Acts 8
8
1Ma ko Saul ne sori faka tonu i na tamate ranga.
Saul nai faia pariki ria te rotu
I te aso ai, te kano rotu i Jerusalem ku fakatafito ke fai pariki tia. Te kano rotu kaatoa rei, ku matofa vare rei ia motu ngangea i Judea ma Samaria, kae te kau fai fekau e fare fuarei. 2Rake taangata o te rotu ne tanu ia Stephen, ne maatea ratou arofa ma ratou ttangi kiei.
3 #
Act 22.4,5; 26.9–11. Kae ko Saul ne fai ke faka leku te kano rotu, uru paito saere, koia e tosi ki tua ko te kano rotu, nga taangata ma nga faafine, ma rakuna koratou ki rota fare pono pono.
Te Rongo Laoi e tuufakina i Samaria
4Te kano rotu koratou ne matofa vare, ne oro ki nga ngangea kaatoa o tuufaki koa taranga a Tupua. 5Ko Philip ne poi ki te noforanga lasi i Samaria, ma ne nai tuufakina ko te Rongo Laoi o te Ariki Fakaroro ki te kano fenua o ngangea. 6Te kano fenua ratou fia ke fakarongo rei kia araara fanga a Philip, natafito ia ratou ne fakarongo kaatoa rei kiei ma ne ono ki ana furisanga ne fai fekauaki. 7Ne maatea ko te kano fenua ne fue kese ko nga atua pariki ma koratou ne oomai ki tua ma te foorua lasi. Ko nga tino mate ma te kano fenua sape fokia ku faka saerea laoi. 8Tera ku maatea rei ko te vaki vaki i te noforanga i Samaria nei.
9I te noforanga lasi nei, te tangata e nofo na ingoa ko Simon, koia i rake vasia ne nai furisia ina nga Samaria ki ana rau raakau. Koia ne faka fiapaasaki kia koia te tangata sapa. 10Ma te kano fenua kaatoa i nga fai tangata maurunga ma e mau raro, ne fakatonu rei kiei, ma ne mmuna, “Te tangata nei te mana faka tupua, kua iroa ina e makeke sapa rei.” 11Koratou ne tautari kiei, natafito ku nai furisia ina ko aratou atamai ku roa rei koa vasia, ma na fai o ana rau raakau. 12Kae vasia oratou ne fakatonu kia tuufaki ranga a Philip i te Rongo Laoi o Jesus Christ ma te Kainanga o Tupua, koratou ne faka uku riaina, ko nga taangata ma nga faafine. 13Simon maso koia ne fakatonu fokia, ma ne faka uku ria. Ma koia ne faka ppiki kia Philip ma ne mate koa ana tino i vasia koia ne ono mata kia too toonga oa furisanga ne fai fekauaki.
14Te kau fai fekau i Jerusalem ne rongo ki te kano fenua i Samaria ku fakarongo kia taranga a Tupua, tera koratou ne fakkau ko Peter ma John kia ratou. 15I vasia oraua ne oko iei, koraua ne rotu ki te kano rotu ke ifo ko te Mauri Tapu o Tupua kia ratou. 16Natafito te Mauri Tapu o Tupua sisiki fena ifo ki se nea ia koratou. Koratou ne faka uku tapu riaina fuarei ki te ingoa o Jesus Christ. 17Tera ko Peter ma John ne tuku koa rau rima kia ratou, ma te Mauri Tapu o Tupua ne ifo kia ratou.
18Simon ne ono ki te Mauri o Tupua ku soria kia ratou i vasia koraua ne tuku koa rau rima kia ratou. Tera koia ne sori mane kia Peter ma John, 19ma ne muna atu rei, “Sori ko fai mana nei kia kuou fokia, tera pe koai kuou ka tuku oku rima kiei, ke ifo ko te Mauri Tapu kiei.”
20Kae ko Peter ne tongoi atu kiei, “Ko kee ma au mane naa ke faka leku tia riaina, kia au maanatu anga ke tauvi koa sori a Tupua kia mane! 21Ko kee siei se tuuranga mo ou pe ke sosoa kia fainga fekau amatou, natafito tou fatu manava si see tonu faka laoi ki faasi o Tupua. 22Tera, siaki mai i ou atamai pariki, ma rotu ki te Ariki ke faka ngaromia ina koa au sara, kia maanatu pariki faka peinei. 23Natafito ku kau iroa ina, ko kee e pii ia atamai pariki oa tukunga sara.”
24Muna atu rei ko Simon kia Peter ma John, “Sea rei rotu ki te Ariki kia kuou, tera koa nea ne araara faki ea kee nei ka see rave ia kuou.”
25Ia tua koraua ku faka atetea maso koraua iei, ma ne rau araara fakina koa taranga a Tupua, Peter ma John ne foki ki Jerusalem. Ia rau vasia ne foki iei, e tuufaki saere ko te Rongo Laoi kia noforanga o nga Samaria.
Philip ma te taki faka Ethiopia
26Te ʻangelʼ o te Ariki ne muna atu kia Philip, “Pena o poi ki te ruatuu, ki te ara e fena ifo mai Jerusalem ki Gaza.” (Te riu ara nei, ku see ssara vasia nei.) 27Tera koia ne tokai ake, poi arei, fekitei akina rei ma te taki faka Ethiopia, koia te matuaa tangata e oono ia kae kae ranga oa mane a te ariki fafine o Ethiopia. Te tangata nei ne poi ki Jerusalem ke fakaturou, 28ma i na vasia e foki ki na noforanga iei, koia e nofo i na vaka e tau ko te pepa a Isaiah te ʻprophetʼ. 29Te Mauri Tapu o Tupua ne muna atu kia Philip, “Poi ki te vaka naa, o nofo piri piri atu kiei.”
30Tera ko Philip ne rere faka piri piri ki te vaka, fakarongo rei kiei e tau i te pepa a Isaiah, te ʻprophetʼ. Koia ne fesiri atu kiei, “Ea, ko kee e atetea pe nia ma au e tau naa?”
31Te taki ne tongoi kiei, “Ka kau atetea faka fefea, kae siei se nea ke nai faka atetea riaina kia kuou?” Koia ne muna atu kia Philip ke kake ake, o nofo i na faasi i na vaka. 32Te kupi taranga te Pepa Tapu e tau ea koia e naa teinei:
“Koia ku fai pe te manu sipi sipi e kavea riaina ke tamatea.
Koia ku fai pe te tamai sipi sipi si see rangona riaina pe sea iei i na vasia e koti kese koa ana furu iei.
Koia siei rei se foi taranga ne munakina ki tua.
33Koia ku fai pariki tia, ma siei pe koai ke sosoa o pula kiei.
Siei se nea ka nai faka aria ina ko ana afu,
natafito na ora ia taangata nei ku faka okotia riaina.”
34Tera muna atu rei ko te taki kia Philip, “Faka ari mai kia kuou, a nia ma te ʻprophetʼ nei e mmuna kiei? Kia koia ia, pe ki take tangata?”
35Philip ne fakatafito o araara faki. Koia ne faka ari kiei ko te Rongo Laoi o Jesus, tafito rei mai te kupi taranga nei o te Pepa Tapu. 36I vasia oratou e kau fanonga mai i te ara iei, oomai tonu rei ki te ngangea fonu fonu, ma te taki ne muna atu kiei, “Te vai i ngangea nei. Sea e nai pukea ka see kau faka uku iei?”
37[Muna atu rei ko Philip kiei, “Ko kee ka faka uku fuarei i tau fakatonu maatea ma tou fatu manava kaatoa.”
Tongoi atu rei koia, “Ea rei, kuou e fakatonu ko Jesus Christ, te tama a Tupua.”]
38Te taki ne muna atu ki te vaka ke faka tuu, ma koraua ne fesopoki ki raro, oro ki roto vai, ma ko Philip ne nai faka uku riaina koia. 39Vasia oraua ne oomai ki runga mai roto vai, te Mauri o Tupua ne kave kese ia Philip. Te taki si se ne ono rei fokia kiei, kae koia ne tafito arei o poi ma na mata mau maatea. 40Philip ne faka saa maso koia ki Azotus, koia ne poi saere arei o tuufaki ko te Rongo Laoi i nga taoni kaatoa oko rei ki Caesarea.
© 2025 Wycliffe Bible Translators, Inc.