मती 21

यरूसलेम मा ईसु ने आवणू

(मरकुस 11:1–11; लूका 19:28–40; यूहना 12:12–19)

1जेरे ईसु नी विने सेला यरूसलेम आजा नी जेतुन मगरा कनी बेतफगे मा पुगा ते ईसुई आपड़े बे सेलय यू केईनी मुकलजा के, 2“आपड़े हामे वाला गाम मा जो, नी विय जातस मा तमय एक गदी बादजी थकण नी वणी हाते विने टेटू बी मलहीं। वणाय सुड़ीनी मय कनी लई आवो। 3अगर कणु तमय हू कई के, ते वणा हू केवान, परबूई अणाने जरूरत हे, तेरे पसे वी तरत मुकली दिहीं।”

4एवू तणी थाजू के, परमेसवर ने हाड़े हू बुलवा वाला ने यू वसन पुरू थाए के,

5“सियोन ने सुरी हू को,

‘जू तारे राजो तय कनी आवी रेजो हे।

वी पलो हे नी गदी माते बेटो हे,

हा, वी गदी ने टेटा माते बेटो हे।’ ”

6पसे सेला जाईनी जेवू ईसुई वणहू केजू तु, एवूस किदू। 7वा गदी नी विने टेटू लई आजा। नी वणा माते आपड़े लबरअ दड़जअ, केमके ईसु ने बेहवू तु। 8पीढ़ माहू कईक मनकय आपड़े लबरअ वाट मा वातरी दिदा नी बिजअ मनकअ रूकड़अ ने डाळी कापी लाजअ नी वाट मा वातरी दिदी। 9जी मनका ईसु मोरी मोरी नी वाहे वाहे हिड़ी रेजअ त व हेता जुर हू डाडी करीनी केई रेजअ त

“दाऊद ने सन्तान ने होसना,

दन्य हे वी जी परबू ने नाम हू आवे हे,

हरग मा होसना।”

10जेरे ईसुई यरूसलेम मा पोग मेलजो, ते हेता नगर मा हा हू थावा लागू। नी मनका पुसवा लागअ के, “यो कुण हे?”

11मनका जबाव आली रेजअ त के, “यो गलील परदेस ने नासरत नगर ने परमेसवर ने हाड़े हू बुलवा वालो ईसु हे।”

ईसु मनदिर माय

(मरकुस 11:15–19; लूका 19:45–48; यूहना 2:13–22)

12ईसुई परमेसवर ने मनदिर मा जाईनी वणे हेतय जी मनदिर मा रूपया बदलवा वाला ता वणय बान्णे काडी दिदा, नी वेपारिय ने पाटजा नी कबुतर वेसवा वालअ ने सोकी उलटी करी दिदी। 13वी वणहू के हे, “सासतर मा लकजू थकण हे के, ‘मारे घेर परातना घेर केवाहीं’ पण तमय वु डाकु ने घेर बणावी दिदू हे।”

14तेरे मनदिर मा थुड़ाक लुला, लगड़ा नी आन्दा ईसु कनी आजा नी ईसुई वा होज किदा। 15तेरे मुटायाजक नी मुसा ने नियम हिकाड़वा वालय सकित काम जुजअ जी वणाय किदअ त नी सुरअ मनदिर मा ऊसी आवाज़ हू दाऊद ने सन्तान ने होसना केतअ हबलजू ते वा कईक री करवा लागा। 16नी वणा हू केवा लागा, “हूं तु हबले हे के, या हूं केई रेजा हे?”

ईसुई वणहू केजू, “हा, हबलु हूँ। हूं तमय दरम सासतर मा नीं पणजू, ‘सुरअ नी दुत पितअ सुरअ ने मुड़े हू तय मईमा करावजी हे?’ ”

17तेरे पसे ईसु वणय वियस सुड़ीनी यरूसलेम नगर हू बान्णे बेतनिया मा गियो नी वियस रात काड़जी।

ईसुई अंजीर ने रूकड़ाय हराप आलजो

(मरकुस 11:12–14,20–24)

18मोरले दाड़े ईसु वेलो वेलो नगर मा पासो आवतो तो, ते वणाय पुक लागी। 19वाट ने कानी मा वणाय अंजीर ने एक रूकडू डिटु तणी वी वणा कनी गियो, पण वणाय वणा मा पानअ सुड़ीनी कईस नीं मलजू। तणी वणाय रूकड़ा हू केजू, “एवअ तय मा किरे बी फल नीं लागहीं।” नी वु अंजीर ने रूकडू तरत हुकाई गियू।

20जेरे सेलाय वु जुजू ते वा कईक सकित थाजा नी केजू, “यू अंजीर ने रूकडू अतरू जलदी केम हुकाई गियू?”

21 # मती 17:20; 1 कुरि 13:2 ईसुई उतर मा वणहू केजू, “मुँ तमय हू हासु कऊँ हूँ। अगर तमो विसवास राको नी वेंम नकी करो, ते युस नीं करहो जी अणा अंजीर ने रूकड़ा हाते किदू गियू हे। पण अगर तमो अणा मगरा हू के हो के, ‘उपड़ी जा नी दरिया मा जाई पड़,’ ते यू थाई जाहीं। 22नी जी कई तमो परातना मा विसवास हू मागो, ते वु हेतु तमय मली जाहीं।”

ईसु ने अदिकार माते सवाल

(मरकुस 11:27–33; लूका 20:1–8)

23जेरे ईसु मनदिर मा जाईनी उपदेस आली रेजो तो, ते मुटायाजक नी गढ़ा यहुदि मोरकिया कनी जाईनी वणाहू पुसयू, “एवी वाती तु किने अदिकार हू करे हे? नी यो अदिकार तय कणाय आलजो हे?”

24उतर मा ईसुई वणहू केजू, “मुँ तमय हू एक सवाल पुसू हूँ, अगर तमो विने उतर आलहो, ते मुँ तमय पाळी दई के, मुँ यू काम किने अदिकार हू करू हूँ। 25पाळो यूहना ने पाणी हू बपतिसमा आलवा ने अदिकार किय हू तो? हरग ने हाड़े हू या मनका ने हाड़े हू तु?”

वा एक बिजा हू विसार करीनी केवा लागा, “अगर आपड़ा केह के ‘हरग हू,’ ते वी आपड़ा हू केहीं, ‘ते तमय वणा माते विसवास केम नीं किदो?’ 26नी अगर आपड़ा केह के ‘मनक ने हाड़े हू’, ते आपड़य मनका ने बिक हे, केमके व यूहनाय एक परमेसवर ने हाड़े हू बुलवा वालो जाणता त।”

27तणी वणय उतर मा ईसु हू केजू, “अमय नीं पतो।”

अणी वात माते ईसुई वणहू केजू के, “मुँ बी तमय नीं पाळु के, ई वाती किने अदिकार हू करू हूँ।”

बे सुरअ ने काणी

28“हा पाळो के, तमो अणा बारामा हूं हुसो हो? एक मनक ने बे सुरा ता। वी मुटका कनी गियो नी केजू, ‘हे सुरा, आज ने दाड़ो अंगुर ने वाड़ी मा जा नी काम कर।’ 29पण सुराय उतर आलजू, ‘मुँ नीं जऊँ,’ पण वाहे रेईनी पसताईनी गियो। 30पसे बापे बिजा कनी जाईनी इमुस केजू। नानका सुराय उतर आलजू, ‘हा मुँ जाई,’ पण वाहे रेईनी नीं गियो। 31पाळो अणअ बे जणअ मा हू बाप ने मरजी कणाय पुरी किदी?”

वणय केजू, “मुटकाय।”

ईसुई वणहू केजू, “मुँ तमय हू हासु कऊँ हू कर लिवा वाला नी वेसया परमेसवर ने राज मा तमय हू पेले जाहीं। 32#लूका 3:12; 7:29,30यू मुँ तणी केई रेजो हूँ केमके बपतिसमा आलवा वालो यूहना तमय दरम ने वाट पाळवा आजो नी तमय विने वात ने विसवास नीं किदो। पण कर लिवा वाला नी वेसयाए वणी वात ने विसवास किदो। तमय जेरे यू जुजू ते बी वाहे रेईनी मन नीं बदलजू नी वणा माते विसवास नीं किदो।”

अंगुर ने वाड़ी ने मालिक ने काणी

(मरकुस 12:1–12; लूका 20:9–19)

33ईसुई केजू, “एक फेर काणी हबलो, एक मालिक तो। वणाय एक अंगुर ने वाड़ी लगाड़जी नी विने समकोरी वाड़ किदी, पसे अंगुर ने रस काड़वा ने गाहणी लगाड़वा एक खाड़ो खणजो नी रकवाली हारू एक डागली बणावजी। नी किसाने विनो ठेको आलीनी बिजा देस मा जातो रेजो। 34जेरे फल ने समय कनी आजो, ते वणाय आपड़े थुड़ाक दासोय विने फल ने पाग लिवा किसानो कनी मुकलजा। 35पण किसाने विने दासे हाईनी कणायेक ते कुटजा, नी कणायेक मारी दड़जा नी कणायेक पाटा वाजा। 36एक फेरो फेर वणाय पेले हू वदार दास मुकलजा। किसाने वणअ हाते बी एवोस वेवार किदो। 37बाद मा वणाय वणअ कनी आपड़े सुरो मुकलजो। वणाय केजू, ‘वा मारे सुरा ने कदर करहीं।’

38“पण किसाने जेरे वणाय ठेकेदार ने सुरो जुजो ते वा एक बिजा हू केवा लागा, ‘ई ते विने हेती पुजी ने वारीस हे। आवो अणाय मारी दड़अ नी विने पुजी लई लिय।’ 39तणी वणय वी हाईनी वाड़ी हू बान्णे काडीनी मारी दड़जो।

40“तमो हूं हुसो हो, जेरे वी अंगुरो ने वाड़ी ने ठेकेदार आवहीं ते वणअ किसानो ने हाते हूं करहीं?”

41वणय वणा हू केजू, “केमके वी वणय बुरी मनकय बुरी तरह हू नास करहीं नी अंगुर ने वाड़ी ने ठेको बिजे किसाने आली दिहीं जिया समय माते हाक ने फल ने पाग वणाय आलहीं।”

42ईसुई वणहू केजू, “हूं तमय सासतर मा वसन नीं पणजू,

“‘जी पाटो घेर बणावणा वालय नहकारी दिदो,

विस पाया ने खास पाटो बणी गियो।

यू ते परबू ने हाड़े हू थाजू,

जीयू अमारे जुवा मा अदबुत हे?’

43“तणी मुँ तमय हू कऊँ हूँ के, परमेसवर ने राज तमय हू लई लिदू जाहीं नी वु वणय हेता मनका आली दिदू जाहीं जी विने राज ने वजूने वेवार करहीं। 44जी अणा पाटा माते पड़हीं, वो टुकड़ा-टुकड़ा थाई जाहीं नी अगर यो पाटो कणाक माते पड़हीं ते वणाय पीसी दड़हीं।”

45जेरे मुटायाजक नी फरीसीयो ईसु ने काणी हबलजी ते वा हमजी गिया के, “यो आपड़ेस बारामा केई रेजो हे।” 46तणी वणय वणाय हावा ने कईक कोसिस किदी पण वा मनका हू बिये ता ता, केमके मनका ईसुई परमेसवर ने हाड़े हू बुलवा वालो मानतअ त।

Currently Selected:

मती 21: WBR

Highlight

Compare

Copy