Romans 3
3
1Ea nga Jew e fai ni nea laoi sapa ma nga Gentile? O ea ni ngangea laoi e naa i faasi o te faka rau tangata? 2E maatea rei ia riu ara kaatoa! Mataki nea, ko Tupua ne nai soria ko ana taranga ki nga Jew. 3Kae faka fefea rei ki rake faoa ia ratou e seke paanaki maori? Ea koratou e seke paanaki maori, ka faia ria ko Tupua ka si see paanaki maori fokia?! 4Siei rei nakoia! Ko Tupua, te Tupua maori rei, si see tataangutu pe nga taangata. Pe te Pepa Tapu e muna,
“Tera ko kee ke faka tonusia i au taranga,
ma te kaumaro i tou vasia e faka taka ria iei.”
5Tatou ka mmuna faka fefea kae tatou titisara anga e faka atetea riaina ko Tupua e fai tonu? Tatou ka mmuna ko Tupua e fai sara, vasia koia e nai fakkiroa kotatou?! (Te fesiri nei te fesiri faka taangata fuarei!) 6Siei rei nakoia! Kae Tupua pe si see tonu, koia ka ma fai faka fefea rei ko faka tautara koa taangata nei?!
7Sea natafito kuou e koi faia ke tukuakina ria pe te titisara, kae taku see tonu e faka aria ko taurekareka o Tupua ke tuu atetea rei ko na tonu? 8Tera, sea natafito si see mmuna faka peinei, “Ke tatou fai anga pariki, tera te laoi ka au iei?” E tonu rei, rake kano fenua ku muna pariki kia kuou o mmuna tukuaki kia nea rei nei! Koratou ka fai pariki tia maatea rei, e fetau fangatasi ke fai kia koratou.
Siei pe koai e tonu
9Tera sea? Kotatou nga Jew e laoi sapa ma nga Gentile? Siei nakoia! Ku oti matou faka saa riaina ko nga Jew ma nga Gentile e ravea kaatoa rei i te makeke o te sara. 10Pe te Pepa Tapu e nai munakina,
“Siei pe koai e tonu,
11siei pe koai e purotu,
o siei pe koai e faka turoro ki Tupua.
12Nga taangata kaatoa ku taafuri kese mai Tupua,
koratou ku fai sara kaatoa rei.
Siei rei se nea sokotasi e fai fai tonu.
13Ratou fakkii e masara pe te ngutu rua o te tano:
tataangutu pariki e puakina mai mai i aratou alelo,
koa taranga faka tamate tangata mai i aratou rau ngutu;
14ratou muangutu e tautuku maatea rei.
15Koratou e faingaofia ke teke ma ke taa tangata;
16ratou ngangea fea e oro iei, e ratou fai pariki tiaina
ke fakarongo neaisu ko te kano fenua.
17Koratou si see ratou iroa ina ko te riu ara o te roto mafora,
18koratou ku see ako ke faka napa ki Tupua.”
19Ku tatou iroa ina koa nea kaatoa ia Fono e faia kia ratou e fare i araro oa Fono, tera ko faoa kaatoa ke faka oti, ma ke aumai ina koa taangata kaatoa kia faka taka anga a Tupua. 20#Gal 2.16.Maina siei se tangata ke faka tonusia ki faasi o Tupua ia riu ara oa Fono. Kae a fono e fai fekauaki kia taangata ke tatou iroa ina kotatou ku fai a sara.
Tatou faka tonu sia ia paanaki
21Kae vasia nei te riu ara mai Tupua kia taangata ke faka tonusia ki faasi o Tupua ku faka atetea mai. Te riu ara nei si see fai fekauakina ia fono, maafa rei onia koa Fono a Moses ma a tusi tusi ranga a nga ʻProphetʼ ne tongi sanga kiei. 22#Gal 2.16.Te tonu anga mai Tupua nei, e fai fekauaki kia paanaki kia Jesus Christ, kia ratou kaatoa e fakatonu, natafito siei se faka kese kese anga kia nea katoa. 23Nga taangata kaatoa e titisara ma e vaea kese mai te taurekareka o Tupua. 24Kae ne nai faka tonu sia koratou kaatoa i te roto laoi o Tupua, ia Jesus Christ ne nai faka masara ria koratou. 25-26Ko Tupua ne nai kavaakina koia, tera ke nai faka ngaromia koa sara sara anga o nga taangata ki na toto, i aratou paanaki ranga ki Christ. Tupua ne fai faka peinei ke faka atetea ko na tonu tuu. I mua koia noko roto maarie, si see noko rau kia sara sara anga o na taangata, kae i vasia e poi nei, koia ku rau kia sara anga o nga taangata, ke faka atetea ko na tonu anga. Ia riu ara nei ko Tupua e nai faka saa ria maso koia e tonu, ma e nai faka tonu sia koratou kaatoa e paanaki kia Jesus.
27Tera, sea rei ma tatou ke tara kiei? Siei pe sea! Sea rei te atamai ia nea nei, maina kotatou ke tautari kia Fono? Siei, kae kotatou ke paanaki. 28Maina kotatou e maanatu, ko tangata e tukuna tonu ki Tupua fuarei i te paanaki, kae siei kia fai fekauaki anga oa Fono. 29Ea ko Tupua te Tupua fuarei o nga Jew? Ea koia te Tupua fokia o nga Gentile? 30#Gal 3.20.Tupua e sokotasi, ma e nai faka tonu sia ko nga Jew kia koia i aratou paanaki, ma e nai faka tonu sia ko nga Gentile fokia i aratou paanaki. 31Ea teinei te atamai, kotatou e fai kese ma koa Fono i te paanaki nei? Siei rei nakoia! Kae tera tonu ia, kotatou ke puke ke mau koa Fono.
Currently Selected:
Romans 3: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.