Acts 9
9
Te furisia anga o Saul
(Act 22.6–16; 26.12–18)
1I te vasia ai, ko Saul ku maatea rei tana faka pariki taa taangata, o faka leku ko te kau fanonga o te Ariki. Koia ne poi ki te Maurunga o nga Pure Fai kava, 2o fesiri atu kiei ki ni leta faka atetea kia paito taanaki o nga Jew i Damascus. Tera koia ke nai maua ko ni faoa e tautari kia Tukunga o te Ariki i ngangea, koia ke nai pukea koratou, ko nga taangata ma nga faafine, fokisaki mai rei ki Jerusalem. 3I na vasia e poi ki Damascus iei, ku piri piri ki te noforanga lasi i te mo vakanga te maarama ne rere ifo mai te vaerangi kiei. 4Koia ne faka tokina arei ki te kere, ma ne fakarongo ki te reo e karanga atu kiei, “Saul ee, Saul ee! Sea natafito e kee fai pariki riaina kuou?”
5Fesiri atu rei koia, “Koai ko kee, te Ariki ee?”
Muna atu rei ko te reo, “Kuou ko Jesus e kee fai pariki tia. 6Kae tokai ake ki runga o poi ki te noforanga lasi, i ngangea ko kee ka faka ari atu pe nia ma au ke fai.”
7Nga taangata noko kau fanonga koratou ma Saul ku turaki, siei rei se foi taranga ke saa. Koratou ne fakarongo ki te reo, kae siei pe koai ke ratou ravea ina. 8Saul ne tokai ake mai te kunga kere ke pula ko ana mata, kae ku se ma pula rei. Tera koratou ne ttaki ko Saul ki aratou rima ki Damascus. 9E toru anga rei ko ana foi aso si se ne pula rei ko ana mata, ma i te vasia, koia siei rei mo kai pe mo vai ne too ki na manava.
10Te tangata o te kau fanonga e nofo i Damascus, na ingoa ko Ananias. Koia ne mee ono rei ki te Ariki e muna atu kiei, “Ananias ee!”
Tongoi atu rei koia, “Kuou teinei, te Ariki ee.”
11Muna atu rei ko te Ariki kiei, “Pena o poi ki te roto noforanga e ati te ‘Riu ara Tonu’ ki te paito o Judas, fesiri rei ki te tangata mai Tarsus na ingoa ko Saul. Koia e rotu, 12ma ne mee ono rei ki te tangata na ingoa ko Ananias e au o tuku ko na rima kiei, ke pula ko ana mata fokia.”
13Tongoi atu rei ko Ananias, “Te Ariki ee, te kano fenua temate rei ne faka ari mai kia kuou ko tangata naa, ko ana tuku tukunga e pariki rei ne fai ki te kano fenua i Jerusalem. 14Ma koia e au ki Damascus nei, ma te manuu a nga ariki fai kava ke puke koratou e fakaturou kia kee.”
15Muna atu rei ko te Ariki kiei, “Poi, natafito kuou ku sau koia ke fai fekau ma aku, ke fai ko toku ingoa ke iroa ina e nga Gentile, ma nga tii, ma te kano fenua o nga Israel. 16Ma kuou maso kuou ka faka sasa kiei koa nea kaatoa koia ke fai ke fakarongo neaisu ki te faasi o toku ingoa.”
17Tera ko Ananias ne poi o uru ki rota paito o tuku na rima kia Saul. Kae muna, “Saul, taina ee! Te Ariki ne fakkau mai kuou, ko Jesus koia ne faka saa kia kee i te riu ara i vasia ko kee e au ki kunei. Koia ne nai fakkauna mai kuou kia kee, tera ke faka pula ko ou ono ono fanga, ma te Mauri Tapu o Tupua ke nai urufia ina ko kee.” 18I mo vakanga a nea e fai pea unafi oa ika e soro ifo mai ana mata, ma ko Saul ku pula raa fokia. Koia ne tokai ake ki runga, ku faka uku tapu, 19ma ia tua koia ku kai iei, koia ku faka makeke ria.
Saul ne tuufaki i Damascus
Saul ne nofo foi aso rei ma te kau fanonga i Damascus. 20Koia ne poi arei ki nga paito taanaki o nga Jew o tuufaki ko Jesus te Tama a Tupua.
21Koratou kaatoa ne fakarongo kiei, ku fereki ko aratou mauri, ma ne feesiri, “Ea, koia siei te tangata i Jerusalem noko taa ko fenua noko fakaturou ki tangata e ati ko Jesus?! Siki koia ne au ki kunei i te atamai rei, ke puke koratou o kave ki nga pure fai kava?!”
22Kae ko Saul tana tuufaki e maatea rei na maafa, ma nai fakatonu sia ko Jesus te Ariki Fakaroro ku nai faia riaina ko nga Jew e fare i Damascus ku se ma tongoi rei kiei.
23 #
2 Cor 11.32,33. Ia tua oa foi aso nei ku sara iei, nga Jew ne taanaki o tau purenga ke tamate ko Saul. 24Kae koia ne faka ari ki pe nia ma ratou ne fai ke fai. Te poo ma te ao koratou e reosaki mau koa urufanga o te noforanga, tera ke tamate koia. 25Kae tana kano faoa ne sau koia, kave rei, o faka nofo ki te kete, vero ifo rei ki raro i te faka maarama o te saisai o te noforanga.
Saul i Jerusalem
26Saul ne poi ki Jerusalem, ma ne fai ke soko ki te kau fanonga, kae koratou si se ne fakatonu kiei, pe koia ku kau ia ratou, koratou e koi maattaku kaatoa rei kiei. 27Tera ko Barnabas ne au, nai soakina rei koia, o kave ki te kau fai fekau. Koia ne faka atetea atu kia ratou, ko Saul ne fekitei akina ma te Ariki i te riu ara, karanga atu rei te Ariki kiei. Koia ne faka ari ari fokia, ko te makeke o Saul i tana tuufaki ranga i Damascus ki te ingoa o Jesus. 28Ta tera ko Saul ne fare koratou, ma ne poi saere rei i Jerusalem o tuufaki ma te makeke ki te ingoa o te Ariki. 29Koia fokia ne araara ma ne taua taranga ma nga Jew, koratou e mmuna i arataranga o nga Greek, kae koratou ne fai ke tamate ko Saul. 30Vasia kano rotu ne ratou iroa ina te atamai nei, koratou ne kave ko Saul ki Caesarea o fakkau ke poi kese ki Tarsus.
31Ta tera ko te rotu kaatoa i Judea, Galilee ma Samaria ku fare fare laoi i vasia. I te sosoa o te Mauri Tapu o Tupua, koratou ku faka makeke riaina ki roto ma ku maatea rei na tokkapi, ma te fare i te faka napa ki te Ariki.
Peter i Lydda ma Joppa
32Peter ku nai vakaia ko nga ngangea kaatoa, ma take vasia koia ne poi ke faka ati te kano fenua o Tupua e farenaki i Lydda. 33I te noforanga koia ne fekitei ma te tangata na ingoa ko Aeneas ana tino e mate, ku varu anga rei ko ana tau ma tana teka i ana meeranga. 34Peter ne muna atu kiei, “Aeneas ee, ko Jesus Christ ke nai faka maroro ria ko kee. Tokai ki runga o fai ko tou meeranga!” I mo vakanga ko Aeneas ne tokai ake arei ki runga. 35Te kano fenua kaatoa rei e farenaki i Lydda ma Sharon ne ono mata kiei, ma koratou ne taafuri ki te Ariki.
36I te noforanga i Joppa te maatua fafine na ingoa ko Tabitha, koia te fafine o te rotu. (Na ingoa faka Greek ko Dorcas, na atamai te ʻdeerʼ.) Koia noko maatea rei tana sosoa ma tana fai fai laoi ki nga faka arofa i nga vasia katoa. 37I te vasiaa, koia ne ngae ngae, mate arei. Na tino ne faka male, tuku rei ki te rota paito i runga fatua rua. 38Joppa si see mmao ma Lydda ma i vasia te kano rotu i Joppa ne rongo kia Peter i Lydda, koratou ne fakkau koa taangata e toka rua kiei ma taranga, “Sea rei, faka vave mai, o au kia matou.” 39Tera ko Peter ne pena pena, oro arei koratou. Vasia koia ne oko atu iei, kaavea arei ki rota paito i runga fatua rua, i ngangea ko nga maatua tangi soa kaatoa rei ne puri atu kiei, e ttangi ma ne faka ari atu kiei koa suru tino ma suru aofaki ne fai e Dorcas i na vasia e ora iei. 40Peter ne nai fueina kaatoa rei koratou ma rota paito, ma ne tokoturi ki raro o rotu. Tera koia ne tafuri ki te tino o karanga, “Tabitha ee, tokai ki runga!” Koia ne pula ake ko ana mata, nai ravea rei ko Peter, tokai ake arei ki runga, o tupotu. 41Peter ne ropa atu ko na rima ke sosoa kiei ke tuu ki runga. Tera koia ne karanga ki te kano faoa o te rotu ma nga maatua tangi soa, ma ne faka ari ea koia kia ratou ko te fafine e ora rei. 42Te rongo oa nea nei ku kavea kaatoa rei i Joppa, ma te kano fenua temate rei ne fakatonu ki te Ariki. 43Peter ne rava rei ko ana aso ma tana nofo i Joppa i te paito o Simon te tangata e pena ia raukiri manu.
© 2025 Wycliffe Bible Translators, Inc.