Romans 11
11
Te manava arofa a Tupua ki nga Israel
1 #
Phil 3.5. Kuou e fesiri tera: Ea, ko Tupua ku nai seua kese ko na kano fenua? Siei rei nakoia! Kuou maso kuou te foi Israel e afu mai ia Abraham, mai te kainanga o Benjamin. 2Ko Tupua si se ne nai seua kese ko na kano fenua, iei ne nai faka patino riaina mai te fakatafito ranga. E kotou iroa ina pe nia ma te Pepa Tapu e nai araara fakina i te kupi taranga kia Elijah. Koia ne faka ari ari ki Tupua kia tukunga pariki o nga Israel:
3“Te Ariki ee, ku ratou taia ou ʻprophetʼ, ma ku ratou sevekina ki raro ou ngangea kavaaki.
Kuou fuarei te tangata e tee, ma koratou e fai ke ratou tamatea kuou.”
4Sea rei te tongoi a Tupua kiei?
“Kuou ku kau faka patino ria koa afe e fitu (7,000) o te kano fenua si se ne fakaturou ki te tupua faka taangata ko Baal.”
5Tera ia riu ara sokotasi i vasia nei, see tokarava fuarei e tee ku faka patino riaina ko Tupua tautari ki na roto laoi. 6Koia ne faka patino tautari ki na roto laoi, kae siei ki aratou fainga fekau. Kae faina ko Tupua pe ne faka patino tautari kia fainga fekau o nga taangata, tera ko na roto laoi ku si se tonu maori.
7Sea fokia? Ko te kano fenua o nga Israel si se ne ratou maua riaina pe nia ma ratou e faara kiei. Iei si see tokarava ko te kano faoa ku faka patino e Tupua ku ratou maua riaina, kae faoa kaatoa ku faka turi pariki rei. 8Pe te Pepa Tapu e nai munakina:
“Tupua ne nai faia ko aratou fatu manava
ma ratou atamai ke pouri,
ma ratou mata ka see pula,
ma ratou taringa ka see fakarongo
oko rei ki te aso nei.”
9Ma ko David ne muna:
“Koratou ke pukea ria
ma ke faka tautara sia i aratou kai kai ranga,
koratou ke soro ki te rua ke fakkiroa!
10Tuku ko aratou mata ke ssengi,
koratou ka see pula,
ma koratou tua ke lokuna i aratou sara i nga vasia katoa.”
11Tera kuou e fesiri fokia: Ea, koratou ne soro ku feettoki pariki rei? Siei rei nakoia! Maina koratou ne titisara, te faka sao ranga ku au ki nga Gentile, ke fai ko nga Jew ke maakau kia koratou! 12Tera a sara o nga Jew ne aumai ina ko te fakatapu kia taangata nei, ma i aratou faka arofa ranga faka tupua ne aumai ina ko te fakatapu ki nga Gentile. Tera ka sapa maatea rei oratou fakatapu anga i te vasia te fakataunga o nga Jew ku okotia iei!
Te faka sao ranga o nga Gentile
13I vasia nei kuou e muna kia kotou ko nga Gentile. Kae faina kuou te kau fai fekau ki nga Gentile, kuou ka fia paasaki i aku fainga fekau. 14Matea, kuou ka ma fai ko toku kee kanofenua ia ke maakau, tera ke ma fakasao koa rake taangata ia koratou. 15Maina i ratou vasia ku see fifia kina iei, koa taangata nei ku fifia kina e Tupua. Nia ka faia tera, i ratou vasia ku fifia kina iei e Tupua? Ka faia ko te ora mo te mate!
16Kae te mataki tofi anga o te foi kai e kavaakina ki Tupua, tera te foi kai kaatoa rei a ana fokia. Kae a vai aka raakau e kavaakina ki Tupua, ana tauru raakau fokia a ana. 17Kae rake tauru raakau o te raakau ʻoliviʼ ku fati fati ria kese ki tua, ma tera ko te tauru raakau o te ʻoliviʼ o roto uruvao ku soko mai kiei. Kotou nga Gentile e fai pe te raakau ʻoliviʼ i roto uruvao, ma kotou i vasia nei ku soko ki te tino raakau o nga Jew. 18Kae tera kotou kau see kata kata kia tauru raakau ku fati fati ria kese ki tua. Kotou e fiapaasaki faka fefea? Kotou koa tauru raakau fuarei. Kotou si see faka mau koa vai aka raakau, kae a vai aka raakau e faka mau ria ia kotou.
19Tera kotou ka mmuna, “Koa tauru raakau ku fatia ki tua, tera komatou ke siaki ki aratou tuuranga.” 20E tonu rei, koratou ku fatia kese ki tua, faina koratou si se ne fakattonu, kae kotou ia e turaki faina kotou e paanaki. Kae kau see fia paasaki kiei, kae fai tonu ia o maattaku. 21Maina ko Tupua si se ne faka paa ki nga Jew, koratou koa tauru raakau maori, tera kotou e maanatu Tupua ka faka paa atu kia kotou fokia?! 22Pula tonu ia, ko Tupua e maatea rei na arofa ma na teke. Koia e teke maatea rei kia ratou e feettoki, kae e fakapere kia kotou, pe kotou ke tautari mau ki na tana fakapere. Kae siei, kotou fokia ka sepea kese ki tua. 23Kae ko nga Jew ke siaki o fai o fakatonu, koratou ka fokisakina mai ki aratou tuuranga tuei, faina ko Tupua e ma fai ke nai fokisakina fuarei koratou fokia. 24Kotou ko nga Gentile e fai pea tauru raakau ʻoliviʼ o roto uruvao ne sepea kese mai iei, o soko ki te tino raakau ʻoliviʼ ne tokaki. Ko nga Jew e fai pe te tino raakau ʻoliviʼ ne tokaki, tera e ma faingaofia fuarei ki Tupua ke nai fokisakina mai koa tauru raakau ne sepe kese nei ki na kee tinoi raakau maori.
Te manava arofa o Tupua ki nga Israel
25Taina ma ee, te faka fufu anga maori kuou e fifia ke kotou iroa ina. Tera ka se nai faia otou maanatu, kotou ko te faoa e purotu rei. Te seke atamai o nga Israel ka si see roa, faina e fai fuarei ke oko ki te fakataunga o nga Gentile ku oomai ki Tupua. 26Ta teinei te fai o nga Israel katoa e fakasao fia iei. Pe te Pepa Tapu e muna:
“Te Faka sao ka aumai i Zion,
o nai sau kesea koa kovi kovi ranga pariki mai ia afu o Jacob.
27Kuou ka fai ko te tongi sanga nei kia ratou,
i vasia kuou ka kau saua kese ko aratou sara.”
28Maina si see ratou fifia kina ko te Rongo Laoi, tera ko nga Jew e faka pariki ma Tupua ki otou faasi, nga Gentile. Kae faina koratou a afu o ratou tupuna, tera ko Tupua e fakapere kia ratou. 29Maina ko Tupua si see siaki ko na atamai kia ratou e nai faka patino ria ma e nai fakatapu riaina. 30Kae kia kotou nga Gentile, kotou noko saeaki ia vasia i mua ki Tupua, kae i vasia nei kotou ku arofa tia e Tupua, faina i te saeaki ranga o nga Jew. 31Ia riu ara sokotasi, faina kotou ku arofa tia, tera ko nga Jew i vasia nei e saeaki ki Tupua, ia tera fokia koratou ke ma arofa tia e Tupua i vasia nei. 32Maina ko Tupua ku nai faia ko nga taangata kaatoa ke fakkiroa ia saeaki ranga, tera koia ke nai arofa tia koratou kaatoa.
Rausapai ki Tupua
33Oo, te mau ranga o te taufenua, ma te mata purotu, ma te poto o Tupua! Koai ka nai faka atetea riaina ko ana atamai?! Koai ka nai faka atetea ko ana tukunga?! 34Pe te Pepa Tapu e nai munakina:
“Koai e nai iroa ina ko te atamai o Tupua?
Koai e ma fai ke sori atamai kiei?
35Koai ne nai soria pe nia ki Tupua, tera ke nai siakina foki kia koia?”
36 #
1 Cor 8.6. Maina a nea kaatoa ku faka tupu ria ea koia, ma ia koia, ma kia koia. Ki Tupua ke faka taurekareka i nga vasia katoa! E tonu.
© 2025 Wycliffe Bible Translators, Inc.