Romans 2
2
Te faka tautara a Tupua
1 #
Mat 7.1; Luk 6.37. Ko kee soavaka ee, ko kee e kee faka tautara sia koa rake faoa ki fai ngangea fea? Ko kee ka see faka fiti fiti, faina e kee faka tautara siaina ia nea sokotasi e fai ea kee. Tera ko kee e taa pouri maso ko kee. 2Tatou iroa ina ko Tupua e tonu i vasia koia e nai faka taka ria ko te kano fenua e fai koa nea faka peinei. 3Kae ko kee, soavaka ee, e kee faka tautara siaina koratou, kae ko kee ia e fai ia nea sokotasi! Ea ko kee e maanatu ko kee ka faka saofia i te faka tautara a Tupua? 4Pe ea kee motu sia ko na arofa maatea e faka toka maarie ma e tari faka maarie? Si see kee maanatua ina ko te arofa o Tupua ke nai takina ko kee ki te siaki foou?!
5Kae tou fatu manava e feka maatea rei si see ta siakina rei. Kae tera ko kee e fai tou kee fakkiroa anga ke sapa maatea rei i te aso te teke ma te faka tautara maori a Tupua ka faka saa ria iei. 6Maina Tupua ka nai fokisakina ki tangata tautari pe nia ma ana noko fai. 7Rake taangata e fai mau te laoi, e faara ke taurekareka, ke faka epa ma ke sau te ora seke suku suku. Ko Tupua ka nai soria kia ratou ko te ora mau. 8Rake taangata e kaiole, koratou e tautari kia nea sara, kae fe teke aki rei ia nea tonu. Ko Tupua ka nai soria kia ratou ko te faka pariki anga o na teke. 9Ko nga taangata kaatoa e fai koa tukunga pariki ka fakarongo neaisu maatea rei, e faka mua ki nga Jew ma nga Gentile fokia. 10Kae ko Tupua ka nai faka taurekareka ria, faka epa ma te roto mafora ki faoa kaatoa e fai laoi, e faka mua ki nga Jew ma nga Gentile fokia. 11Maina Tupua si see fai o faka paa pe kiai.
12Te kano fenua siei ko nga Jew koratou siei i araro oa Fono a Moses kae titisara, maafa rei onia koratou siei e fare i araro oa Fono nei, kae faka leku tia. Ko nga Jew koratou i araro oa Fono a Tupua kae titisara, koratou e faka tautara sia ia Fono o faka leku tia. 13Maina siei faoa e fakarongo kia Fono ko nga taangata e tukuna tonu ki Tupua, kae faoa e tautari pe nia koa Fono e taufau kiei. 14Ko te fenua siei ko nga Jew si see fare i araro oa Fono a Tupua, kae pe koratou e tautari ratou roto maori o fai pe nia oa Fono e taufau, koa fono kia ratou maso koratou, maafa rei onia koratou si se noko fare i araro oa Fono a Tupua. 15Koratou e fai faka saa ia Fono e tusia riaina i aratou fatu manava. Ratou roto maori fokia e faka aria ke tonu, faina ratou maanatu i rake vasia e nai tukuakina ma i rake vasia e nai soakina koratou. 16Tautari ki te Rongo Laoi kuou e tuufaki, teinei te fai ka fai i te aso i vasia o Tupua, mai ia Jesus Christ, ka nai faka tautara koa atamai faka fufu o nga taangata katoa rei.
Nga Jew ma te Fono a Tupua
17Faka fefea kia kee? Ko kee e muna maso ko kee te foi Jew, ko kee e paanaki kia Fono, ma e tara ki tou Tupua; 18e kee iroa ina pe nia ma Tupua e fifia kia kee ke fai, ma ko kee noko akona ria kia Fono ke tautari kia riu ara tonu; 19ko kee e maanatu ko kee e taki ko faoa sengi, te faka maarama kia ratou i te kau pouri, 20te tataufau ki nga fenua sea, ma te fakaako o nga fenua saeaki. Ko kee e maanatu rei ia Fono ko kee e poto ma e tonu kaatoa rei iei. 21Ko kee e fakaako ko rake faoa, sea natafito si see fakaako maso ko kee? Ko kee e tuufaki, “Kau see kaiaa”, kae ko kee ia e kaiaa! 22Ko kee e muna, “Kau see oro vare”, kae ko kee ia e poi vare! See kee fifia kina koa tupua faka taangata, kae ko kee ia e kaiaa i aratou fare tapu! 23Ko kee e tara kia fono a Tupua, kae ko kee ia e seke faka epa ria ko Tupua kia saeaki anga o ana fono! 24Te Pepa Tapu e munakina,
“Maina ia kotou nga Jew,
ko nga Gentile e faka puaka ki te ingoa o Tupua.”
25Kae pe kotou e tautari kia Fono, tera otou faka rau tangata anga e mafa fuarei, kae pe kotou si see tautari kia Fono, kotou ku faia pe kotou se ne faka rau tangata riaina. 26Tera pe te foi Gentile, koia si se ne faka rau tangata, kae tautari kia tataufau oa Fono a Tupua, ea, Tupua ka see maanatu koia ku faka rau tangata? 27Ma tera kotou nga Jew ka faka poua riaina e nga Gentile, faina e kotou saeakina koa Fono, maafa rei onia koa Fono ne tusi ki raro motou, ma kotou ku faka rau tangata. Kae ko nga Gentile e tautari kia Fono, maafa rei onia koratou si se ne faka rau tangata.
28Koai rei ia te foi Jew maori ne faka rau tangata maori rei? Siei te tangata faka Jew e faka ata ko na furunga kere anga ia nea faka taangata. 29Kae tonu ia, te tangata faka Jew maori, koia e nai faka ata riaina ko na faka rau tangata i na roto fatu manava. Iei ku fai fekauakina e te Mauri Tapu o Tupua, kae siei ia Fono. Te tangata faka peinei, e faka puu riaina mai e Tupua, kae siei mai nga taangata.
Currently Selected:
Romans 2: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.