मती 11

यूहना बपतिसमा आलवा वालो नी ईसु

(लूका 7:18–35)

1जेरे ईसु आपड़े बारा सेला हुकम आली सुको ते, वी वणने नगर मा उपदेस नी परसार करवा विय हू जातो रेजो।

2जेरे यूहना बपतिसमा आलवा वालाय जेळ मा मसी ने कामो ने हमिसार हबलीनी आपड़े सेला वणा हू यू पुसवा मुकलजा के, 3“हूं आवणा वालो तुस हे,” या “अमअ बिजा ने वाट जुअ?”

4ईसुई उतर आलजू के, “जी कई तमो हबलो हो नी जुओ हो, वु हेतु यूहनाय जाईनी केई दिओ, 5आदला देकी हे, नी लगड़ा हिड़ी नी फरी हे, कोढ़ी सुद किदा जय हे, नी बेरा हबळी हे, मरेला जीवता किदा जय हे, नी दुकी-लसारे असल खबर हबलावजी जाए हे। 6नी वु मनक दन्य हे जी मय माते विसवास करवो नीं सुड़े हे।”

7जेरे यूहना ने सेला विय हू जाता रेजा, ते ईसु मनका ने पीढ़ हू केवा लागो, तमो हुनी जगा मा हूं जुवा गिय त? हूं वायरा हू अलता थकण बरूई? 8ते तमो फेर हूं जुवा गिय त? हूं तमो एक मोगअ लबरअ पेरजअ थकण आदमजी जुवा गिय त? जी मोगअ लबरअ पेरे हे व मेहलअ मा रय हे। 9ते पसे तमो हय गिय त? हूं कणाक परमेसवर ने हाड़े हू बुलवा वालाय? हा, मुँ तमय हू कऊँ हूँ जी तमय डिटो हे वी कणाक आगमवाणी करवा वाला हू बी मुटो हे। 10यो वोस हे जिने बारामा सासतर मा लकजू हे के,

“जू मुँ तय हू पेले आपड़े दुते तय मोरी मुकली रेजो हूँ,

जी तारे मोरी तारे हारू वाट तयार करहीं।”

11“मुँ तयहू हासु कऊँ हूँ के, जी लुगाजअ हू जनमजा हे वणअ माहू बपतिसमा आलवा वालो यूहना हू कणु मुटा नीं थाजा। पण जी हरग ने राज मा नाना माहू नानो हे विस वणाहू मुटो हे। 12#लूका 16:16बपतिसमा आलवा वालो यूहना ने दाड़ा हू अबार लगण असल खबर ने परसार किदो गियो के, परमेसवर ने राज ने मनका ने हाते मारवु-कुटवु किदू जाए नी मारवा कुटवा वाला वु राज लिवा ने कोसिस करे हे। 13यूहना ने आवणा तक हेता परमेसवर ने हाड़े हू बुलवा वाला नी मुसा ने नियम मा आगमवाणी करता रेजा के, परमेसवर मनका ने जीवन माते राज करहीं। 14#मती 17:10–13; मर 9:11–13नी अगर तमो अणी वात माते विसवास करो ते यू मानी लियो के, यूहनास एलिया हे, जी आवणा वालो तो। 15जिने हबलवा ने कान हे, वा हबली लिए।

16“मुँ अणा समय ने मनको ने बराबरी कणा हू करू? व वणअ सुरअ हरका हे जिय बजारअ मा बेहिनी एक-बिजाय हादिनी कय हे के, 17‘अमय तमारे हारू वाहली वजाड़जी, पण तमो नीं नासया, अमय दुकी-गीत गाजअ, पण तमो नीं रूजा।’ 18केमके बपतिसमा आलवा वालो यूहना नीते खातो-पीतो आजो हे, ‘नी व कय हे के, अणामा बुरी आतमा हे।’ 19मुँ मनक ने सुरो खातो-पीतो आजो हूँ, पण मनका कय हे के, ‘यो आदमी जुओ, खाऊकेड़ नी पीवा वालो हे, यो कर लिवा वालअ नी पापीयो ने हाती हे।’ पण अकल हू आपड़े काम मा हासो ठेहरावजो गियो हे।”

अविसवास माते हाय

(लूका 10:13–15)

20पसे ईसु वणअ नगरो ने हाय आलवा लागो, जणमा वणाय कईक समतकार ने काम किदअ त। केमके वणय आपड़े मन नीं बदलजा त। 21“हाय खुराजीन, हाय बेतहसेदा, जिय समतकार ने काम तमय मा किदअ गिय, अगर व सूर नी सेदा मा किदअ वेतअ ते, व किरेनअ बोरी ने लबरअ उड़ीनी नी रकुड़ा मा बेहिनी पाप हू मन बदली लितअ। 22पण मुँ तमय हू कऊँ हूँ के, न्याव ने दाड़े तमारे दसा हू सूर नी सेदा ने दसा वदार विटवी पड़हीं। 23नी हे कफरनहूम, तु हूं हुसे हे के, मुँ हरग ने मईमा तक उसो उटावजो जाई? नीं। तु ते पाताळ मा नरक मास जाई। केमके जी समतकार ने काम तय मा किदअ व अगर सदोम मा किदअ जाता ते, वु नगर आज लगण बणजू थकण रेतू। 24#मती 10:15; लूका 10:12पण मुँ तमय हू कऊँ हूँ के, न्याव ने दाड़े तारे मनका ने दसा हू सदोम नगर ने दसा हू कईक वदार विटवी पड़हीं।”

पार हू दबीला थकण ने हारू आराम

(लूका 10:21,22)

25वणीस वला ईसुई केजू, “हे परम बाप, तु हरग नी तरती ने परबू मुँ तारे मईमा करू हूँ, केमके तय ई वाती अकल वालअ नी हमजदारो हू हपाड़ी राकजी नी सुरअ माते परगट किदी हे। 26हा, हे परम बाप, केमके तय यूस बड़ीया लागू।

27 # यूह 3:35; यूह 1:18; 10:15 “मारे परम बापे मय हेतु हुपजू हे नी कणु बाप ने अलावा सुराय नीं जाणे। नी कणु सुरा ने अलावा बापे नीं जाणे, बस सुरो नी विस जणा माते वी परगट करवा साहे हे।

28“हे हेता काम करवा वालो नी पार हू दबाणे थकण मनको, मय कनी आवो, मुँ तमय आराम आली। 29मारे जोहरी आपड़े माते उटावी लिओ नी मय हू हिको, केमके मुँ नरम, नी मन मा नानो हूँ नी तमो आपड़े मन मा आराम पाहो। 30केमके जी जोहरी मुँ तमय आलु हूँ वे जुतरवा मा कईक सरल हे। नी जी पार मुँ दडू हूँ वी कईक फोरी हे।”

Currently Selected:

मती 11: WBR

Highlight

Compare

Copy