मती 23

मुसा ने नियम हिकाड़वा वालो नी फरीसीय हू सकोर रो

(मरकुस 12:38,39; लूका 11:43,46; 20:45,46)

1तेरे ईसुई आपड़े सेलो नी पीढ़ हू केजू, 2“मुसा ने नियम हिकाड़वा वाला नी फरीसी मुसा ने नियम ने हकदार हे। 3तणी जी कई वणय केजू हे, वणा माते हिड़वान नी विने पाळण करवान। पण जी वा करी हे वु नकी करवान। मुँ यू तणी कऊँ हूँ, केमके वा बस केई हे पण करता नीं हे। 4वा मनका ने खदा माते अतरो पार दड़ी दिये हे के, व वणाय उटावीनी हिड़ीस नीं हके हे। नी मनक माते दबाव दड़ी हे के, व लईनी हिड़ी। पण वा पोते आपड़े आगली हू वणाय हरकावणू बी नीं साहता हे।

5 # मती 6:1 “वा मनकय पाळवा ने हारू हाऊ काम करी हे। वा आपड़े आत नी कपाल माते बादवा वालअ तावीज सोड़अ करी, जणमा पवितर वसन लकता ता। नी लबरअ ने कोर बढ़ावे हे, ताकि मनका वणय दरमी हमजी। 6जिमण मा वा बड़ीया-बड़ीया जगा नी परातना घेर मा बड़ीया जगा साही हे। 7बजारअ मा वा कदर ने हाते नमसकार करवा साहे हे। नी साहे हे के, मनका वणय ‘गरू’ केईनी हादी।

8“पण तमो मनका हू आपड़े पोता ने ‘गरू’ नकी केवाड़वान केमके तमारे हासो गरू ते एकुस हे। नी तमो हेता विसवासी पाई बेन हो। 9तरती माते कणाय बी ‘बाप’ नकी केवान। केमके तमारे ते एकुस बाप हे, जी हरग मा हे। 10नी कणाय बी आपड़े पोता ने मालिक नकी केवाड़वान, केमके तमारे एकुस मालिक हे नी वी मसी हे। 11#मती 20:26,27; मर 9:35; 10:43,44; लूका 22:26तमय हेता माहू खास मनक विस थाहीं, जी तमारे सेवक बणहीं। 12#लूका 14:11; 18:14जी आपड़े पोता ने मुटो बणावहीं, वी नानो किदो जाहीं। नी जी आपड़े पोता ने नानो बणावहीं वी मुटो बणावजो जाहीं।

मुसा ने नियम हिकाड़वा वालो नी फरीसियो माते हराप

(मरकुस 12:40; लूका 11:39–42,44,52; 20:47)

13“हे कपटजे, मुसा ने नियम हिकाड़वा वालो नी फरीसीयो तमय माते हाय हे। तमो मनका ने हारू हरग ने राज बन्द करो हो, नीते तमो पोते वणा मा जो हो, नी जी वणा मा जावा ने कोसिस करे हे वणय बी तमो जावा हू रूको हो।

14“हे कपटजे, मुसा ने नियम हिकाड़वा वालो नी फरीसीयो तमय माते हराप हे। नी तमो विदवा लुगाजअ ने घेर खाई जो हो नी दिकाड़वा ने हारू कईक वला लगण परातना करो हो तणी तमय कईक दुक विटवो पड़हीं।

15“हे कपटजे, मुसा ने नियम हिकाड़वा वालो नी फरीसीयो तमय माते हाय हे। तमो कणायेक आपड़े वस मा करवा ने हारू तरती नी आकास एक करी दड़ो हो। नी जेरे वी तमारे यहुदि दरम पंत मा आवणा वालाय ते तमो वणाय आपड़े हू बी बे गुणा नरक ने लायक बणावी दिओ हो।

16“हे आन्दे वाट पाळवा वाले तमय माते हाय हे, ‘जी को हो अगर कणुक मनदिर ने होगन खाए ते वणाय वी होगन राकवो जरूरी नीं हे, पण अगर कणुक मनदिर ने हुना ने होगन खाए ते वणाय वणी होगन ने पाळण करवो जरूरी हे।’ 17हे आन्दे वगर अकल वाले कुण मुटो हे, मनदिर ने होनु या वु मनदिर जणामा वु होनु पवितर बणावजू हे?

18“तमो यू बी को हो, ‘अगर कणुक वेदी ने होगन खाए ते कई नीं, पण अगर कणुक वेदी माते सडावा ने होगन खाए, ते वी आपड़े होगन हू बदाणो थकण हे।’ 19हे आन्दे, कुण मुटो हे, वेदी माते मेलजो सडावो या वे वेदी जणामा वी सडावो पवितर बणे हे? 20तणी अगर कणुक वेदी ने होगन खाए, ते वी वेदी ने हाते वेदी माते जी मेलजू हे, वणा हेता ने बी होगन खाए हे। 21वु जी मनदिर हे, विने बी होगन खाए हे ते, वी मनदिर ने हाते नी मनदिर माय रेवा वाला परमेसवर ने बी होगन खाए हे। 22#मती 5:34नी जी कणु हरग ने होगन खाए हे, वी परमेसवर ने आसन नी आसन माते बेवा वाला ने बी होगन खाए हे।

23“हे कपटजे, मुसा ने नियम हिकाड़वा वालो नी फरीसीयो तमय माते हाय हे। तमो पोदिना, वरजाली नी जीरा ने दसवो पाग आलो हो, पण तमय मुसा ने नियम ने खास वाती यानी न्याव, दया नी विसवास ने सुड़ी दिओ हो। अणा हू हाऊ ते यू थातु के, तमो खास वाती नीं सुड़ता नी दसवांस बी आलता रेता। 24हे आन्दे वाट पाळवा वाले, तमो आपड़े पाणी मा हू माकाए ते साणी दड़ो हो, पण ऊट ने खाई जो हो।

25“हे कपटजे, मुसा ने नियम हिकाड़वा वालो नी फरीसीयो तमय माते हाय हे। वाटकी नी थाळी ते तमो माते माते तुईनी माजो हो, पण वणने माय कपट नी लालस हू पराईला थकण हो। 26हे आन्दे फरीसीयो, पेले आपड़े वाटकी नी थाळी माय हू तुईनी माजो ताकि माय नी बान्णे हू बी सुद थाई जाए।

27 # परेरि 23:3 “हे कपटजे, मुसा ने नियम हिकाड़वा वालो नी फरीसीयो तमय माते हाय हे। तमो पलासतर किदी हमादी हरका हो जी बान्णे हू ते रूपाळी देकई हे, पण माय हू मरीली थकण आटकी नी हर तरह ने असुदता हू परजी थकण हे। 28इमुस तमो बान्णे हू ते मनका दरमी दिकाई दिओ हो, पण माय हू कपट नी अदरम हू पराईला थकण हो।

ईसुई वणने सजा ने आगमवाणी किदी

(लूका 11:47–51)

29“हे कपटजे, मुसा ने नियम हिकाड़वा वालो नी फरीसीयो तमय माते हाय हे, तमो परमेसवर ने हाड़े हू बुलवा वालो ने कबर बणावो हो नी दरमी मनका ने कबर हबावो हो। 30नी तमो को हो के, ‘अगर अमअ अमारे पुरका ने समय मा वेता, ते परमेसवर ने हाड़े हू बुलवा वालय मारवा मा हाती नीं थाता।’ 31इनु मतलब यू हे के, तमो मानी ने करो हो नी वणने सन्तान हो जी परमेसवर ने हाड़े हू बुलवा वालय ने अतयार ता। 32तणी तमारे पुरकाय सरू किदू, वणाय पुरू करो।

33 # मती 3:7; 12:34; लूका 3:7 “हे हाप नी हाप ने सुरे, तमो केम हुसो हो के, तमो नरक ने सजा हू वसी जाहो? 34तणी मुँ तमय पाळु हू के, मुँ तमारे कनी परमेसवर ने हाड़े हू बुलवा वालय, अकल वालअ नी सासतर हिकाड़वा वाला मुकली रेजो हूँ। तमो वणमा हू कईक जणे मारी दड़हो नी करूस माते सडावहो। थुड़यक तमो आपड़ी परातना घेर मा कोड़ा वावा नी एक नगर हू बिजा नगर मा वणने पीसो करता फरहो। 35जणाहू दरमी हाबिल हू लईनी बिरकिया ने सुरो जकरयाह लगण, जणय तमय मनदिर नी वेदी ने वेसमा मारी दड़जो तो। नी जतरअ दरमीयो ने खुन तरती माते बहावजू गियू वणअ हेता ने सजा तमय विटवो पड़हीं। 36मुँ तमय हू हासु कऊँ हूँ के, अणी हेती वातअ ने सजा अणा समय ने मनकय विटवो पड़हीं।

यरूसलेम ने हारू ईसु ने रोवू

(लूका 13:34,35)

37“हे यरूसलेम, हे यरूसलेम, तु जी परमेसवर ने हाड़े हू बुलवा वालअ ने मारी दड़े हे नी जी तय कनी मुकलजा गिया वणय पाटा वाए हे नी मय कतरा फेरा साहजू के, जेम एक कुकड़ी आपड़े टेटय पाकड़ा बुदे पेलअ करे हे, इमुस मुँ बी तारे सुरय पेलअ करी दियू, पण तमय नीं साहजू। 38जुओ, तमारे घेर तमारे हारू उजाड़जू जाहीं। 39हासु मुँ तमय पाळु हूँ के, तमो मय तेरे लगण फेर नीं जुहो जेरे लगण तमो यू नीं के हो, ‘दन्य हे वी जी परबू ने नाम हू आवी रेजो हे।’ ”

Currently Selected:

मती 23: WBR

Highlight

Compare

Copy