मती 26

ईसुई मारवा ने जाळ

(मरकुस 14:1,2; लूका 22:1,2; यूहना 11:45–53)

1जेरे ईसु ई हेती वाती केई सुको ते वणाय आपड़े सेलो हू केजू, 2“तमो जाणो हो, बे दाड़ा वाहे फसह ने तेवार हे। नी मुँ मनक ने सुरो वेरीय ने आत हू करूस माते सडावणा ने हारू हवाडी दिदो जाई।”

3तेरे मुटायाजक नी गढ़ा यहुदि मोरकिया केफा नाम ने महायाजक ने घेर ने आगणा मा वगळा थाजा। 4वणय एक बिजा हू योजना बणावजी के, ईसुई कणी तरह हाईलिये नी मारी दड़े। 5पसे वा केई रेजा ता, “आपड़े यू तेवार ने दाड़ा मा नीं करवू जुजे नीते थाई हके हे के, मनका मा लड़ाई-जगड़ा थावा लागे।”

ईसु माते अनतर कुड़वू

(मरकुस 14:3–9; यूहना 12:1–8)

6ईसु जेरे बेतनिया नगर मा समोन ने घेर तो, जिनो कोढ़ होज थाई गियो तो। 7#लूका 7:37,38तणीस वला एक बयीरी तोळा सगमरमर ने ठाबडा मा किमती अनतर लईनी वणा कनी आजी। नी जेरे वी खावा खावा बेटो तो, ते विने मुड़का माते कुड़ी दिदू। 8जेरे विने सेलाय यू जुजू ते वा रीहे बलीनी केवा लागा, “अणा अनतरे इमुस हय वगाड़ी दिदू? 9यू अनतर असल किमत मा वेसीनी धन गरीब मा वाटजू जाई हकतु तु।”

10ईसुई वणने मन ने वाती जाणीनी वणहू केजू, “तमो अणी बयीरजी हय परेसान करो हो? अणजी मारे हारू एक पलू काम किदू हे। 11केमके गरीब ते हर वला तमारे हाते रेहीं, पण मुँ तमारे हाते हर वला नीं रेई। 12वणजी मारे सरीर माते यू हाऊ पमलवा वालू अनतर कुड़ीनी मारे गाड़वा ने तयारी किदी हे। 13मुँ तमय हू हासु कऊँ हूँ हेती दनिया मा जिय कय बी असल खबर ने परसार किदो जाहीं, विय इने काम पाळजू जाहीं नी अणजी हुते किदी जाहीं।”

यहुदा ईसुई दोको दिवा मा तयार

(मरकुस 14:10,11; लूका 22:3–6)

14तेरे यहुदा इसकिरोती जी बारा सेलअ मा जी एक तो मुटायाजको कनी गियो नी केजू, 15“अगर मुँ ईसुई तमारे आत हवाडी दियू, ते मय हूं आलहो?” वणय वणाय तीस रूपा ने सिक्का तुलीनी आली दिदा। 16नी वी तणीस वला हू ईसुई हवाड़वा ने सई मोको हुजवा लागो।

ईसुई आपड़े सेलअ ने हाते आकरी खावा

(मरकुस 14:12–21; लूका 22:7–13,21–23; यूहना 13:21–30)

17वगर खमीर ने रूटा ने तेवार ने पेलके दाड़े ईसु ने सेला कनी आवीनी पुसयू, “तु किय साहे हे के, अमअ तारे खावा ने हारू फसह ने तेवार ने खावा ने तयारी किय जाईनी करअ?”

18ईसुई केजू, “नगर मा वणा मनका कनी जो नी वणा हू को के, गरूई केजू हे, ‘मारो समय कनी हे, मुँ मारे सेलो हाते तारे निय फसह ने तेवार मनावू।’ ” 19नी सेला ईसु ने हुकम मानीयो नी फसह ने तेवार ने खावा तयार किदू।

20जेरे अतमजू पड़जू ते ईसु आपड़े बारा सेलो ने हाते खावा खावा ने हारू बेटो। 21जेरे वा खाई रेजा ता, ते ईसुई केजू, “मुँ तमय हू हासु कऊँ हूँ के तमय मा हू एक मय दोके हू हवाड़हीं।”

22अणी वात माते वा कईक दुकी थाजा, नी हेता एक एक वणा हू पुसवा लागा, “हे परबू, हूं वी मुँ हूँ?”

23पसे ईसुई उतर आलजू, “विस जी मारे हाते थाळी मा खाए हे वी मय दोके हू हवडावी दिहीं। 24मुँ मनक ने सुरो ते जेवू मारे बारामा सासतर मा लकजू हे, पण वणा मनक ने हारू हाय हे, जणाहू मुँ मनक ने सुरो हवाड़जो जऊँ हूँ। वणा मनक ने हारू कतरू हाऊ थातु के, विने जनमुस नीं थातु।”

25तेरे वणाय दोके हू हवड़ावणा वालाय यहुदा इसकिरोतीय केजू, “हे गरू, हूं वी मुँ हूँ?”

ईसुई वणा हू केजू, “हा, एवूस हे जेवू तय केजू हे।”

परबू-भोज

(मरकुस 14:22–26; लूका 22:14–20; 1 कुरिन्थियो 11:23–25)

26जेरे वा खावा खाई रेजा ता, ते ईसुई रूटा लिदा नी दन्यवाद आलीनी तुड़जा, नी सेलो हू केजू, “लिओ, खो, यू मारू सरीर हे।”

27पसे वणाय कटोरो लिदो नी दन्यवाद आलवा बाद वणय आलतो थकण केजू, “तमो हेता अणाय थुडू थुडू पियो। 28केमके यू मारे खुन हे जी एक नवी सपत हे, जी कईक मनका ने पाप ने माप करवा ने हारू बहावजू जाए हे। 29मुँ तमय हू कऊँ हूँ के, मुँ वणे दाड़े लगण अंगुर ने रस नीं साकुगां जेरे लगण आपड़े परम बाप ने राज मा तमारे हाते नवू नीं पिऊँ।”

30पसे वा भजन करीनी जेतुन मगरा माते जाता रेजा।

ईसुई केजू तमो हेता मय सुड़ी दिहो

(मरकुस 14:27–31; लूका 22:31–34; यूहना 13:36–38)

31पसे ईसुई वणहू केजू, “आज राते तमो हेता मारे बारामा पीटी खाहो, केमके सासतर मा लकजू हे के, परमेसवर केजू,

“ ‘मुँ गोआलु करवा वालाय मारी

नी गायरअ ने टुलो वकराई जाहीं।’

32 # मती 28:16 पण मुँ पासो जीवतो थाई, तेरे तमय हू पेले गलील मा जाई।”

33अणी वात माते पतरसे वणा हू केजू, “अगर हेता तारे बारामा पीटी खय ते खय, पण मुँ किरे पीटी नीं खाई।”

34ईसुई वणा हू केजू, “मुँ तयहू हासु कऊँ हूँ आज अणीस राते कुकडू बुलवा हू पेले तु तीन फेरा मय ओळकवा हू नटी जाई।”

35तेरे पतरसे ईसु हू केजू, “अगर मय तय हाते मरवू बी पड़े तेबी मुँ ना नीं केई।” नी इमुस हेतय सेलाय बी केजू।

ईसु ने गतसमनी ने बाग मा परातना

(मरकुस 14:32–42; लूका 22:39–46)

36पसे ईसु आपड़े सेलो हाते वणी जगा आजो जी गतसमनी केवाए हे। नी वणाय आपड़े सेलो हू केजू, “जेरे लगण मुँ विय जऊँ नी परातना करू, तमो नियस बेहवान।” 37पसे ईसु पतरस नी जबदी ने बे सुरा आपड़े हाते लई गियो नी कईक दुकी जीवन हू कायल थावा लागो। 38पसे वणाय वणहू केजू, “मारू मन कईक दुकी हे, जणाहू मारे जीव निकलवा करे हे, तमो नियस ऊबा रो नी मय हाते जागता रो।”

39पसे वी थुड़ोक मोरी गियो नी जमी माते नमीनी परातना करवा लागो नी वणाय केजू, “हे मारे परम बाप अगर थाई हके ते मारे ई दुक ने कटोरो मय हू टली जाए। फेर बी मुँ साहूँ एवू नीं, पण जेवू तु साहे एवूस कर।”

40पसे वी आपड़े सेलो कनी गियो नी वा हुता थकण मलजा। ईसुई पतरस हू केजू, “हूं तमो मय हाते एक घड़ी बी नीं जागी हको? 41जागता रो नी परातना करो, ताकि तमो परक मा नीं पड़ो। तमारे आतमा ते वुस करवा साहे हे जी हाऊ हे, पण तमारे सरीर दुबलु हे।”

42एक फेरो फेर वणाय जाईनी परातना किदी नी केजू, “हे मारे परम बाप अगर दुक ने यो कटोरो मारे पिदा वगर नीं टले ते तारे मरजी पुरी थाए।”

43तेरे पसे वी आजो नी वणय फेर हुता डिटा, केमके वणने आकी ऊग हू पराणी ती।

44नी ईसु वणय सुड़ीनी फेर गियो नी तीसरे फेरे बी पेले वजूनीस परातना करवा लागो। 45पसे ईसु आपड़े सेलो कनी गियो नी वणहू पुसयू, “हूं तमो अबार बी आराम हू हुई रेजा हो? हबलो, समय आवी सुको हे नी मुँ मनक ने सुरो पापीयो ने आत मा हवडावी दिदो जाहीं। 46उटी जो, आवो हिड़ो। जुओ, मय दोके हू हवड़ावणा वालो आवी रेजो हे।”

ईसु दोके हू हवाड़जो गियो

(मरकुस 14:43–50; लूका 22:47–53; यूहना 18:3–12)

47ईसु जेरे बुलीस रेजो तो, नी यहुदा जी बारा सेलो मा हू एक तो आजो। वणा हाते मुटायाजक नी यहुदि मोरकिया ने हाड़े हू मुकलजी थकण एक मुटी पीढ़ तरवारी नी लाकड़ी लईनी आजा थकण ता। 48यहुदा जी वणाय हवड़ावणा वालो तो, वणाय एक हेलण आलतअ थकण केजू तु, “जणा कणाय मुँ बुकी दियू विस ईसु वे हे, वणाय हाई लिजो।”

49पसे वी ईसु कनी गियो नी केजू, “हे गरू, नमसकार।” नी वणाय बुकी दिवा लागो।

50ईसुई वणा हू केजू, “हे दोस्त, जणा काम हारू तु निय आजो हे, वणाय कर।”

पसे पीढ़ ने मनकय कनी आवीनी ईसु बन्दी बणावी लिदो। 51पसे जी सेला ईसु हाते ता, वणअ माहू एक जणाय तरवार खिसी लिदी नी महायाजक ने दास माते सलावीनी विने कान कापी दिदो।

52तेरे ईसुई वणा हू केजू, “आपड़े तरवार मयान मा राक। जी तरवार सलाड़े वा तरवार हूस मारजा जाहीं। 53हूं तमो नीं हुसता के, मुँ आपड़े परम बाप हू विनती करी हकू हूँ नी वी तरत हरगदुतो ने बारा पलटन हू बी वदार मारे कनी अबार मुकली दिहीं? 54पण अगर मुँ एवू करी ते सासतर ने लकजी ई वाती केम पुरू थाहीं? तणी एवू थावू जरूरी हे।”

55 # लूका 19:47; 21:37 वणीस वलाय ईसुई पीढ़ हू केजू, “तमो तरवारी नी लाकड़ी लईनी मय हावा हारू हय आजा हो जेम कणाक सुरे हावा ने हारू आजा हो? मुँ हर दाड़े मनदिर मा बेहिनी उपदेस आलतो तो तेरे तमय मुँ नीं हाजो। 56पण यू हेतु तणी थाजू हे के, परमेसवर ने हाड़े हू बुलवा वाला ने पवितर सासतर ने वसन पुरू थाए हे।”

तेरे हेता सेला वणाय सुड़ीनी नाहीं गिया।

यहुदि नेताओ ने हामे ईसुई आजर करवो

(मरकुस 14:53–65; लूका 22:54,55,63–71; यूहना 18:13,14,19–24)

57जणे ईसु हाजो तो वा वणाय केफा नाम ने महायाजक ने हामे लई गिया। विय मुसा ने नियम हिकाड़वा वाला नी डोकरा यहुदि मोरकिया बी वगळा थाजा। 58पतरस वणहू सिटी सिटी महायाजक ने आगणा मा लगण गियो नी फेर फेसलो हबलवा ने हारू पेहरेदारो ने हाते बेहीं गियो। 59मुटायाजक नी पंसात ने हेती परजा ईसुई मारी दड़वा ने हारू विने विरोद मा जुटी गवाई हुजी रेजा ता। 60पण कईक जुटा गवा आवणा हू बी नीं हुजी हकजा। पसे बाद मा बे जणा मोरी आजा, 61#यूह 2:19नी केजू, “अणाय केजू तु के, ‘मुँ परमेसवर ने मनदिरे पाड़ी हकू हूँ नी वणाय तीन दाड़ा मा पासू बणावी हकू हूँ।’ ”

62पसे महायाजके ऊबो थाईनी ईसु हू केजू, “हूं उतर मा तारे कई नीं केवू य मनक तारे विरोद मा ये हूं गवाई आली रेजा हे?” 63पण ईसु सानो रेजो।

पसे महायाजके वणा हू पुसयू, “मुँ तयहू जीवता परमेसवर ने होगन खाईनी कऊँ हूँ के अगर तु परमेसवर ने सुरो मसी हे, ते अमअ हू केई दे।”

64ईसुई उतर आलजू, “हा, तय पोते केजू हे। पण मुँ तमय पाळु हू के, तमो मय मनक ने सुराय मारे परम बाप तागतवर ने जमणी हाड़े बेटो नी आकास ने वादळा माते आवतो जुहो।”

65जेरे महायाजके यू हबलजू ते वणाय पोता ने लबरअ फाडीनी केजू, “अणाय परमेसवर ने बुराई किदी हे, एवअ आपड़े गवा ने हूं जरूरत हे? जुओ, तमय हेते अबार परमेसवर ने बुराई हबलजी हे। 66तमो अणी वात ने बारामा हूं हुसो हो?”

उतर मा वणय केजू, “ई अपरादी हे, अणाय मारी दड़वो जुजे।”

67पसे वणय विने मुडा माते थुकजू नी टिकी वाजी। नी थुड़यक थापेट वाजी नी केजू, 68“हे मसी, आगमवाणी कर के तय कणाय वाजू?”

पतरस ने नटी जावू

(मरकुस 14:66–72; लूका 22:56–62; यूहना 18:15–18,25–27)

69पतरस अबार आगणा मास बान्णे बेटो तो नी एक दासी आजी नी केजू, “तु बी ते वणा गलीली ईसु हाते तो।”

70पण पतरस हेता हामे यू केईनी नटवा लागो नी केजू, “मुँ नीं जाणतो तु हूं केई रेजी हे।”

71पसे वी बान्णे डेली लगण गियोस तो नी एक बिजी दासी डिटो नी मनका विय त वणहू केजू, “ई आदमी बी ते नासरत ने ईसु हाते तो।”

72एक फेरो फेर पतरस ने नटी जावू नी होगन खातो थकण केजू, “मुँ अणाय मनके नीं जाणतो।”

73थुड़ीक वला वाहे विय ऊबअ मनका पतरस ने कनी गिय नी वणाहू केजू, “हासु तु बी ते वणअ माहू एक हे, केमके तारे बुली तारे बेद खुली रेजी हे।”

74तणी वला पतरस मुटकु खटुकवा लागो नी होगन खावा लागो के, “मुँ वणा मनके नीं जाणतो” नी तणीस वला कुकडू बुलजू। 75तणी वलाय पतरसे वे वात हुते आजी जी ईसुई वणा हू केजी ती, “कुकडू बुलवा हू पेले तु तीन फेरा मय ओळकवा हू नटी जाई।” तेरे पतरस बान्णे जातो रेजो नी साती कुटी कुटीनी रूवा लागो।

Currently Selected:

मती 26: WBR

Highlight

Compare

Copy