Romans 8
8
Te ora i te Mauri Tapu o Tupua
1Kae tera, siei se fakkiroa i vasia nei kia ratou e fare faka piki kia Jesus Christ. 2Maina ia Jesus Christ te fono o te Mauri Tapu o Tupua e nai soria ina ko te ora, ku nai faka masara kuou mai te fono o te sara ma te mate. 3Tera pe nia ma koa Fono ku se ma fai, faina te tino faka taangata ku losi, kae Tupua ne nai faka ngaromia ko te sara faka taangata i te sori anga o tana Tama fangasere. Koia ne au i te tino faka taangata ke sau kesea ko te sara faka taangata. 4Tera ko te tonu maori oa Fono ke ma faka patino ria ia tatou e fare tautari ki te Mauri o Tupua, kae si see tautari ki te ora faka taangata. 5Koratou e tautari ki te tino faka taangata, ko aratou atamai e fai fekauaki ko te fifia o te tino, kae koratou e tautari ki te Mauri o Tupua e fai fekauaki ko na fifia. 6Kae kee fai fekauaki tou atamai ki te ora faka taangata na faka suku suku te mate, kae kee fai fekauaki tou atamai ki te Mauri o Tupua na faka suku suku te ora ma te roto mafora. 7Ma tera te tangata e faka pariki ma Tupua i vasia o na ora e kavea ko te tino faka taangata, faina koia si see tautari kia fono a Tupua, kae e tonu, koia si se ma fai ke tautari kiei. 8Koratou e tautari ki aratou tino faka taangata, ka si see fifia kina e Tupua.
9Kae kotou ia si see fare pe otou ora faka taangata e faka ari atu kia kotou. Kotou e fare pe te Mauri Tapu o Tupua e faka ari atu kia kotou, kae pe e tonu ia te Mauri o Tupua e nofo ia kotou. Kae pe koai si see sau ko te Mauri Tapu o Christ, koia ka si see kau iei. 10Kae pe Christ e nofo ia kotou, maafa rei onia otou tino e fai ke mmate faina ia sara, kae te Mauri Tapu e ora ia kotou, faina kotou ku tukuna tonu ki Tupua. 11#1 Cor 3.16.Kae te Mauri o Tupua koia ne nai faka masike ria ko Jesus mai te mate, e nofo ia kotou, koia ne nai faka masike ria ko Christ mai te mate ka nai soria atu fokia ko te ora ki otou tino faka taangata i na Mauri Tapu e nofo ia kotou.
12Kae tera, taina ma ee, kotatou ke fare arei, kae siei ke fare kia fifia oa tatou tino faka taangata. 13Kae pe kotou e fare tautari ki otou tino faka taangata, kotou ka mmate; kae pe kotou e fare tautari ki te Mauri Tapu o Tupua ka kotou faka leku tia riaina otou fainga pariki, kotou ka ora. 14Koratou ku takina e te Mauri Tapu o Tupua, koa Tama a Tupua. 15#Mak 14.36; Gal 4.5–7.Maina te Mauri Tapu ku nai soria atu kia kotou, ka si se nai faka seka ria pe ke nai faka mataku tia kotou, kae tera rei te Mauri o Tupua ka nai faia kotou a tama a Tupua, ma i te makeke o te Mauri o Tupua kotatou e tangi ki Tupua, “Pa ee! Toku Mmana ee!” 16Te Mauri Tapu o Tupua maso koia ma tatou tupua ora ku rau faka atetea riaina kotatou a faanaunga a Tupua. 17Kae faina kotatou ko ana tamariki, tera kotatou ka vaevae ia fakatapu anga ku faka patino mo na kano fenua, ma kotatou ka vaevae fokia ma Christ pe nia ma Tupua ku faka patino kiei. Kae kia tatou ke kau i na fakarongo neaisu anga, tera kotatou fokia ka kau i na taurekareka.
Te taurekareka o vasia ka au
18Kuou e maanatu ko tatou fakarongo neaisu anga ia vasia nei ka si see faia ria ke faka tautau atu ma te taurekareka ka faka saa ria kia tatou. 19Koa faka tupu tupu anga kaatoa e maatea rei ratou fetari ki Tupua ke nai faka saa ria ko ana tama. 20Maina te faka tupu tupu anga ku faia ke faka tuei, siei ki na fifia, kae ki te fifia o Tupua ke faia kiei. Kae kotatou e paanaki soro 21ko te faka tupu tupu anga maso koia ke faka tokese mai na seka ranga ke pariki, ma ke vaevae te taurekareka anga tau atetea o nga tamariki o Tupua. 22Tatou iroa ina koa faka tupu tupu anga kaatoa ku faka ii ma te isu mai ki vasia nei, pe te isu o te faanau tama. 23#2 Cor 5.2–4.Kae siei te faka tupu tupu anga fuarei, kae kotatou e vaka ria e te Mauri o Tupua pe te mataki sori a Tupua, kotatou fokia e faka ii maso kotatou, vasia tatou e fetari ki Tupua ke nai faia kotatou ana tama, tera ko te faka masara ranga oa tatou tino. 24Kae i te paanaki soro nei, kotatou ku faka saofia. Kae kotatou si see paanaki soro kia nea e tatou ravea ina, maina siei pe koai e paanaki soro kia nea e nai ravea ina. 25Kae pe kotatou e paanaki soro kia nea si see tatou ravea ina, tera kotatou e faka toka maarie rei o fetari kiei.
26Ia riu ara sokotasi, te Mauri o Tupua fokia e au ke nai soakina ko tatou losi anga. Tatou ku see iroa ina tatou fai kave kia rotu. Kae te Mauri o Tupua maso koia e faka ngore ngore ki Tupua kia tatou ia faka ii anga oa taranga faka masi. 27Ma ko Tupua ku nai ravea ina ko atatou fatu manava, ku nai iroa ina koa atamai o te Mauri Tapu, faina te Mauri Tapu e faka ngore ngore ki Tupua i faasi o na kano fenua, ma e tautari ki na fifia.
28Ma kotatou e iroa ia nea kaatoa ko Tupua e fai fekau ki te laoi mo ratou e fakapere kiei, koratou ku nai karanga tia tautari ki ana atamai. 29Kia ratou ku oti na faka patino ria e Tupua, ku nai faia riaina fokia ke fai pe tana Tama, tera ko te Tama e faia te mataki uru matua i nga taina kaatoa. 30Ma tera koratou ku nai faka patino riaina e Tupua ku nai karanga tia fokia; ma kia ratou ku nai karanga tia ku nai faka tonu sia fokia, ma kia ratou ku nai faka tonu sia, ku vaevae i na taurekareka.
Te fakapere a Tupua ia Jesus Christ
31Nia matou ka mmuna tera kia nea nei? Kae ko Tupua mo tatou, koai rei ka nai tookaia kotatou? 32Tupua si se ne nai fokisakina ko tana Tama fangasere, kae ne nai kavaakina koia kia tatou kaatoa! Ea koia ka si se nai soria more mai koa nea kaatoa kia tatou fokia?! 33Koai rei ka nai faka tautara sia ko te kano fenua e faka patino e Tupua? Siei ko Tupua ku nai faka tonu sia ko na kano fenua! 34Koai rei ka nai tukuakina koratou? Siei ko Jesus Christ ne faka mate, e maatea atu rei, koia ku masike mai i te mate ki te ora, ma ku nai nofo ria ko faasi matau o Tupua. Koia e faka ngore ngore ki Tupua kia tatou! 35Koai rei ka nai vaevaea tatou mai te fakapere o Christ? Ea, e ma faia e te faka pariki, pe te fai pariki, pe te taia fakarongo rongo, pe te fia kai, pe te faka arofa, pe te faka mataku taku, pe te mate? 36E fai pe te Pepa Tapu e muna:
“Ki tou faasi komatou e too pariki ki te mate i nga vasia katoa.
Komatou ku faia ria pe a sipi sipi e kavea riaina ke tamatea.”
37Siei, ia nea kaatoa nei, kotatou ku tuu te maaroo maori rei ia koia ku nai fakaperea kotatou! 38Maina kuou e fakatonu rei, siei pe sea ke nai faka mavaea kese kotatou mai tana fakapere: siei te mate, siei fokia te ora; siei nga ʻangelʼ, siei fokia nga vaka atua; siei te vasia nei, siei fokia te vasia ka au; 39siei ko te vaerangi, siei fokia ko a raro oa taangata nei; siei rei pe sea ia taangata nei ke nai faka mavaea kese ria kotatou mai te fakapere a Tupua ia Jesus Christ tatou Ariki!
Currently Selected:
Romans 8: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.