Acts 7
7
Te araara fanga a Stephen
1Te Maurunga o nga Pure Fai kava ne feesiri kia Stephen, “Ea a nea nei e tonu?”
2Stephen ne tongoi, “Pa ma ee, ma taina ma ee! Fakarongo mai kia kuou! Te Tupua o te taurekareka ne faka saa ki tatou puna ko Abraham i na vasia e nofo i Mesopotamia, ia tua koia ku au ke nofo i Haran, 3ma ne muna atu kiei, ‘Tuku ko tou kanoa paito, ma tou noforanga, kae poi kia kere ka kau faka aria atu kia kee.’ 4Ta tera koia ne tuku ko na kanoa paito ma ne poi ke nofo i Haran. Ia tua o na mmana ku mmate iei, Tupua ne fai ea koia ke soosoo kia kere e kotou nofo ria i vasia nei. 5Tupua se ne nai soria ina ni kere mo Abraham, siei rei se ngangea faka molakea rei. Kae Tupua ku tongi atu kiei, koia ka sori kiei, ma ka fai o ona rei ma ki ana afu ki muri. I te vasia o Tupua ne tongi kiei nei, ko Abraham siei ko ni tama ma ana. 6Konei a taranga a Tupua ne fai kiei, ‘Ou afu ka ratou nofo ria koa kere kese, i ngangea koratou ka seka ma te kano fenua, ma ka fai fai pariki tia riaina ea ratou ia tau e fua te rau e faa (400). 7Kae kuou ka fakkiro ko te kano fenua e seka koratou kiei nei, ma ia tua ou afu ka oomai kese ma te kanofenua naa ma ka faka turoro kia kuou i ngangea nei.’ 8Tera ko Tupua ne nai soria kia Abraham ko te furunga kere te faka mailonga o na tongi sanga. Ko Abraham ne furu ea koia koa kere o Isaac vasia oa foi aso o memea ku varu iei. Isaac ne furu ea koia koa kere o Jacob, ma ko Jacob ne furu ea koia koa kere o tana faanaunga e tino anga ma rua atatou puna.
9“Te faanaunga nei ne kanifini kia Joseph, ne ratou fai tauvia ke seka i Egypt. Kae ko Tupua koraua rei e oro, 10ma e nai soakina koia i ana faingataa anga. Ko Tupua ne nai soria riaina kia Joseph ko te purotu ke manava arofa tiaina e Pharaoh te tii o Egypt. Tera ko Pharaoh ne nai faia riaina ko Joseph ke oono i na kano fenua ma na paito ariki kaatoa rei. 11Tera te onge ne paa i Egypt ma Canaan, aofakina kaatoa rei, ma te kano fenua ne fakarongo neaisu ia ratou fiakai. Tatou puna siei rei ko ni kai ma ratou. 12Vasia o Jacob ne rongo kia kai e naa i Egypt, koia ne fakkau ko ana tama, tatou puna, ki ratou mataki oro anga. 13I aratou oro faka rua anga, Joseph ne faka iro maso koia ke iroa ina e ana taina, ma ko Pharaoh ne nai iroa ina ko te paito o Joseph. 14Tera Joseph ne sori ko ana taranga ki na mmana Jacob, faka ari atu kiei ma te paito kaatoa rei, ke oomai ki Egypt, te tino fitu ma rima (75). 15Tera ko Jacob ne poi ki Egypt, i ngangea koia ma tatou puna ne mamate iei. 16Ratou tino ne kave ki Shechem, i ngangea ratou tino ne tanumia i te kere tamate a Abraham, ne tauvi mai te kano paito o Hamor kia mane.
17“I te vasia ku piri piri ke faka tonu e Tupua ko tana tongi anga ne fai kia Abraham, te kano fenua i Egypt ku maatea rei i vasia. 18I te vasia ai, take tii ne nofo ake ku fono fono i Egypt. Koia si se nai iroa ina ko Joseph. 19Koia ne nai lesia ina ko tatou kano fenua, ma ne nai anga anga pariki tia ko tatou puna, ma ne nai faka oso fia koratou ke raku kese koratou memea ke mmate. 20I te vasia, ko Moses ne faanau iei, te tama taurekareka. Koia ne faka saere i na paito e toru ko ana marama. 21Ma i vasia ne tukua kese ma na paito, te tama afine a Pharaoh ne faka tama ea koia pe tana kee tama ia. 22Koia ne fakaako riaina kia mata purotu kaatoa rei o Egypt, ma ne somo ake tangata tau tau faiva ia taranga ma ia too toonga.
23“I vasia o Moses ku fua faa ko ana tau iei, koia ne fifia ke faara ke nai iroa ina ko na kano fenua nga Israel. 24Koia ne nai ravea ina te foi Egypt e nai taia riaina ko na foi faoa. Tera koia ne poi o sosoa kiei, nai tamatea rei te foi Egypt nei. 25(Koia ne maanatu rei ko na kee kanofenua ia ka ratou iroa ina ko Tupua ku fai koia ke faka masara koratou kae si se ne ratou iroa ina.) 26Take aso, ne nai ravea ina koa foi Israel e toka rua e featu, ma ne fenatu ke vaevae koraua, koia ne muna atu, ‘Fakarongo toka rua ee, ko korua te tau faanau, sea natafito e fai pariki atu ki take nea?’ 27Kae koia ne faka taki pariki ia raua, ne nai turekina ko Moses ki tua, ma ne muna atu, ‘Koai ne nai faia ko kee ke fono fono, ma ke fakarongo ia matou? 28Ea ko kee e fifia ke tamate kuou, pe te foi Egypt ne kee tamatea riaina nai naanafi?’ 29Vasia o Moses ne fakarongo kiei nei, koia ne rere kese ma Egypt, o nofo i Midian, i ngangea ne fai ko ana tama e toka rua iei.
30“Ia tua oa tau ku fua faa ku sara, te ʻangelʼ ne faka saa ki Moses i te kai ruru o te afi, e kaa i te uruvao i te tulaavaki ranga, e piri piri ki te Maunga i Sinai. 31Moses ku mmate ko ana tino ki pe nia ma ana ne ono kiei, ma ne fenatu piri piri ki te uruvao, ke pula tau tonu. Kae koia ne nai rangona riaina ko te reo o te Ariki: 32‘Kuou te Tupua o ou puna, te Tupua o Abraham, ma Isaac, ma Jacob.’ Moses ku mataku maatea rei, ma ku see ta ppula rei.
33“Te Ariki ne muna atu kiei, ‘Sau kese ko ou rafi vae ki tua, natafito te ngangea e tuu ko kee iei naa, a kere tapu. 34Kuou ku pula ma ku kau ravea ina toku kano fenua e fai pariki tiaina ke fakarongo neaisu i Egypt. Kuou ku kau rangona riaina ko aratou tangi sanga, ma kuou ku fena ifo ki raro ke faka masara koratou. Au i vakanga nei, kuou ka fakkau atu ko kee ki Egypt.’
35“Moses te tangata si se ne fifia kina riaina e te kano fenua o Israel. Koratou ne feesiri, ‘Koai ne fai atu ia kee, ke fono fono ma ke fakarongo ia matou?’ Koia ia te nea a Tupua ne fakkau pe te fono fono ma te faka sao. Te ʻangelʼ ne faka saa i te uruvao ne vera o nai soakina koia. 36Koia ne nai takina ki tua ko te kano fenua mai Egypt, fai fekauaki koa too toonga oa furisanga i Egypt, ma te moana e ati te ‘Moana Toto’, ma i ngangea tulaavaki, ia tau e fua faa. 37Moses koia te tangata ne muna atu ki te kano fenua o Israel, ‘Tupua ka nai fakkauna ko te ʻprophetʼ kia kotou, fakapera rei pe kuou nei, koia ka fai te tangata i totou kano fenua maori rei.’ 38Koia te tangata noko oro ma te kano fenua o Israel i te ngangea tulaavaki. Koia noko oro ma tatou puna ma te ʻangelʼ ne muna mai kia koia i te Maunga i Sinai, ma koia ne nai saua riaina koa taranga a Tupua ke faka oko mai kia tatou.
39“Kae tatou puna si se ne fifia ke tautari kiei. Ne ratou seua kese ki tua kae fai rei ke ratou foki ki Egypt. 40Tera koratou ne mmuna atu kia Aaron, ‘Pena mai ko se tupua ma matou ke mua ia matou. Komatou ku see matou iroa ina pe nia ku faia riaina kia Moses ne nai aumai ina kese komatou mai Egypt.’ 41Iei tera ne pena faka tautau ea ratou ki te tamai puluka. Kavaaki kiei, ma ne fai te kai kai o faka napa ki te manu ne fai ki aratou kee rima ia. 42Kae Tupua ne tafuri kese ma koratou, ma ne nai soria ina koratou ke faka turoro kia fetuu o te vaerangi, pe ne tusia riaina i te Pepa o nga ʻprophetʼ:
‘Kano fenua o Israel!
Siei kia kuou ko kotou ne taa koa manu, kavaaki kia tau e fua faa i te ngangea tulaavaki.
43Iei te fare o te tupua Molech ne amo ea kotou,
ma te aata o te fetuu o totou tupua Rephan.
Koraua a tupua ku pena faka tautau ke faka turoro kiei.
Ta tera kuou ka fakkau atu kotou, ke kotou oro kese mmao rei, faka sara ma Babylon.’
44“Tatou puna ku fare ma koratou te Fare tapu o Tupua i te ngangea tulaavaki. Iei ne pena ria pe Tupua ne faka ari kia Moses ke fai, e tautari rei kia taranga a Tupua ne fai kiei. 45Ia tua ne saua ea tatou puna ko te Fare tapu mai ia ratou mmana, ne amo ma koratou vasia koratou ma Joshua ne oro, o tafao koa kere mai nga fenua ne turi kese e Tupua ma koratou. Ma ne fare ma koratou oko rei ki te vasia o David. 46Koia ne fifia kina e Tupua, ma ne kaisi kiei ke tuku mai koia ke taa ko se paito mo Tupua o Jacob. 47Kae ko Solomon te tangata ne taa te paito o Tupua.
48“Kae te Tupua Maurunga si se nai nofo riaina koa paito ne taa e nga taangata fakapera pe te ʻprophetʼ e muna:
49‘Te vaerangi toku noforanga, muna rei Tupua,
ma koa taangata nei te tuuranga i araro o aku rafi vae.
Se paito koai rei ka taa e kotou mo oku?
Tefea toku ngangea ke maanava kiei?
50Ea kuou si se ne fai ea kuou koa nea kaatoa nei?!’ ”
51Tera ko Stephen ne muna atu foki, “Ko kotou te kano fenua e tuufaki ngataa! Otou fatu manava e kau pouri ngiti rei, ma kotou e turi pariki rei kia taranga a Tupua! Ko kotou e tutaki rei ki otou puna: ko kotou fokia i nga vasia si see fifia mau ke fakarongo ki te Mauri Tapu o Tupua! 52Ea, siei se ʻprophetʼ ma otou puna ne fai pariki tia? Ne ratou tamatea riaina fokia koa kave rongo o Tupua ne rongo rongo saki ea ratou i mua ko te au ranga o tana Seka tonu rei. Ma i vasia nei ne kotou tifanga ria, ma ne kotou tamatea riaina koia. 53Kotou koa taangata ne kotou saua koa fono a Tupua, ne soria ifo e nga ʻangelʼ, kae kotou si se ne tautari kiei!”
Te tau fatu ranga o Stephen
54I vasia te kano o te Kau Fono fono ne fakarongo kia Stephen, koratou ku teke sapa rei, ma ku fe ngii taki ko aratou nifo ia ratou teke anga kiei. 55Kae ko Stephen e nofo riaina e te Mauri Tapu o Tupua, ne pula ki runga ki vaerangi, ma ne nai ravea ina te rau ariki taurekareka o Tupua, ma ko Jesus e tuu i te faasi matau o Tupua. 56Koia ne muna, “Pula! Kuou e ono vaerangi e masara, ma te Tama a Tangata e tuu i te faasi matau o Tupua!” 57Koratou ne sai ko aratou taringa ki aratou rima, ma ne ttangi foorua. Tera i vakanga koratou ne feuruti kaatoa rei kiei, 58ne tosi ea ratou koia o tau fatu kese ma te noforanga lasi. Te faoa ne fakarongo kia Stephen, ne tuku ko aratou suru ke reosaki e te tangata muri, na ingoa ko Saul. 59Koratou e koi tau fatu rei ko Stephen, i na vasia e karanga ki te Ariki, “Te Ariki Jesus, sau atu toku ora!” 60Koia ne tokoturi ki raro o tangi forua rei, “Te Ariki ee! Kau see faka maanatu mai ki aratou sara nei!” Koia ne muna faka peinei, ma ne mate arei.
Currently Selected:
Acts 7: TKP
Highlight
Copy
Compare
Share
Want to have your highlights saved across all your devices? Sign up or sign in
© 2025 Wycliffe Bible Translators, Inc.