सेला हू केवा लागा, “तमारे गरू कर लिवा वाला नी पापीयो ने हाते हय खावा खाए हे?”

12ईसुई यू हबलीनी वणहू केजू, “हाजा हाराये डाकटर ने जरूरत नीं वे, पण बिमारे जरूरत वे। 13#मती 12:7तणी तमो जो नी अणी सोपड़ी ने वसन ने मतलब हमजी लिओ के, ‘मुँ बलिदान नीं पण दया साहूँ हूँ,’ केमके मुँ दरमजी नीं पण पापीयो ने हादवा आजो हूँ।”

एकाणा ने बारामा सवाल

(मरकुस 2:18–22; लूका 5:33–39)

14तेरे बपतिसमा आलवा वाला यूहना ने सेला ईसु कनी आवीनी केजू के, “हूं वजअ हे अमअ नी फरीसी अतरअ एकाणअ करअ ह, पण तारे सेला एकाणअ नीं करी?”

15पसे ईसुई वणहू केजू, “जेरे लगण वोर जान हाते हे, हूं वा एकाणू करी हके हे? पण वा दाड़ा आवहीं जणअ दाड़ा मा वोर वणअ हू अलगो किदो जाहीं वणी वळा वा एकाणअ करहीं।

16“नवा लबरा ने थिगलू जुना लबरा माते नीं लगाड़े, केमके नवू थिगलू जुना लबराय सिकुड़ीनी फाड़ी दड़े हे नी वु वदार फाटी जाए हे। 17नवा अंगुर ने रस जुनी मसक मा नीं परे हे, केमके नवा अंगुर ने रस फुलाईनी जुनी मसको ने फाड़ी दड़े हे, नी अंगुर ने रस टुलाई जाए हे नी मसक बी नास थाई जाए हे, पण नवा अंगुर ने रस नवी मसक मा परे हे नी वी बे वसेली रयी हे।”

एक मरीली सुरी नी बिमार बयीरी

(मरकुस 5:21–43; लूका 8:40–56)

18वी वणहू ई वाती केईस रेजो तो नी जुओ, एक परातना घेर ने हरदार वणा कनी आजो नी वणा हामे नमीनी विनती करीनी केजू, “मारे सोरी अबार मरी गई हे, अगर तु आवीनी आपड़े आत वणी माते मेल, ते वे पासी जीवती थाई जाहीं।”

19ईसु उटीनी आपड़े सेला लईनी वणा हाते हिड़वा लागो।

20नी जुओ, एक बयीरी जणजी बारा साल हू खुन सालवान बिमारी ते, वे ईसु वाहे आवीनी लबरअ ने कनारजी अडी गई। 21केमके वे आपड़े पोता ने मन मा केती ती के, “अगर मुँ विने लबरअ ने कनारजीस अडी जाई ते होज थाई जाई।”

22ईसुई वाहे मुड़ीनी जुईनी वणी हू केजू, “सुरी, हिमत राक तु तारे विसवास हू होज थाजी हे।” नी वे बयीरी तरत वणीस वला होज थाई गई।

23जेरे ईसु मण्डली ने हरदार ने घेर आजो ते, विय वाहली वजाड़वा वाला नी मुटी पीढ़ मुटा दुक मा रूई रेजअ त। 24तेरे ईसुई मनका हू केजू, “निय हू बान्णे जो, सुरी मरजी नीं हे, वे हुई रेजी हे।” अणा माते हेता मनका विने हसी मजाक उड़ावणा लागअ। 25पसे वणाय पीढ़ बान्णे मुकली दिदी नी वी सुरी ने कमरा माय जाईनी वणीनी आत हाजो नी वे ऊबी थाई गई। 26अणी वात ने खबर वणा हेता देस मा फेलाई गई।

ईसुई बे आन्दा होज किदा

27ईसु जेरे विय हू जावा लागो ते बे आदा मनक वणा वाहे थाई गिया। नी वा डाडी करीनी केता ता, “हे दाऊद ने सन्तान अमय माते दया कर।”

28जेरे ईसु घेर मा गियो ते, वा आदा वणा कनी आजा नी ईसुई वणहू केजू, “हूं तमय विसवास हे के, मुँ यू करी हकू हूँ?”

वणय जबाव आलजो, “हा परबू।”

29अणा माते ईसुई वणने आकी माते आत अडावतो थकण केजू, “तमारे हारू एवूस थाए, जेवो तमारे विसवास हे।” 30नी आन्दा देकता थाई गिया। पसे ईसुई सेताड़ीनी वणहू केजू, “अणा बारामा कणाय पतो नीं लागवो जुजे।”

31पण वा विय हू निकलीनी हेता देस मा अणी वात ने खबर फेलावणा लागा।

ईसुई एक बुबड़ो होज किदो

32जेरे वा विय हू जाई रेजा ता ते थुड़क मनका ईसु कनी एक बुबड़ाय लईनी आजअ। नी बुबड़ा मा बुरी आतमा ती तणी वी बुली नीं हकतो तो। 33जेरे बुरी आतमा काडी दिदी ते पसे बुबड़ो बुलवा लागो नी मनका ने पीढ़ सकित थाईनी केवा लागी के, “इज़रायेल मा अमय एवू पेले किरे नीं डिटु तु।”

34 # मती 10:25; 12:24; मर 3:22; लूका 11:15 पण फरीसी केई रेजा ता, “वी बुरी आतमा ने हरदार ने मदत हू बुरी आतमा काड़े हे।”

मजूर थुड़क हे

35 # मती 4:23; मर 1:39; लूका 4:44 ईसु यहुदियो ने परातना घेर मा उपदेस आलतो, परमेसवर ने राज ने असल खबर ने परसार करतो, मनका ने बिमारी नी हर तरह ने कमजोरी सिटी करतो थकण वणअ हेता जगा मा गाम-गाम नी नगर नगर फरी रेजो तो। 36#मर 6:34जेरे ईसु कणीक पीढे़ जुतो ते वणी हारू कईक तरस हू पराई जातो तो, केमके व वणअ गायरअ हरकअ त जणने कणु गुआलजू नीं वे, व दुकी ने पटकेला थकण त। 37#लूका 10:2तेरे ईसुई आपड़े सेला हू केजू, “पाका खेतर ते कईक हे पण मजूर कम हे। 38तणी खेतर ने मालिक हू परातना करो के, वी आपड़े हाक वाड़वा ने हारू मजूर मुकली दिए।”

Currently Selected:

मती 9: WBR

Highlight

Compare

Copy