मती 27

ईसु ने पिलातुस ने हामे आजर करवो

(मरकुस 15:1; लूका 23:1,2; यूहना 18:28–32)

1जेरे दाड़ो ऊगो ते हेता मुटायाजको नी गढ़ा यहुदि मोरकिया, ईसु ने मारी दड़वा ने विसार किदो। 2पसे व वणाय बादिनी लई गिय नी राजपाल पिलातुसे हुपी दिदो।

यहुदाय पोता ने मारवो

(परेरित 1:18,19)

3 # परेरि 1:18,19 ईसुई दोके हू हवाड़वा वालो यहुदा इसकिरोतीय जेरे जुजू के, ईसु दोसी ठेहरावजो गियो हे, ते वी कईक पसताणो नी वी मुटायाजक नी डोकरा यहुदि मोरकियाओ ने रूपा ने वा तीस सिक्का पासा आली दिदा। 4वणाय केजू, “मय एक वगर पाप ने मनके मारी दड़वा ने हारू हवडावीनी पाप किदो हे।”

अणी वात माते मनकय केजू, “अमअ हूं करअ, यो ते तारे पोता ने मामलो हे।”

5अणी वात माते यहुदा रूपा ने वा सिक्का मनदिर माय दड़ीनी जातो रेजो नी पसे बान्णे जाईनी आपड़े पोता ने फासी लगाड़ी दिदी।

6मुटायाजके वा सिक्का उटावी लिदा नी केजू, “आपड़े नियम ने वजूने अणा धने मनदिर ने पण्ड़ार मा मेलवू हाऊ नीं हे, केमके ये खुन ने किमत हे।”

7तणी वणय वणअ सिक्कअ हू कुबार ने खेतर मोलवी लीवान विसार किदो, ताकि परदेस हू यरूसलेम मा आवणा वालअ मनका ने मरवा बाद वणमा गाड़ी दिदा जय। 8तणी वु खेतर आज लगण खुन ने खेतर ने नाम हू जाणजू जाए हे।

9तणी जी वसन यिरमीया परमेसवर ने हाड़े हू बुलवा वालाय केजू तु वु पुरू थाए, “वणय वा तीस सिक्का लिदा, जी इज़रायेल ने मनकय विने किमत मा आलवा ने हारू तय किदा ता। 10जेम परबू ने हाड़े हू मय हुकम आलजो तो, इमुस वणय वणअ सिक्कअ हू कुबार ने खेतर मोलवी लिदू।”

पिलातुस ने ईसु हू सवाल

(मरकुस 15:2–5; लूका 23:3–5; यूहना 18:33–38)

11जणी वला ईसु हाकिम ने हामे ऊबो तो, ते हाकिमे वणाहू पुसयू के, “हूं तु यहुदियो ने राजो हे?”

ईसुई वणाहू केजू, “तु पोते केई रेजो हे।”

12जेरे मुटायाजक नी गढ़ा यहुदि मोरकिया वणा माते दोस लगाड़ी रेजा ता, ते बी वणाय कई उतर नीं आलजू।

13तेरे पिलातुसे वणाहू पुसयू, “हूं तु हबली रेजो हे के, वा तय माते कतरा दोस लगाड़ी रेजा हे?”

14पण ईसुई पिलातुस ने कणी बी वात ने जबाव नीं आलजो। अणी वात माते पिलातुस कईक सकित थाजो।

ईसु ने मोत ने दण

(मरकुस 15:6–15; लूका 23:13–25; यूहना 18:39; 19:16)

15फसह ने तेवार माते राजपाल ने रीति ती के, वी कणा बी एक केदजी, जणाय मनका साहतअ तअ वणाय वणअ हारू सुड़ी दितो तो। 16अणास समय मा विय बरअबा नाम ने मानीयो थकण एक मनक जेळ मा तो।

17तणी जेरे पीढ़ आवी पुगे ते पिलातुसे वणहू पुसयू, “तमो हूं साहो हो, मुँ तमारे हारू कणाय सुडू? बरअबाय या वणा ईसुई, जी मसी केवाए हे?” 18पिलातुस जाणतो तो के, केमके वा वणा माते री बळवा ने वजहू हवाड़जो हे।

19पिलातुस जेरे न्याव ने आसन माते बेटो तो ते विने बयीरजी वणा कनी एक हमिसार मुकलजो तो, “वणा दरमी मनक हाते कई नकी करवान। केमके मय विने बारामा एक हपनु जुजू हे, जणाहू मुँ आज पुरो दाड़ो गबराणी थकण रेजी।”

20पण मुटायाजके नी गढ़ा यहुदि मोरकियाओ ने पीढ़ ने बहकावणा हू पिलातुसे बरअबाय सुड़वा ने नी ईसुई मरावी दड़वा ने माग किदी।

21हाकिमे वणहू पुसयू के, “अणअ बे माहू तमारे हारू कणाय सुड़ी दियू?”

वणय उतर आलजू, “बरअबाय।”

22पिलातुसे वणहू पुसयू, “पसे ईसु जी मसी केवाए हे, इनु हूं करू?” हेतय वणाहू केजू, “वी करूस माते सडावजो जाए।”

23पिलातुसे वणहू पुसयू, “हय, वणाय हूं अपराद किदो हे?”

पण व ते फेर वदार डाडी करवा लागअ, “वणाय करूस माते सडावजो जाए।”

24पिलातुसे जुजू के कई फायदो नीं, पण अणा विरोद मा मनका ने हा हू वदार बढ़तू जाए हे। तणी वणाय थुडुक पाणी लिदू नी पीढ़ ने हामे आपड़े आत तुजा नी केजू, “मुँ अणा मनक ने खुन हू वगर दोस ने हूँ, तमोस जाणो।”

25उतर मा हेतय मनकय केजू, “इने खुन अमय माते नी अमारे सन्तान माते थाए।”

26तेरे पिलातुसे वणने हारू बरअबाय सुड़ी दिदो नी ईसुई कोड़ा ववाडीनी करूस माते सडावणा ने हारू हुपी दिदो।

ईसुई मजाक मा उडावणो

(मरकुस 15:16–20; यूहना 19:2,3)

27पसे पिलातुस ने सपाई ईसुई राजपाल ने किला मा लई गिया। विय वणा समकोरी सपाजअ ने पुरी टुली वगळी थाई गई। 28वणय वणा ने लबरअ उतारी दिदा नी समकिलअ लाल रंग ने लबरअ पेरावीनी, 29काटा वाली झिकरा हू बणजू एक ताज विने मुड़का माते मेली दिदू नी जमणा आत मा लाकड़ी हवाडी दिदी। वणा हामे आपड़े गुड़ा माते नमीनी विने हसी मजाक करता थकण केजू, “हे यहुदिया ने राजा अमर रे।” 30पसे वणय वणा माते थुकजू नी वेस लाकड़ी लईनी विने मुड़का माते वावा लागा। 31जेरे वा विने हसी मजाक उड़ावी सुका ते व लबरअ उतारी लिदअ नी वणय विने लबरअ पेरावीनी करूस माते सडावणा ने हारू लई गिय।

ईसु ने करूस माते सडावणो

(मरकुस 15:21–32; लूका 23:26–43; यूहना 19:17–27)

32जेरे वा बान्णे जाईस रेजा ता ते वणय कुरेन ने रेवा वालो समोन नाम ने एक मनक मलजो। वणय वी हाजो नी वणा माते दबाव दड़जो के, ईसु ने करूस उटावीनी हिड़े। 33पसे वा गुलगुता नाम ने जगा मा पुगा, इने मतलब हे “खोपडी ने जगा।” 34वणय कड़वु सीज मलावजू थकण अंगुर ने रस पीवा आलजू। पण जेरे ईसुई वु साकजू ते पीवा हू ना केजू।

35तेरे वणय ईसुई करूस माते सडावी दिदो नी विने लबरअ ने हारू कागद ने गोटी दड़ीनी एक-बिजाय वाटी लिदअ। 36अणा वाहे वा विय बेहिनी विने पेहरेदारी करवा लागा। 37वणय विने दोस ने कागद लकीनी विने मुड़ माते लगाड़जू के, “यो यहुदियो ने राजो ईसु हे।”

38नी वणीस वला वणा हाते बे डाकु बी करूस माते सडावी रेजा ता, एक ते विने जमणी हाड़े नी एक डावी हाड़े।

39वणा कनी थाईनी जावा वालअ मनका आपड़े मुड़कु अलावी अलावीनी विने बुराई करी रेजअ त। 40#मती 26:61; यूह 2:19व केई रेजअ त के, “हे मनदिरे पाड़ीनी तीन दाड़ा मा वणाय पासू बणावणा वाला आपड़े पोता ने वसावी ले। अगर तु परमेसवर ने सुरो हे, ते करूस माते हू नीसे उतरी आव।”

41इमुस मुटायाजक, मुसा ने नियम हिकाड़वा वाला नी गढ़ा यहुदि मोरकिया बी विने हसी मजाक उड़ावीनी केता ता के, 42“अणाय बिजय वसावजअ नी आपड़े पोता ने नीं वसावी हकजो। यो ते इज़रायेल ने राजो हे, अबार यो करूस माते हू उतरी आवे, ते अमअ अणा माते विसवास करअ। 43यो परमेसवर माते विसवास करे हे। तणी अगर परमेसवर साहे ते एवअ अणाय वसावी लिए। केमके यो केतो तो, ‘मुँ परमेसवर ने सुरो हूँ।’ ” 44अणीस तरह हू जी डाकु वणा हाते करूस माते सडावजा ता, वा बी विने अपमान करवा लागा।

ईसु ने मोत

(मरकुस 15:33–41; लूका 23:44–49; यूहना 19:28–30)

45बपोरअ बारा वजे हू तीन वजे लगण हेता देस मा अदारू रेजू। 46लमसम तीन वजे ने आहे पाहे ईसुई ऊसी आवाज़ हू केजू, “एली, एली, लमा सबकतनी?” इने मतलब हे, “हे मारे परमेसवर, हे मारे परमेसवर, तय मुँ हय सुड़ी दिदो?”

47विय ऊबअ मनका मा हू थुड़क यू हबलीनी केवा लागअ के, “यो एलियाए हादी रेजो हे।” 48पसे तरत वणअ मा हू एक मनक दुड़ीनी खाटू अंगुर ने रस मा डुबाडजू थकण रूईनी गोटी एक लाकड़ी माते टेरीन लाजो नी ईसुई सटाड़जू।

49पण बिजय मनकय केजू, “ऊबा रो, जुअ के एलिया अणाय वसाड़वा आवे हे या नीं?”

50ईसुई एक फेरो फेर ऊसी आवाज़ हू डाडी करीनी जीव सुड़ी दिदो।

51वणीस वला मनदिर ने पड़दो माते हू नीसे लगण फाटीनी बे टुकड़ा थाई गियो। नी तरती अलवा लागी नी पाटा ने सिताल फाटी गई। 52निय लगण के, कईक कबर खुली गई नी मरेला थकण परमेसवर ने पवितर मनका मा हू कईक जीवी उटजा। 53व कबर मा हू निकलीनी ईसु ने पासू जीवी उटवा बाद परमेसवर ने पवितर नगर यरूसलेम मा जाईनी कईक जणे दिकाणा।

54रोमि सेना ने नायक नी जी वणा हाते ईसु ने पेहरेदारी करी रेजा ता, पुकम्प नी जी कई विय थाजू तु, जुईनी कईक बयी गिया नी केजू, “हासु, यो परमेसवर ने सुरो हे।”

55 # लूका 8:2,3 विय कतरी बयीरी ऊबी ती, जी सीटी हू जुई रेजी ती। वी ईसु ने सेवा साकरी करती थकण वणा वाहे गलील हू आजी ती। 56वणमा मरियम मगदलीनी, नानो याकूब, नी योसेस ने आई मरियम नी जबदी ने सुरअ ने आई ती।

ईसुई गाड़वो

(मरकुस 15:42–47; लूका 23:50–56; यूहना 19:38–42)

57अतमजा ने वला अरमतिया नगर हू यूसुफ नाम ने एक धनवान आजो। वी पोते ईसु ने सेलो तो। 58यूसुफ पिलातुस कनी गियो नी वणा हू ईसु ने मड़दू मागजू। तेरे पिलातुसे हुकम आलजो के, मड़दू वणाय आलजू जाए। 59यूसुफे मड़दू लई लिदू नी वणाय एकदम साफ तोळा सादरा मा लपेटीनी, 60नी वणाय आपड़े पोता ने नवी कबर मा मेलजो जी वणाय सिताल कापीनी बणावजी ती। पसे वणाय कबर ने दरवाजा माते एक मुटो पाटो लड़वी दिदो नी जातो रेजो। 61मरियम मगदलीनी नी बिजी मरियम विय कबर ने हामे बेठी ती।

ईसु ने कबर ने रकवाली

62मोरलो दाड़ो जी आराम ने दाड़ो तो, ते मुटायाजक नी फरीसी पिलातुस हू मलजा। 63#मती 16:21; 17:23; 20:19; मर 8:31; 9:31; 10:33,34; लूका 9:22; 18:31–33वणय केजू, “हे महाराज अमय हुते हे के, जेरे वणा पटकावणा वालाय जीवतो तो तेरे वणाय केजू तु, ‘मुँ तीन दाड़ा बाद जीवी उटी।’ 64तणी हुकम आल के तीसरे दाड़े लगण कबर माते रकवाली किदी जाए। कियेक इम नीं थाए के, विने सेला आवीनी विने मड़दू लईनी नाहीं जय नी मनका हू कय, ‘वी मरेलअ मा हू जीवी उटजो।’ नी यो दोको पेले हू बी वदार बुरो थाहीं।”

65पिलातुसे वणहू केजू, “तमो रकवाली करवा ने हारू सपाई लई जाई हको हो। जो, जेम रकवाली करी हको, तेम करो।” 66तेरे वा रकवालीय ने हाते विय हू जाता रेजा नी वणा पाटा माते मोहर लगाड़ीनी कबर ने रकवाली करवा लागा।

Currently Selected:

मती 27: WBR

Highlight

Compare

Copy