Romans 7
7
Te faka atetea mai te avanga
1Taina ma ee, ea see kotou iroa ina koa fono e nai ariki tia ko te tangata fuarei i na vasia e koi ora iei? E kotou iroa ina, faina kuou e araara ki nga taangata e ratou iroa ina koa fono. 2Fakapera, te fono e nai fau sia ko te fafine avanga ki na matua i na vasia e koi ora iei, kae mate ko na matua, koia ku aatea mai te fono noko fau sia iei. 3Kae tera koia e nofo ma take tangata i vasia na matua e koi ora iei, tera koia ku atia ria te maatua fafine poi vare. Kae laavaki ko na matua, koia ku aatea mai te fono, ma ku masara ke avanga ki take tangata.
4Tera arei, taina ma ee, kotou fokia ne mmate kia Fono faina kotou ne mmate i te tino o Christ, ma i vasia nei kotou na kano fenua, koia ku faka masike riaina mai te mate. Tera kotatou ke ma fai ke matua fai fekau ki Tupua. 5Maina i vasia kotatou e fausia kia sara faka taangata, te fifia maatea oa sara ku nai rangaia ki runga koa Fono, ku fai fekauaki ia tatou fongo tino, kae te faka suku suku o tatou fainga fekau te mate. 6Kae vasia nei, kotatou ku faka masara mai ia Fono, faina kotatou ne mmate kia fono iei ne nai fausia kotatou, tera kotatou ku see fai fekauaki ko te riu ara tuei oa Fono ne tusia riaina, kae e fai fekauaki ko te riu ara foou o te Mauri o Tupua.
Te fono ma te sara
7Tera, kotatou ka mmuna faka fefea? Koa Fono e sara? Siei rei nakoia! Kae koa Fono ne nai faia riaina kuou ke kau iroa ina pe nia e sara. Maina ka si see kau iroa ina laoi pe nia ke fai roto kiei, kae koa Fono ku se nai munakina, “Kau see manani”. 8Kae te sara ku mau ko na vasia ke rangai koa fai roto anga kaatoa ia kuou, ia fai fekauaki anga i te taufau ranga, faina pe seke fono, te sara e seke makeke. 9Kuou maso kuou noko ora i vasia seke fono, kae vasia ku kau iroa ina koa taufau ranga iei, te sara ku fai maatea rei, 10ma kuou ku tamatea. Ma te taufau ranga ku faia ke ora iei, ku nai faia ke kau mate. 11Te sara ku mau ko na vasia, ku nai lesia kuou ma ku nai tamatea kuou kia fai fekauaki anga i te taufau ranga.
12Kae tera, koa Fono maso koia e tapu ma te taufau ranga e tapu, e tonu ma e laoi. 13Ea teinei te atamai, pe nia e laoi ku nai aumai ina ko toku mate? Siei rei nakoia! Kae te sara ne fai iei, o fai fekauaki koa nea laoi, ke aumai ina toku mate. Tera ia te riu ara tonu o te sara ke faka saa riaina maori, kae ia taufau ranga te sara ku ato arei ki mua.
Te featunga i tatou uso
14Tatou iroa ina koa Fono e faka tupua, kae kuou te tangata fuarei, ne tauvia pe te seka ki te sara. 15#Gal 5.17.Kuou si see kau iroa ina pe nia ma aku e fai, faina kuou si see fai pe nia ma aku e fifia ke fai, kae fai rei kia nea e teke kuou iei. 16Kae faina kuou e fai pe nia si see fifia kuou kiei ke fai, e faka saa ria kuou e faka paa kia Fono e tonu. 17Tera kuou siei rei te tangata e fai ia nea nei, kae te sara e nofo ia kuou e nai faia ke kau pariki. 18Kuou e kau iroa ina te laoi si see naa ia kuou tera ko toku tino faka taangata. Maafa rei onia toku fifia maatea ke fai koa nea laoi, kuou ku se ma fai ake rei iei. 19Kuou si see fai ko te laoi kuou e fifia ke fai, kae kuou e fai rei ko te pariki kuou si see fifia ke fai. 20Kae kuou e fai pe nia kuou si see fifia ke fai, na atamai teinei siei kuou e fai iei, kae te sara e nofo ia kuou.
21Tera e kau faara sia te fono nei e fai fekauaki ia kuou: Vasia kuou e fifia ke fai pe nia e laoi, kae kuou e ma fai ke fai fuarei pe nia e pariki. 22Toku roto manava e vaki vaki ia fono a Tupua, 23kae kuou e ono take fono e fai fekauaki i toku tino, te fono e featu ki te fono o toku atamai e tonu iei. Te fono nei e nai faia kuou ke fakkiroa i te fono o te sara e fai fekauaki i toku tino. 24Kuou te tangata siei rei se vaki vaki! Koai ka nai faka saofia mai kuou mai te tino faka peinei e nai kaavea kuou ki te mate? 25Tangi faka ue ue ki Tupua e nai faka saofia mai kuou i tatou Ariki Jesus Christ!
Kae tera kuou i toku atamai fuarei e fai fekauaki koa fono a Tupua, vasia toku tino faka taangata e fai fekauaki koa fono o te sara.
Currently Selected:
Romans 7: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.